[1] Song-chú án-ngiòng fûn-fu ngài: “Hi mâi yit-thiàu mà-sâ yêu-tai kiê hí-lòi; chúng-he m̀-hó chim chhai súi-chûng.”
[2] Só-yî ngài cheu Song-chú ke fûn-fu mâi yit-thiàu yêu-tai kiê hí-lòi.
[3] Song-chú thi-ngi pái lâu ngài kóng:
[4] “Ngì to Yu-fat-lâ-tí-hò hi, chiông ngì só kiê ke yêu-tai khong chhai sa̍k-phung tú.”
[5] Ngài chhiu cheu Song-chú ke min-lin to Yu-fat-lâ-tí-hò hi, chiông yêu-tai khong chhai ke-vi.
[6] Ko-liáu yit-chham sṳ̀-kiên, Song-chú fûn-fu ngài: “Ngì to Yu-fat-lâ-tí-hò hi nâ ke-thiàu Ngài fûn-fu ngì khong hí-lòi ke yêu-tai.”
[7] Ngài chhiu chón-to ke-vi, chiông khong-tén ke yêu-tai yet chhut-lòi; yêu-tai yí-kîn mièn-thet, yung m̀-tet lé.
[8] Chiap-tén, Song-chú yu lâu ngài kóng-fa. Kì kóng:
[9] “Ngài oi cheu án-ngiòng pho-fái Yù-thai lâu Yâ-lu-sat-lâng ngìn-mìn ke thai kiêu-ngau.
[10] Liá-pân ngìn-mìn tông-fái, m̀-hén thâng-chhiùng Ngài ke min-lin. Kì-têu hàn-he ngang-kiáng sià-ok, hàn hi kin-pai, fu̍k-sṳ phe̍t ke sṳ̀n-mìn. Só-yî, kì-têu voi chhiong liá-thiàu yêu-tai án-ngiòng pien mò lu-yung.
[11] Chhiu-chhiong yêu-tai ngiàm-tén ngìn ke sṳ̂n-thí, Ngài pún-lòi oi só-yû Yî-set-lie̍t-ngìn lâu Yù-thai-ngìn ngiàm-tén Ngài. Ngài oi kì-têu cho Ngài ke chṳ́-mìn, hó-pûn Ngài ke sṳn-miàng su chhṳ̂n-chan, tet yùng-yeu; chúng-he kì-têu m̀-hén thâng.”
[12] Song-chú — Yî-set-lie̍t ke Song-ti lâu ngài án-ngiòng kóng: “Yâ-li-mí â, ngì oi tui Yî-set-lie̍t-ngìn kóng: Tak-chak chiú-kông chhiòn-phu oi chông-mân chiú. Na-he kì-têu en-kóng: ‘Ngài-têu ngióng m̀-tî tak-chak chiú-kông oi chông-mân chiú?’
[13] yèn-heu, ngì chang lâu kì-têu kóng: Ngài — Song-chú oi yung chiú kon-chui liá thi-fông só-yû ke ngìn-mìn; Thai-ví vòng-chhèu ke kiûn-vòng, chi-sṳ̂, siên-tî, lâu Yâ-lu-sat-lâng ke ngìn-mìn chhiòn-phu voi chhiong sṳ̍t chiú-chui.
[14] Ngài oi tá-sui kì-têu, sṳ́ kì-têu chhiu-son he yà-ôi lâu chṳ́-ńg ya voi ngia̍k-tó, chhiong chiú-kông siông-kho̍k to sui-thet. Ngài chhie̍t-tui m̀ lìn-mén kì-têu, m̀ siak kì-têu, m̀ thùng-chhìn kì-têu; Ngài yit-thin oi sêu-me̍t kì-têu.”
[15] Yî-set-lie̍t-ngìn â, Song-chú yí-kîn án-ngiòng siên-pu lé. Ngì-têu oi khiâm-pî, oi chu-yi thâng Kì ke fa.
[16] Vû-am hàn-màng to yî-chhièn, ngì-têu hàn-màng chhai am-am ke chhṳ̂m-sân tiet-tó yî-chhièn, oi yùng-kông Song-chú — ngì-têu ke Song-ti. Song-chú hàn-màng chiông ngì-têu só phan-mong ke kông-mìn pien-cho vû-am yî-chhièn, ngì-têu oi yùng-kông Song-chú — ngì-têu ke Song-ti.
[17] Na-he ngì-têu m̀-thâng, ngài oi yîn-vi ngì-têu ke kiêu-ngau thêu-kieu; ngài voi kieu-to muk-chṳp làm-kâm; yîn-vi Song-chú ke yòng-khiùn voi pûn-ngìn chok-chéu lé.
[18] Song-chú lâu ngài kóng: “Hi ham vòng lâu thai-heu khiâm-pî tui pó-chho táng hâ-lòi! Yîn-vi kì-têu thèu-nà táng chhin-chiâng ke miên-liù voi tiet hâ-lòi lé.
[19] Yù-thai nàm-phu tak-chak sàng-sṳ voi pûn thi̍t-ngìn vì-tén; mò-ngìn nèn thoi kì-têu kié-vì. Yù-thai ke ngìn-mìn chhiòn-phu voi pûn-ngìn chok-chéu.”
[20] Yâ-lu-sat-lâng â, ngì khon! Thi̍t-ngìn tui pet-fông lòi lô! Kâu-thok ngì khon-ku ke yòng-khiùn, ngì só khoâ-khiéu ke yòng-è liá-ha chhai nai-vi nè?
[21] Ngì só kiet-kâu, yit-chhṳ̍t khon-cho hó phèn-yû ke, fán-chón lòi chṳ̂n-fu̍k ngì, oi thúng-chhṳ ngì; ngì hàn-yû má-ke fa hó kóng nè? Ngì voi chhiong sán-fu chhṳn-thung án-ngiòng thung-khú.
[22] Na-he ngì sióng-oi tî, ngì cho-má-ke voi tù-tó liá-ke châi-nan, cho-má-ke khiùn-è pûn-ngìn hiên hí-lòi, pûn-ngìn vú-yu̍k, liá he yîn-vi ngì fam tông-tô chhui só ngiâ-lòi ke.
[23] Kú-sṳ̍t-ngìn kám-nèn kói-pien phì-fû ke set? Fâ-pau kám-nèn chhù-thet kì ke pân-tiám? Liá-têu sṳ na-he yû khó-nèn, ngì liá-têu cho-koan fái-sṳ ke ngìn chang yû khó-nèn cho hó-sṳ.
[24] Só-yî, Song-chú oi tá-san ngì-têu, chhiu-chhiong khóng-yâ ke fûng chiông phang-é chhôi-chéu.
[25] Kì kóng, liá he ngì ke po-yin. Kì kiet-thin án-ngiòng tui-fu ngì, yîn-vi ngì m̀ ki-tet Kì, fán-chón hi-sin ká-sṳ̀n.
[26] Song-chú oi chhîn-chhṳ hiên ngì ke khiùn-è, lòi-miâng ngì ke mien, sṳ́ ngì kien-seu.
[27] Yîn-vi Kì yû khon-tó ngì cho Kì só-nâu ke sṳ; khon-tó ngì chhai sân-táng, thièn-hong pai phe̍t ke sṳ̀n-mìn, chhiong fu-ngìn-kâ fam kiên-yìm, fat yìm-sâng, hàng m̀-tî kien-seu ke yìm-lon. Yâ-lu-sat-lâng â, ngì chhám lé! Ngì mò chhiang-li oi to kí-sṳ̀ nè?