[1] Yok-sî-â ke lai-é Yok-ngâ-kin cho Yù-thai-vòng ke thi-si ngièn, Nì-li-â ke lai-é Pâ-liu̍k chiông siên-tî Yâ-li-mí só-kóng ke fa siá chhai sû-hong. Heu-lòi, Yâ-li-mí lâu kì kóng:
[2] “Song-chú — Yî-set-lie̍t ke Song-ti án-ngiòng lâu ngì kóng: Pâ-liu̍k â,
[3] ngì chhṳ-kâ sṳt kóng: ‘Ngài chhám lé! Song-chú kâ-thiâm ngài ke pî-sông thung-khú. Ngài chhên-to sṳ̂n-thí tông-khioi tông-thiám, mò fap-thu tet-tó phìn-ôn!’
[4] “Chúng-he, Song-chú ham ngài lâu ngì kóng: ‘Ngài — Song-chú oi chiông Ngài só hí ke chhak-thet, chiông Ngài só chung ke pâng-thet. Ngài oi chhai chhiòn sṳ-kie án-ngiòng hàng.
[5] Ngì sióng-oi vi chhṳ-kâ sṳ̀n-chhiu thai-sṳ he-mò? M̀-sṳ́ sióng! Ngài oi kong châi-nan pûn chhiòn ngìn-lui; chúng-he ngì mò-lun to nai-vi hi, Ngài voi pûn ngì ngiâm-chón chhṳ-kâ ke miang. Ngài — Song-chú án-ngiòng siên-pu lé.’ ”