[1] Song-chú â, ngài to Ngì mien-chhièn phien-lun on-chhìn, tak-pái tû he Ngì chho̍k! Sûi-yèn án-ngiòng, ngài hàn-he oi lâu Ngì thó-lun: To-tái má-ke he kûng-chṳn nè? Cho-má-ke fái-ngìn hàn-he fàm-sṳ sun-li? Cho-má-ke kúi-cha ke ngìn ôn-vún ko-ngit?
[2] Ngì châi-chung kì-têu, kì-têu chhiu sâng-kîn, chóng-thai, tá-chṳ́. Kì-têu ke choi chhîn-khiun Ngì, chúng-he sîm lì Ngì chhin-yén.
[3] Song-chú â, Ngì ngin-sṳt ngài; Ngì liáu-kié ngài, chhà-ngiam ngài tui Ngì ke sîm-yi. Khiù Ngì chiông fái-ngìn lâi chhut-lòi, chhiong yòng-è lâi-hi thù-chái-chhòng, chiông kì-têu fûn-phe̍t koân-tén, liù-to oi chhṳ̀ ke ngit-è.
[4] Ngài-têu ke thú-thi hàn-oi hôn kí-kiú nè? Thièn-yèn ke chhó oi châu-to kí-sṳ̀ nè? Fî-niâu chéu-chhu chhiòn-phu sí chhiang-chhiang lé, yîn-vi ngài ke thùng-pâu cho tông-tô fái-sṳ; kì-têu kóng: Song-ti khon m̀-tó ngài-têu ke hàng-vì.
[5] Song-chú kóng: Yâ-li-mí â, na-he ngì lâu ngìn chéu-siông-kiuk voi thiám, lâu mâ-é pí-soi ngì oi ngióng-pân nè? Na-he ngì chhai phiàng-thi chang kám-kok yû phìn-ôn, chhai Yok-tan hò-sùn ke su-lìm tú ngì oi ngióng-pân nè?
[6] Lièn ngì ke hiûng-thi lâu chhîn-ngìn ya chhut-mai ngì; kì-têu chhai heu-poi thai-sâng fán-tui ngì. Chhiu-son kì-têu lòi lâu ngì kóng hó-fa, ngì ya m̀-hó siông-sin kì-têu.
[7] Song-chú kóng: Ngài vok-thet Ngài ke kâ Yî-set-lie̍t, Ngài piong-thet Ngài ke sán-ngia̍p. Ngài chiông sîm-oi ke chṳ́-mìn kâu-pûn thi̍t-ngìn.
[8] Ngài ke sién-mìn phoi-ngia̍k Ngài; kì-têu chhiong su-lìm chûng ke sṳ̂-é hiong Ngài ho-ho-kún, yîn-vi án-ngiòng Ngài tông-nâu kì-têu.
[9] Ngài ke sién-mìn chhiong yit-chak tiâu-é pûn ên-tiâu vì-tén lòi kûng-kit; ên-tiâu ya hêm yâ-chhu lòi khiung-ha sṳ̍t kì ke ngiuk.
[10] Lie̍t-koet ke thúng-chhṳ-chá lòi tha̍p-fái Ngài ke phù-thò-yèn; kì-têu tha̍p-thet Ngài ke thièn-yèn, sṳ́ Ngài só-oi ke thièn-yèn fông-fi.
[11] Kì-têu sṳ́ thièn-thi sàng-cho khóng-yâ; Ngài ke mien-chhièn mân-phien fông-liòng. Thú-thi chhiòn-phu fông-fi thet, chúng-he mò-ngìn koân-sîm.
[12] Fí-me̍t-chá phàn-ko khóng-yâ kông-kông ke sân-táng; Ngài sṳ́ chan-chên lìm-to chhiòn-thi; mò-ngìn yû khó-nèn hióng-su thai-phìn.
[13] Ngài ke chṳ́-mìn chung ma̍k-é, sû-tó ke he net-è; kì-têu sîn-khú kâng-chung, chhiòn-mò tet-tó li-yit. Ngài yit fat-khién, kì-têu chhiu mò-hó sû-sṳ̀n.
[14] Song-chú án-ngiòng kóng: “Lun-tó ke-têu lìn-koet, yîn-vi chhîm-cham Ngài su-pûn Ngâ chṳ́-mìn Yî-set-lie̍t ke thú-thi, Ngài oi tui pún-thi chiông kì-têu lièn-kîn pâng-thet; Ngài oi tui kì-têu tông-chûng chiông Yù-thai ke ngìn-mìn chhióng-kiu chhut-lòi.
[15] Chúng-he, Ngài pâng-chhut kì-têu yî-heu, hàn-he voi lìn-mén kì-têu, pûn kì-têu chón-to chhṳ-kâ ke ku-hiông.
[16] Na-he kì-têu sṳ̀n-sîm chiap-su Ngài chṳ́-mìn ke sin-ngióng, chṳ́-tén Ngài — yún-sên Song-chú ke miàng fat-sṳ, chhiu-chhiong kì-têu yî-chhièn kâu Ngài chṳ́-mìn chṳ́-tén Pâ-li̍t ke miàng fat-sṳ, kì-têu chhiu nèn lâu Ngài chṳ́-mìn khiung-ha sên-chhùn, hióng-su fàn-yùng.
[17] Na-he kì-têu m̀ thâng-chhiùng Ngài, Ngài chhiu voi chiông ke-chak koet lièn-kîn pâng-thet, chha̍t-tái sêu-me̍t. Ngài — Song-chú án-ngiòng siên-pu lé.”