[1] Song-chú yu tui ngài kóng:
[2] “Chhai liá-vi, ngì m̀-hó thó pû-ngiòng, m̀-hó kiung chṳ́-ńg.
[3] Ngài oi lâu ngì kóng yû-koân chhai liá-vi chhut-se ke se-ngìn-è lâu kì-têu yà-ôi chiông voi tù-tó ke sṳ-chhìn.
[4] Kì-têu chhiòn-phu voi pot-vûn lòi sí; mò-ngìn pî-sông, mò-ngìn mài-chong kì-têu. Kì-têu ke sṳ̂n-sṳ̂ voi chhiong phì-liau tôi chhai thi-song. Kì-têu na-m̀-he ngo-sí, chhiu-he chan-sí; sṳ̂n-sṳ̂ sàng-cho fî-niâu chéu-chhu ke sṳ̍t-vu̍t.”
[5] Song-chú án-ngiòng tui ngài kóng: “Ngì m̀-hó hi sông-kâ, m̀-hó vi kì-têu sông-sîm liù muk-chṳp. Ngài m̀-voi chai su phìn-ôn pûn Ngài ke chṳ́-mìn, ya m̀-voi yung chhṳ̀-oi lìn-mén tui-thai kì-têu.
[6] Mò-lun phìn-chhien fu-kui, lûng-chúng voi sí chhai liá-vi, mò-ngìn mài-chong, ya mò-ngìn sông-sîm kieu kì-têu. Mò-ngìn voi kot-sông chhṳ-kâ ya-he thi-kông-thèu lòi péu-sṳ pî-sông.
[7] Mò-ngìn voi lâu sông-kâ khiung-ha sṳ̍t-fan, mò-ngìn voi hi ôn-ví kì-têu, lièn sí-yà sí-ôi ke ngìn ya mò-ngìn sung yit-pî chiú hi péu-sṳ thùng-chhìn.
[8] “Ngì ya m̀-hó hi chhiáng ngìn-hak ke vuk-hâ, lâu kì-têu khiung-ha chhô-chok, lîm-sṳ̍t.
[9] Ngài — Song-chú, Van-kiûn ke Ngièn-soi, Yî-set-lie̍t ke Song-ti án-ngiòng kóng: Ngài oi sṳ́ liá thi-fông m̀-voi chai yû fôn-hí khoai-lo̍k ke sâng, ya m̀-voi chai yû sîn-lòng lâu sîn-ngiòng ke sâng. Ngì-têu hàn chhai sṳ-kiên ke sṳ̀ chhiu voi chhîn-sṳ̂n khon-tó liá-têu sṳ.
[10] “Ngì hiong kì-têu chhòn liá-têu fa ke sṳ̀, kì-têu voi mun ngì: ‘Song-chú cho-má-ke yung án-thai ke châi-nan lòi chit-fa̍t ngài-têu nè? Ngài-têu to-tái fam má-ke chhui-ko? Ngài-têu ngióng-pân tet-chhui Song-chú — ngài-têu ke Song-ti?’
[11] Ngì chhiu en kì-têu kóng, Song-chú án-ngiòng kóng: ‘Ngì-têu ke chú-siên lì-khôi Ngài hi kin-pai fu̍k-sṳ phe̍t ke sṳ̀n-mìn. Kì-têu phoi-ngia̍k Ngài, m̀ thâng-chhiùng Ngài ke kau-hiun.
[12] Chúng-he ngì-têu pí kì-têu hàn-kha khó-vu. Ngì-têu yit-chhṳ̍t ngang-kiáng, tak-sà cheu sià-ok ke sîm hàng-sṳ, m̀ thâng-chhiùng Ngài.
[13] Só-yî Ngài oi chiông ngì-têu tui liá só-chhai te̍p chhut-hi, chiông ngì-têu kiuk-to ngì-têu lâu ngì-têu ke chú-siên lûng-chúng m̀ su̍k-sṳ ke só-chhai hi. Chhai ke-vi, ngì-têu voi ngit-ya pai phe̍t ke sṳ̀n-mìn; yîn-vi Ngài m̀-voi chai hiong ngì-têu sṳ̂-ên.’ ”
[14] Song-chú kóng: “Yû yit-ngit, ngìn fat-sṳ ke sṳ̀, m̀-voi chai chṳ́-tén ke tai-liâng Yî-set-lie̍t-ngìn chhut Âi-khi̍p ke yún-sên Song-chú fat-sṳ;
[15] fán-chón voi chṳ́-tén ke tai-liâng Yî-set-lie̍t-ngìn lì-khôi ke pet-fông ke thú-thi, lì-khôi Kì kiuk kì-têu hi kok-koet ke yún-sên Song-chú fat-sṳ. Yîn-vi Ngài oi tai-liâng kì-têu chón ku-hiông, chón-to Ngài su-pûn kì-têu chú-siên ke thú-thi. Ngài — Song-chú án-ngiòng siên-pu lé.”
[16] Song-chú kóng: “Khon â, Ngài oi phai chhin-tô tá-ǹg ke ngìn lòi chok liá-têu ngìn, yèn-heu oi phai chhin-tô tá-lia̍p ke ngìn to thai-se sân-thèu lâu ngàm-sa̍k lùng-tú hi chok kì-têu.
[17] Ngài khon-tó kì-têu só-cho ke yit-chhiet; kì-têu mò phan-fap chhai Ngài mien-chhièn chiông chhui-ok châ hí-lòi.
[18] Ngài oi sṳ́ kì-têu yîn chhṳ-kâ ke sià-ok lâu chhui-ko kâ-phi su chit-fa̍t; yîn-vi kì-têu pai ke-têu m̀-voi théu-hi, chhiong sí-sṳ̂ khiung-yong ke ngiéu-siong, tá-lá-sap Ngài ke thú-thi. Kì-têu chhai liá thi-fông mân-phien sat-li̍p khó-vu ke ká-sṳ̀n.”
[19] Song-chú â, Ngì he ngài ke li̍t-liong lâu sàng-pó; Ngì he ngài khú-nan sṳ̀ ke phit-nan-só. Lie̍t-koet yit-thin voi tui sṳ-kie kok-thi lòi-to Ngì mien-chhièn, kóng: “Ngài-têu ke chú-siên pai ká-sṳ̀n, lûng-chúng he hî-ká mò li-yit ke ngiéu-siong.
[20] Ngìn kám yû khó-nèn vi chhṳ-kâ chṳ-chho sṳ̀n-mìn mò? Khì-sṳ̍t kì-têu m̀-he chṳ̂n-sṳ̀n.”
[21] Song-chú kóng: “Só-yî, Ngài liá-pái yit-thin oi sṳ́ lie̍t-koet tî Ngài ke thai-nèn thai-li̍t; kì-têu chhiu voi tî Ngài ke miàng he Song-chú.”