[1] Siên-tî Yâ-li-mí siá yit-fûng sin-é pûn ke-têu tui Yâ-lu-sat-lâng pûn Nì-pu-kap-nì-sat chok-hi Pâ-pí-lùn hàn-sâng ke chóng-ló, pin chi-sṳ̂, siên-tî, lâu mìn-chung.
[2] Liá-fûng sin-é he chhai Yok-ngâ-kîn-vòng, thai-heu, ke-têu thai-kam, Yù-thai thi-fông lâu Yâ-lu-sat-lâng ke kôn-yèn, tá-thiet sṳ̂-fu, lâu kî-su̍t ngìn-yèn chhiòn-phu lì-khôi Yâ-lu-sat-lâng yî-heu siá ke.
[3] Ke-sṳ̀, Yù-thai-vòng Sî-tí-kâ phai Sâ-fân ke lai-é Yî-li-â-sat lâu Hî-le̍t-kâ ke lai-é Kî-mâ-li to Pâ-pí-lùn hi kien Nì-pu-kap-nì-sat-vòng. Liá-fûng sin-é he kâu-pûn kì lióng-sà tai-hi ke. Sin-é ke nui-yùng he án-ngiòng siá:
[4] “Song-chú — Van-kiûn ke Ngièn-soi, Yî-set-lie̍t ke Song-ti lâu só-yû tui Yâ-lu-sat-lâng pûn Kì chok-to Pâ-pí-lùn hi ke ngìn án-ngiòng kóng:
[5] ‘Ngì-têu oi hí-vuk, hó he̍t hâ-lòi; oi kâng-chung, hó sṳ̍t thièn-yèn ke chhut-sán.
[6] Ngì-têu oi kiet-fûn, kiung chṳ́-ńg; ngì-têu ke chṳ́-ńg ya oi kiet-fûn, kiung chṳ́-ńg, sṳ́ ngì-têu chhai ke-vi voi hîn-vong, ngìn-khiéu chen-kâ, m̀-voi kám-séu.
[7] Ngì-têu oi vi Ngài kiuk ngì-têu hi ke ke-têu sàng-sṳ mèu fuk-li, vi kì-têu ke fàn-yùng hiong Ngài khì-khiù; ke-têu só-chhai yû phìn-ôn, ngì-têu chang voi yû phìn-ôn.
[8] Ngài — Song-chú, Van-kiûn ke Ngièn-soi, Yî-set-lie̍t ke Song-ti kín-ko ngì-têu: M̀-hó pûn ngì-têu tông-chûng ke-têu siên-tî, ya-he chhṳ-khoâ voi puk-koa ke ngìn phien-chéu; ya m̀-hó siông-sin kì-têu pot-mung khon-tó ke.
[9] Kì-têu chia Ngài ke miàng kóng ká yi-ngièn lòi-phien ngì-têu; Ngài pin mò phai kì-têu. Ngài — Song-chú án-ngiòng siên-pu lé.’
[10] “Song-chú án-ngiòng kóng: ‘Kîn-ko Pâ-pí-lùn thúng-chhṳ chhit-sṳ̍p ngièn yî-heu, Ngài voi ku-ngiam ngì-têu, sṳ̍t-hien Ngài tui ngì-têu só-kóng ên-fi ke fa, chiông ngì-têu tai-chón liá só-chhai.
[11] Chṳ́-yû Ngài tî Ngài vi ngì-têu ôn-phài ke kie-va̍k: he phìn-ôn, m̀-he châi-nan; Ngài oi sṳ́ ngì-têu yû chhièn-thù yû phan-mong.
[12] Ke-sṳ̀, ngì-têu voi khiù-ham Ngài, hiong Ngài khì-tó, Ngài ya voi thâng ngì-têu ke khì-khiù.
[13] Ngì-têu chhìm Ngài, yit-thin chhìm tet-tó; ngì-têu na chôn-sîm chhìm Ngài,
[14] Ngài pó-chṳn pûn ngì-têu chhìm-tó. Ngì-têu sûi-yèn pûn Ngài chok-chéu, Ngài oi pûn ngì-têu chón ku-hiông. Ngài oi tui kiuk ngì-têu hi ke kok-koet kok só-chhai chiông ngì-têu si̍p-ha̍p hí-lòi, tai ngì-têu chón-to ngì-têu pûn Ngài chok-chéu só lì-khôi ke ku-hiông. Ngài — Song-chú án-ngiòng siên-pu lé.’
[15] “Yîn-vi ngì-têu kóng: ‘Song-chú chhai Pâ-pí-lùn yû vi ngài-têu hîn-hí siên-tî’,
[16] só-yî, yû-koân Thai-ví vòng-sṳt ke kiûn-vòng lâu ke-têu liù chhai liá-sàng, mò lâu ngì-têu khiung-ha pûn-ngìn chok-hi ke thùng-pâu,
[17] Song-chú — Van-kiûn ke Ngièn-soi án-ngiòng kóng: ‘Ngài oi sṳ́ kì-têu tù-tó chan-chên, kî-fông lâu pot-vûn. Ngài oi sṳ́ kì-têu chhiong fái-to sṳ̍t m̀-tet ke vù-fâ-kó.
[18] Ngài oi yung chan-chên, kî-fông lâu pot-vûn lòi kiuk kì-têu. Mò-lun Ngài kiuk kì-têu to má-ke só-chhai hi, sṳ-kie kok-koet ke ngìn chhiòn-phu voi tông-nâu kì-têu, chiông kì-têu khon-cho su chu-chú, hoi-ngìn pot-tok-ngok, pûn-ngìn khon-khiâng, vú-yu̍k ke tui-siong;
[19] yîn-vi kì-têu m̀ thâng-chhiùng Ngài ke fa. Ngài yit-pái yu yit-pái phai Ngài ke phu̍k-ngìn — ke-têu siên-tî hiong kì-têu chhòn-fa, chúng-he kì-têu vàn-chhiòn m̀-thâng.
[20] Só-yî, Ngài tui Yâ-lu-sat-lâng kiuk-chéu, pûn-ngìn chok-to Pâ-pí-lùn hi ke ngìn â, ngì-têu oi chu-yi thâng Ngài — Song-chú ke fa.’
[21] “Yû-koân chia Song-chú ke miàng kóng ká yi-ngièn phien ngì-têu ke Kô-lai-ngâ ke lai-é Â-ha̍p, lâu Mâ-sî-ngâ ke lai-é Sî-tí-kâ, Song-chú — Van-kiûn ke Ngièn-soi, Yî-set-lie̍t ke Song-ti kóng: Kì oi chiông liá lióng-sà kâu-pûn Pâ-pí-lùn-vòng Nì-pu-kap-nì-sat sú-chûng. Nì-pu-kap-nì-sat voi chhai ngì-têu mien-chhièn chiông kì-têu chhú-sí.
[22] Ngì liá-têu tui Yù-thai pûn-ngìn chok-to Pâ-pí-lùn hi ke ngìn oi chu-chú phe̍t-ngìn ke sṳ̀, ngì-têu voi kóng: ‘Ngien Song-chú tui-fu ngì, chhiong Kì tui-fu pûn Pâ-pí-lùn-vòng sâng-sâng sêu-sí ke Sî-tí-kâ lâu Â-ha̍p yit-yong!’
[23] Yîn-vi kì-têu chhai Yî-set-lie̍t fam phoi-ngia̍k ke chhui — lâu lìn-sa ke pû-ngiòng hàng kiên-yìm, yu chia Song-chú ke miàng kóng fâ-liâu. Song-chú tî kì-têu ke hàng-vì, yu chhîn muk-chû khon-tó kì-têu ke só-cho. Song-chú án-ngiòng siên-pu lé.”
[24] Song-chú — Van-kiûn ke Ngièn-soi, Yî-set-lie̍t ke Song-ti ham ngài chhòn-fa pûn Nì-hî-làn-ngìn Sṳ-mâ-ngâ. Sṳ-mâ-ngâ sṳt yung chhṳ-kâ ke miàng siá sin-é pûn Mâ-sî-ngâ ke lai-é chi-sṳ̂ Sî-fân-ngâ, lâu khì-thâ chi-sṳ̂, pin Yâ-lu-sat-lâng só-yû ke ngìn-mìn. Kì chhai sin-é tî-poi hiong Sî-fân-ngâ án-ngiòng kóng:
[26] “Song-chú yí-kîn chṳ́-phai ngì cho chi-sṳ̂ lòi-thoi Yâ-hò-yâ-thai; ngì liá-ha he sṳn-thien ke kam-tuk. Ngì ke chit-ngim he chhú-fa̍t tak-ke fûng chhṳ-kâ cho siên-tî ke khòng-ngìn, yung thiet-lien só-tén, yung kâ chiông kì-têu ke kiáng-kîn khà hí-lòi.
[27] Liá-ha, ngì-têu tông-chûng yû yit-ke Â-nâ-thut-ngìn Yâ-li-mí, chhṳ-kâ fûng chhṳ-kâ cho siên-tî; ngì cho-má-ke m̀-chhin chit-ngim chhú-fa̍t kì nè?
[28] Kì sṳt siá sin-é lâu ngài liá-têu chhai Pâ-pí-lùn ke thùng-pâu kóng, ngài-têu liù-mòng ke sṳ̀-kiên voi tông-chhòng, só-yî fûn-fu ngài-têu oi hí-vuk, hó he̍t hâ-lòi; ya oi kâng-chung, hó sṳ̍t thièn-yèn ke chhut-sán.”
[29] Chi-sṳ̂ Sî-fân-ngâ chiông liá-fûng sin thu̍k-pûn ngài thâng.
[30] Song-chú chhiu fûn-fu ngài
[31] siá sin-é pûn só-yû pûn-ngìn chok-hi Pâ-pí-lùn ke thùng-pâu, thì-hí Nì-hî-làn-ngìn Sṳ-mâ-ngâ ke sṳ, kóng: “Ngài — Song-chú oi chit-fa̍t Nì-hî-làn-ngìn Sṳ-mâ-ngâ lâu kì ke chṳ́-chṳ́ sûn-sûn. Ngài pin-mò phai kì, chúng-he kì fûng chhṳ-kâ cho siên-tî, hiong ngì-têu kóng-fa, ham ngì-têu thâng-sin kì ke fâ-liâu. Kì m̀-voi yû chṳ́-sûn hó he̍t chhai ngì-têu tông-chûng, ya mò khó-nèn chhai sên-chhièn khon-tó Ngài su-pûn Ngài chṳ́-mìn ke fuk-hi, yîn-vi kì kóng phoi-ngia̍k Song-chú ke fa. Ngài — Song-chú án-ngiòng siên-pu lé.”