[1] Ke-ngièn chhit-ngie̍t, vòng-chhu̍k ke heu-thoi, ya he vòng ke yit-vi kôn-yèn, Yî-li-sâ-mâ ke sûn-é — Nì-tham-ngâ ke lai-é Yî-sṳ̍t-mâ-li, tai-tén sṳ̍p-ke ngìn to Mí-sṳ̂-pâ hi kien Â-hî-kâm ke lai-é Kî-thai-li chúng-tuk. Kì-têu khiung-ha sṳ̍t-fan ke sṳ̀,
[2] Nì-tham-ngâ ke lai-é Yî-sṳ̍t-mâ-li lâu thèn kì khiung-ha lòi ke sṳ̍p-ke ngìn yung tô-é, chiông Sâ-fân ke sûn-é — Â-hî-kâm ke lai-é Kî-thai-li chhṳ̀-thet; Kî-thai-li chhiu-he Pâ-pí-lùn-vòng chṳ́-thin cho kón-lî liá thi-fông ke chúng-tuk.
[3] Yî-sṳ̍t-mâ-li ya chhṳ̀-thet lâu Kî-thai-li liù chhai Mí-sṳ̂-pâ ke Yù-thai-ngìn, pin tông-sṳ̀ chhai-chhòng ke Pâ-pí-lùn kiûn-ngìn.
[4] Thi-ngi ngit, chhai mò-ngìn tî Kî-thai-li pûn-ngìn chhṳ̀-thet yî-chhièn,
[5] yû pat-sṳ̍p ke ngìn tui Sṳ-kiam, Sṳ-lò lâu Sat-mâ-li-â lòi. Kì-têu thi-thet fù-sî, chhá-lan sâm, kot-sông chhṳ-kâ ke sṳ̂n-thí, pin tai-lòi su-chi lâu nen-hiông, oi to Song-chú ke sṳn-thien hi.
[6] Nì-tham-ngâ ke lai-é Yî-sṳ̍t-mâ-li tui Mí-sṳ̂-pâ chhut-lòi, kín-hàng kín-kieu hi ngiàng-chiap kì-têu. Kì yit khon-tó kì-têu, chhiu lâu kì-têu kóng: “Chhiáng lòi khon Â-hî-kâm ke lai-é Kî-thai-li!”
[7] Kì-têu yit ngi̍p-sàng, Nì-tham-ngâ ke lai-é Yî-sṳ̍t-mâ-li lâu kì ke phu-ha chhiu chhut-sú chhṳ̀ kì-têu, chiông sṳ̂n-sṳ̂ fit-lo̍k fut-tú.
[8] Kì-têu tông-chûng yû sṳ̍p-ke ngìn hiong Yî-sṳ̍t-mâ-li ôi-khiù: “M̀-hó chhṳ̀ ngài-têu! Ngài-têu yû chhin-tô thai-ma̍k, séu-ma̍k, kám-lám-yù lâu phûng-thòng, khong chhai thièn-hong.” Yî-sṳ̍t-mâ-li chhiu mò chhṳ̀ kì-têu.
[9] Yî-sṳ̍t-mâ-li chiông chhṳ̀-sí ke sṳ̂n-sṳ̂ fit-lo̍k fut-tú, ke fut-è fî-sòng thai. Liá he thèu-pái Â-sat-vòng vi-tó fòng-phi Yî-set-lie̍t-vòng Pâ-sâ ke kûng-kit yet ke. Yî-sṳ̍t-mâ-li yung ke-têu ngìn ke sṳ̂n-sṳ̂ chiông fut-è thùn-mân hí-lòi.
[10] Chiap-tén, Yî-sṳ̍t-mâ-li chiông koet-vòng ke-têu moi-é lâu só-yû liù chhai Mí-sṳ̂-pâ ke ngìn chok hí-lòi, oi tai to Â-mùn-ngìn ke-vi hi. Liá-têu ngìn he sṳ-ví-chóng Nì-pu-sat-lâ-tan kâu-pûn Â-hî-kâm ke lai-é Kî-thai-li kón.
[11] Kâ-li-â ke lai-é Yok-ha̍p-nàn lâu thèn kì ke-têu kiûn-kôn thâng-tó Nì-tham-ngâ ke lai-é Yî-sṳ̍t-mâ-li só-fam ke chhui,
[12] chhiu tai-liâng phu-ha tûi Nì-tham-ngâ ke lai-é Yî-sṳ̍t-mâ-li, oi lâu kì siông-chhṳ̀, chhai Kî-phiên fu-khiun thai pî-thòng sùn tûi-tó kì.
[13] Pûn Yî-sṳ̍t-mâ-li chok-hi ke-têu ngìn-mìn khon-tó Kâ-li-â ke lai-é Yok-ha̍p-nàn lâu thèn kì ke kiûn-kôn, chhiu fî-sòng fôn-hí.
[14] Án-ngiòng, Yî-sṳ̍t-mâ-li tui Mí-sṳ̂-pâ chok-hi ke só-yû ngìn-mìn chhiu chón-sṳ̂n chéu-to Kâ-li-â ke lai-é Yok-ha̍p-nàn ke-vi hi.
[15] Chúng-he Nì-tham-ngâ ke lai-é Yî-sṳ̍t-mâ-li lâu kì pat-ke phu-ha tui Yok-ha̍p-nàn ke sú-hâ thò-chéu, to Â-mùn-ngìn ke-vi hi.
[16] Án-ngiòng, Kâ-li-â ke lai-é Yok-ha̍p-nàn lâu thèn kì ke-têu kiûn-kôn tui Yî-sṳ̍t-mâ-li sú-chûng chiông Yî-sṳ̍t-mâ-li am-sat Kî-thai-li yî-heu tui Mí-sṳ̂-pâ chok-chéu ke-têu ngìn-mìn tui Kî-phiên kiu chón-lòi, khì-chûng yû kiûn-ngìn, fu-ńg, se-ngìn-è lâu thai-kam.
[17] Kì-têu tông-kiâng Pâ-pí-lùn-ngìn, yîn-vi Nì-tham-ngâ ke lai-é Yî-sṳ̍t-mâ-li am-sat Pâ-pí-lùn-vòng só chṳ́-thin cho kón-lî liá thi-fông ke chúng-tuk, chhiu-he Â-hî-kâm ke lai-é Kî-thai-li. Vi-tó sám-khôi Pâ-pí-lùn-ngìn, kì-têu oi to Âi-khi̍p hi, chhai Pak-li-hèn fu-khiun ke Kîm-hón Kón thìn-liù hâ-lòi.