[1] Mâ-thán ke lai-é Sṳ-fap-thì-ngâ, Pâ-sṳ̂-fu-ngí ke lai-é Kî-thai-li, Sṳ-li-mí-ngâ ke lai-é Yù-kap, Mâ-kî-ngâ ke lai-é Pâ-sṳ̂-fu-ngí thâng-tó Yâ-li-mí hiong khiùn-chung só-kóng ke fa.
[2] Kì kóng: “Song-chú kóng: ‘Má-ngìn liù chhai liá-sàng, má-ngìn chhiu voi yîn-vi chan-chên, kî-fông, pot-vûn lòi-sí. Chúng-he, má-ngìn hiong Pâ-pí-lùn-ngìn thèu-hòng, má-ngìn chhiu m̀-voi pûn-ngìn chhṳ̀-sí, miang voi tet pó-liù, chhiong ngiâm-tó miang khiung-yong.’
[3] Song-chú yu án-ngiòng kóng: ‘Ngài yit-thin oi chiông liá-sàng kâu-pûn Pâ-pí-lùn-vòng ke kiûn-chhui; kì-têu thin-chho̍k voi lòi cham-liâng liá-sàng.’ ”
[4] Só-yî ke-têu kôn-yèn hi kien vòng, tui kì kóng: “Khiù ngì chhú-sí liá-ke ngìn; yîn-vi kì sô-súng chhai sàng-tú ke sṳ-pîn lâu ngìn-mìn thèu-hòng, sṳ́ kì-têu sú-ngiôn kiok-lài. Kì só khiù ke m̀-he sṳ́ ngìn-mìn tet phìn-ôn, fán-chón voi hoi kì-têu su châi-nan.”
[5] Sî-tí-kâ-vòng en-kóng: “Hó â! Kì chhai ngì-têu sú-chûng, mò-lun ngì-têu ngióng-pân chhú-lî, ngài mò-fap kôn-sa̍p.”
[6] Só-yî kì-têu chiông Yâ-li-mí chok hí-lòi, yung sok-è chiông kì chhui-lo̍k vòng-chṳ́ Mâ-kî-ngâ ke tún-súi-fut tú. Liá tún-súi-fut chhai vòng-kiûng kim-ví-chhui ke kî-liù-só tî-poi, tún-súi-fut mò súi, chṳ́-yû nam-nài, Yâ-li-mí chhiu ham chhai nam-nài tú.
[7] Ke-sṳ̀, tú-hó vòng chhai Phien-ngâ-mén-mùn khôi-thìn. Kiûng-thìn thai-kam, Kú-sṳ̍t-ngìn Yî-pak-Mí-le̍t thâng-kóng kì-têu chiông Yâ-li-mí chhui-lo̍k tún-súi-fut tú ke sêu-sit,
[8] chhiu chhut vòng-kiûng hi hiong vòng chhṳ̀n-chhìn kóng:
[9] “Ngài ke chú, ngài ke vòng â, liá-têu ngìn án-ngiòng tui-thai siên-tî Yâ-li-mí tông khó-vu. Kì-têu chiông kì chhui-lo̍k tún-súi-fut tú, kì yit-thin voi ngo-sí chhai ke-vi, yîn-vi sàng-tú yí-kîn mò liòng-sṳ̍t lé.”
[10] Só-yî vòng min-lin Yî-pak-Mí-le̍t tai sâm-sṳ̍p sà hi, chhai Yâ-li-mí màng-sí yî-chhièn chiông kì kiu chhut-lòi.
[11] Yî-pak-Mí-le̍t chhiu tai liá-têu ngìn to kiûng-thìn ke chhông-khu hi, chhìm-têu lan-pu lan-sâm, yèn-heu yung sok-è chhui-lo̍k tún-súi-fut tú,
[12] ham Yâ-li-mí chiông liá-têu lan-pu lan-sâm tap chhai hia̍p-hâ, miên-tet sok-è lu-sông kì; Yâ-li-mí chhiu án-ngiòng cho.
[13] Kì-têu chhiu tui tún-súi-fut tú chiông Yâ-li-mí lâi chhut-lòi. Liá-sṳ yî-heu, kì-têu hàn-he chiông Yâ-li-mí liù chhai kim-ví-chhui ke kî-liù-só.
[14] Heu-lòi, Sî-tí-kâ-vòng ham-ngìn tai siên-tî Yâ-li-mí to Song-chú ke sṳn-thien ke thi-sâm chak mùn-héu kien kì. Kì tui Yâ-li-mí kóng: “Ngài mun ngì yit-ke mun-thì; ngì thin-chho̍k oi ló-ló sṳ̍t-sṳ̍t lâu ngài kóng.”
[15] Yâ-li-mí en Sî-tí-kâ kóng: “Na-he ngài ló-sṳ̍t kóng, ngì yit-thin voi chhṳ̀ ngài; na-he ngài thì-chhut yi-kien, ngì ya m̀-voi thâng.”
[16] Só-yî Sî-tí-kâ-vòng sṳ̂-ha tui Yâ-li-mí fat-sṳ: “Ngài chṳ́-tén yún-sên Song-chú — chhóng-chho ngài-têu sâng-miang ke Song-ti fat-sṳ, ngài chhie̍t-tui m̀-voi chhṳ̀ ngì, ya m̀-voi chiông ngì kâu-pûn sióng-oi chhṳ̀ ngì ke ngìn.”
[17] Yâ-li-mí chhiu lâu Sî-tí-kâ kóng: “Song-chú — Van-kiûn ke Ngièn-soi, Yî-set-lie̍t ke Song-ti án-ngiòng kóng: Na-he ngì chhut-hi hiong Pâ-pí-lùn-vòng ke chiông-kiûn thèu-hòng, ngì chhiu hàn-yû miang; liá-sàng ya m̀-voi pûn-ngìn sêu-thet. Ngì lâu ngì chhiòn-kâ ke ngìn chhiòn-phu m̀-sṳ́ sí.
[18] Na-he ngì m̀-hén chhut-hi thèu-hòng, liá-sàng voi lo̍k chhai Pâ-pí-lùn-ngìn ke sú-chûng. Kì-têu voi piong-fó sêu-sàng; ngì ya mò fap-thu thot-lì kì-têu ke sú.”
[19] Chúng-he vòng en-kóng: “Ngài kiâng ke-têu thèu-hòng Pâ-pí-lùn ke Yù-thai ngìn-mìn. Pâ-pí-lùn-ngìn khó-nèn chiông ngài kâu-pûn kì-têu, kì-têu voi chiông ngài met-to pan sâng-sí.”
[20] Yâ-li-mí kóng: “Pâ-pí-lùn-ngìn m̀-voi chiông ngì kâu-pûn kì-têu. Khiù ngì thâng-chhiùng Song-chú ham ngài lâu ngì kóng ke fa, ngì chhiu voi phìn-ôn mò-sṳ, kiu-tó sin-miang.
[21] Song-chú yí-kîn chṳ́-sṳ ngài, na-he ngì m̀ chhut-hi thèu-hòng,
[22] liù chhai Yù-thai vòng-kiûng ke kiûng-ńg voi pûn-ngìn tai-to Pâ-pí-lùn-vòng ke chiông-kiûn mien-chhièn. Kì-têu voi kín-kóng: Vòng pûn sṳ̂n-piên chhîn-sin ke ngìn phien-tó; kì-têu chó-yu kì. Liá-ha kì sûng-kiok tha̍p chhai nam-nài tú; sṳ̂n-piên ke ngìn chhiòn-phu lì-khôi kì.”
[23] Yâ-li-mí yu kóng: “Ngì ke vòng-fî, chṳ́-ńg chhiòn-phu voi pûn-ngìn tai-to Pâ-pí-lùn-ngìn ke-vi; ngì chhṳ-kâ ya mò fap-thu thò-chéu. Ngì voi pûn Pâ-pí-lùn-vòng chok-tó; liá-sàng voi pûn-fó sêu-thet.”
[24] Sî-tí-kâ tui Yâ-li-mí kóng: “M̀-hó pûn ngìn tî ngài-têu kóng ke fa, ngì chang m̀-voi sí.
[25] Na-he yû kôn-yèn tî ngài lâu ngì kóng-ko fa, kì-têu voi lòi chhìm ngì, tui ngì kóng: ‘Ngì tui vòng kóng má-ke, vòng tui ngì kóng má-ke, ngì oi ló-sṳ̍t kóng, ngài-têu chhiu m̀-voi chhṳ̀ ngì.’
[26] Ke-sṳ̀, ngì oi lâu kì-têu kóng: ‘Ngài khién-khiù vòng m̀-hó chiông ngài sung-chón Yok-nâ-tân ke kâm-ngiu̍k, sí chhai ke-vi.’ ”
[27] Heu-lòi, só-yû ke kôn-yèn ton-chṳ̂n chhiòn-phu lòi chhà-mun Yâ-li-mí, kì chhiu cheu vòng min-lin kì kóng ke fa en kì-têu. Kì-têu mò fa hó-kóng, yîn-vi vòng lâu kì kóng-fa ke nui-yùng mò ngìn thâng-tó.
[28] Án-ngiòng, Yâ-li-mí pûn-ngìn liù chhai kim-ví-chhui ke kî-liù-só, chhṳ̍t-to Yâ-lu-sat-lâng pûn-ngìn cham-liâng ke-ngit.