[1] Yû-koân Â-mùn-ngìn, Song-chú án-ngiòng kóng: “Yî-set-lie̍t ke nàm-ngìn chhai nai-vi? Yî-set-lie̍t ke heu-thoi chhai nai-vi? Cho-má-ke yù-chhai ke-têu pai Mí-le̍t-kûng ke ngìn sṳ̀n-chiap Kâ-tet kî-chhu̍k ke thú-thi, he̍t chhai khì-chûng ke sàng-sṳ nè?
[2] Khon â, ngit-è voi-to, Ngài — Song-chú oi sṳ́ he̍t chhai sú-tû Lâ-pâ ke Â-mùn-ngìn thâng-tó chan-lon chûng chhin-hêm ke sâng. Lâ-pâ voi sàng-cho fông-phû, su̍k kì ke hiông-chhûn voi pûn fó sêu-thet. Yèn-heu Yî-set-lie̍t-ngìn voi tui chhîm-lio̍k kì-têu ke ngìn sú-chûng sû-chón chhṳ-kâ ke thú-thi. Ngài — Song-chú án-ngiòng siên-pu lé.
[3] Hî-sṳ̍t-pún-ngìn â, oi sông-sîm chhin-kieu! Yîn-vi Ngie-sàng fí-me̍t lé! Lâ-pâ ke fu-ngìn-kâ â, oi thai-sâng kieu! Oi chok mà-sâm ôi-sông, chhai sàng-chhiòng nui to-chhu chhong-lòi chhong-hi! Ngì-têu ke sṳ̀n-mìn Mí-le̍t-kûng lâu kì ke chi-sṳ̂, liâng-chhiu voi khiung-ha pûn-ngìn chok-chéu.
[4] Phoi-ngia̍k ke koet-mìn â, cho-má-ke khoâ-khiéu ngì-têu ke li̍t-liong chhiong sân-lak chhûng-mân súi nè? Cho-má-ke vá-kho chhṳ-kâ ke chhòi-pó, láu-tó mò-ngìn kám lòi-chhióng?
[5] Ngài — Chṳ-kô ke Song-chú, Van-kiûn ke Ngièn-soi oi sṳ́ tet-ngìn-vi ke sṳ vì-tén ngì, ngì-têu chhiòn-phu voi thò-chéu. Tak-sà ku chhṳ-kâ ke miang, mò-ngìn yû phan-fap chiông sṳt-phai ke kiûn-chhui chhùng-sîn chû-chṳt hí-lòi.
[6] “Chúng-he, yû yit-ngit, Ngài oi pûn Â-mùn-ngìn chón-hi, chhùng-chṳ́n kâ-yèn. Ngài — Song-chú án-ngiòng siên-pu lé.”
[7] Yû-koân Yî-tûng, Song-chú — Van-kiûn ke Ngièn-soi án-ngiòng kóng: “Chhai Yî-tûng mò phan-fap chai chhìm-tó chṳ-fi he-mò? Kì-têu tông-chûng hièn-nèn ke ngìn mò phan-fap chai lâu kì-têu kóng oi ngióng-pân cho he-mò? Kì-têu ke chṳ-fi chhiòn-phu mò-thet hi he-mò?
[8] Tí-tan-ngìn â, oi chón-sṳ̂n thò-chéu! Hi chhìm só-chhai khong hí-lòi! Yîn-vi Ngài chit-fa̍t Yî-so heu-thoi ke ngit-è to lé; Ngài oi sêu-me̍t kì-têu!
[9] Ngìn chak phù-thò ke sṳ̀, voi liù-têu phù-thò chhai su-táng; am-pû-thèu chhe̍t-é ngi̍p-lòi, tân-chhiang thêu kì-têu só-oi ke thin-thin.
[10] Chúng-he Ngài oi chiông Yî-so ke heu-thoi pok-to kông-kông, lu-chhut kì-têu khong-sṳ̂n ke só-chhai, sṳ́ kì-têu mò fap-thu hó khong. Yî-tûng-ngìn pin kì-têu ke chhîn-chhu̍k lâu lìn-sa chhiòn-phu sêu-me̍t lé, mò liù yit-sà.
[11] Chiông ngì-têu ke kû-yì kâu-pûn Ngài, Ngài voi pó-fu kì-têu; ngì-têu ke koá-fu ya cho-tet yí-kho Ngài.”
[12] Song-chú án-ngiòng kóng: “Khon â, na-he lièn ke-têu mò yin-kôi su chit-fa̍t ke ngìn chhiòn-phu oi lîm chit-fa̍t ke pî, ngì-têu kám yû khó-nèn m̀-sṳ́ su chit-fa̍t mâ? Mò khó-nèn! Ngì-têu yit-thin oi lîm liá-ke pî.
[13] Ngài chṳ́ chhṳ-kâ fat-sṳ kóng, Pô-sṳ̂-lâ-sàng voi pien-cho fông-thi, sàng-cho hoi ngìn chho̍k-kiâng, pûn-ngìn vú-yu̍k, chu-chú ke só-chhai. Kì fu-khiun só-yû ke sàng-sṳ voi yún-yén fông-fi. Ngài — Song-chú án-ngiòng siên-pu lé.”
[14] Ngài kóng: “Yî-tûng â, ngài tui Song-chú ke-vi tet-tó yit-ke sêu-sit. Kì phai sṳ́-chá to lie̍t-koet, ham kì-têu seu-si̍p kiûn-chhui, chún-phi kûng-kit ngì.
[15] Song-chú oi sṳ́ ngì sàng-cho chui-ngio̍k ke koet-kâ; mò-ngìn voi khon-chhung ngì.
[16] Ngì tông kiêu-ngau, láu-tó chhṳ-kâ chhin vî-fûng; khì-sṳ̍t, ngì pin mò chhiong chhṳ-kâ só-sióng án su-ngìn kin-vi. Chhiu-son ngì he̍t chhai sân-táng ke pên-kông, chhiu-son ngì chhiong ên-tiâu chhai chhin-kô ke só-chhai cho-teu, Song-chú ya oi chiông ngì lâi hâ-lòi. Song-chú án-ngiòng siên-pu lé.”
[17] Song-chú kóng: “Yî-tûng voi su-tó tet-ngìn-vi ke fí-me̍t; tak-ke ko-lu ngìn khon-tó thin-chho̍k voi hak-tó, ya voi khon m̀-hí kì.
[18] Thèu-pái Só-tô-mâ, Ngò-mô-lâ, lâu chû-vì ke chhûn-chông ngióng-pân me̍t-thet, Yî-tûng ya voi án-ngiòng pûn-ngìn me̍t-thet, m̀-voi chai yû-ngìn he̍t.
[19] Khon â, chhiu-chhiong sṳ̂-é tui Yok-tan hò-sùn ke su-nà chéu chhut-lòi, hi-to chhiâng-chhui ke mu̍k-chhòng; khiung-yong, Ngài oi fut-yèn-kiên pet Yî-tûng-ngìn thò-chéu lì-khôi kì-têu ke koet-kâ. Yèn-heu Ngài só sién-li̍p lòi cho-vòng ke, chhiu voi thúng-chhṳ liá koet-kâ. Má-ngìn cho-tet lâu Ngài pí? Má-ngìn kám ngiâ Ngài? Nai-ke thúng-chhṳ-chá kám fán-tui Ngài?
[20] Só-yî, ngì-têu oi thâng Ngài — Song-chú ke kie-va̍k: Ngài oi lâu Yî-tûng cho tui-thi̍t, tui-fu Thì-man-sàng ke ngìn. Lièn kì-têu ke se-ngìn-è chhiòn-phu voi pûn-ngìn lâi-chéu, tak só-chhai chhûng-mân thai chho̍k-kiâng.
[21] Yî-tûng vang lo̍k-hi ke hióng-sâng voi sṳ́ chhiòn-thi kín-chûn, mò-kat mò-sat ke kieu-sâng voi chhòn-to Fùng-hói.
[22] Khon â, thi̍t-ngìn chhiu-chhiong ên-tiâu tá-khôi yi̍t-kap, fut-yèn chhung hâ-lòi kûng-kit Pô-sṳ̂-lâ. Ke-ngit, Yî-tûng ke yúng-sṳ voi chhiong chhṳn-thung ke sán-fu án-ngiòng mò-kat mò-sat.”
[23] Yû-koân Thai-mâ-sṳ-kiet, Song-chú kóng: “Ha̍p-mâ lâu Â-ngí-pha̍t-sàng ke ngìn mò phìn-ôn, yîn-vi kì-têu thâng-tó fái sêu-sit. Kì-têu ke yù-sèu chhiong thai hói-long, hoi kì-têu mò fap-thu phìn-chhin.
[24] Thai-mâ-sṳ-kiet-ngìn sṳt-thet yúng-hi, chón-sṳ̂n thò-chéu. Kì-têu chhiong sán-fu chhṳn-thung, fî-sòng yù-sông thung-khú.
[25] Liá-chho sṳt tai-pûn ngìn fôn-hí khoai-lo̍k, chhin-yû miàng-sâng ke sàng, voi vàn-chhiòn fông-thet lé.
[26] Sàng-tú ke heu-sâng-ngìn voi chhai kiê-hong pûn-ngìn chhṳ̀-sí; só-yû ke chan-sṳ chhiòn-phu khiung-ngit thôn-hi, m̀-voi chhut-sâng.
[27] Ngài oi yung fó sêu Thai-mâ-sṳ-kiet ke sàng-chhiòng, chiông Phien-Ha̍p-tha̍t-vòng ke sàng-pó sêu-thet. Ngài — Song-chú, Van-kiûn ke Ngièn-soi án-ngiòng siên-pu lé.”
[28] Yû-koân pûn Pâ-pí-lùn-vòng Nì-pu-kap-nì-sat tá-sû ke Kî-tha̍t-chhu̍k lâu Ha-só-sàng chû-vì ke phu-lo̍k, Song-chú án-ngiòng kóng: “Hong-hí-lòi! Hi kûng-kit Kî-tha̍t-ngìn, chiáu-me̍t tûng-fông ngìn!
[29] Chhióng kì-têu ke chong-phùng lâu yòng-khiùn, nâ-chéu chong-phùng ke pu-liàm lâu tî-poi yit-chhiet ke yung-phín. Tai-chéu kì-têu ke lo̍k-thò, lâu kì-têu kóng: ‘Si chû-vì chhin tet-ngìn-kiâng!’
[30] “Ha-só-ngìn â, Ngài — Song-chú kín-ko ngì-têu, kiak-kiak thò-chéu! Chéu-to yén-yén ke só-chhai, hi khong hí-lòi! Pâ-pí-lùn-vòng Nì-pu-kap-nì-sat yí-kîn kie-va̍k oi kûng-tá ngì-têu, kì yí-kîn kiet-thin lé.”
[31] Song-chú kóng: “Hong-hí-lòi! Hi kûng-tá ke-têu láu-tó chhṳ-kâ tông ôn-chhiòn m̀-sṳ́ sèu ke ngìn-mìn! Kì-têu ke sàng mò sàng-mùn, ya mò mùn-chhôn, chhiòn mò fòng-phi.
[32] Hi chhióng kì-têu ke lo̍k-thò lâu só-yû ke ngiù-khiùn! Ngài oi chiông ke-têu siû-chién thèu-nà-mô lòi chûn-kin sṳ̀n-mìn ke ngìn kiuk-san to si-fông hi; Ngài oi tui si chû-vì tai châi-nan pûn kì-têu.
[33] Ha-só-sàng voi yún-yén fông-fi, sàng-cho yâ-kiéu ke teu, mò-ngìn he̍t. Ngài — Song-chú án-ngiòng siên-pu lé.”
[34] Sî-tí-kâ cho Yù-thai-vòng ke chhû-khì, Song-chú — Van-kiûn ke Ngièn-soi lâu siên-tî Yâ-li-mí kóng-hí yû-koân Yî-làn ke sṳ.
[35] Kì kóng: “Ngài oi áu-thôn Yî-làn chui chú-yeu ke sṳ-li̍t — kiûng-chien.
[36] Ngài oi sṳ́ fûng tui si-mien pat-fông hi kûng-kit Yî-làn, chiông kì ke chṳ́-mìn kiuk-san to kok-thi, kok-koet chhiòn-phu voi yû kì ke nan-mìn hi-to.
[37] Ngài oi sṳ́ Yî-làn-ngìn kiâng ke-têu sióng-oi chhṳ̀ kì-têu ke thi̍t-ngìn. Ngài — Song-chú oi thai fat-khién kong châi-fo pûn Yî-làn-ngìn, yung chan-chên chha̍t-tái sêu-me̍t kì-têu.
[38] Ngài — Song-chú oi chhù-me̍t kì-têu ke kiûn-vòng lâu kôn-chóng, chhai Yî-làn kien-li̍p Ngài ke pó-chho.
[39] Chúng-he yû yit-ngit, Ngài oi pûn Yî-làn-ngìn chón-hi, chhùng-chṳ́n kâ-yèn. Ngài — Song-chú án-ngiòng siên-pu lé.”