[1] Song-chú kóng: “Yù-thai ke ngìn-mìn â, ngì-têu ke chhui he yung thiet-pit, yung kîm-kông-chon khat chhai ngì-têu ke sîm-tú lâu ngì-têu ke chi-thàn kok mien-táng.
[2] Lièn ngì-têu ke chṳ́-ńg ya chhai koet-nui ke thai-su hâ, kô-sân táng vi ńg-sṳ̀n Â-sa-lâ hí chi-thàn lâu chhû-siong.
[3] Yîn-vi ngì-têu chhai chhiòn-koet tak só-chhai fam-chhui, Ngài oi chiông Ngài thièn-yâ ke sân, ngì-têu ke chhòi-sán, yit-chhiet pó-vu̍t, kâu-pûn thi̍t-ngìn chhióng-chéu.
[4] Ngì-têu yit-thin voi sṳt-thet Ngài su-pûn ngì-têu ke thú-thi; Ngài oi chiông ngì-têu kiuk-to sâng-fun ke só-chhai hi cho thi̍t-ngìn ke nù-chhòi. Yîn-vi Ngì-têu ngiâ Ngài fat-khién, sṳ́ Ngài ke fó tông-chho̍k, to yún-yén m̀-voi vû-thet.”
[5] Song-chú kóng: Sin-lai sṳ-kiên ngìn, yí-sṳ ngìn hiet-ngiuk ke li̍t-liong, kì ke sîm lì-khôi Ngài — Song-chú ke ngìn, liá-chúng ngìn yin-kôi su chu-chú.
[6] Kì chhiong sâ-mo̍k chûng ke ái-su: Sâng chhai châu-hôn ke khóng-yâ, chhai fông-liòng ke yàm-thi; khon m̀-tó fàn-yùng ke sṳ̀-chiet lòi-to.
[7] Chôn-sîm sin-kho Ngài — Song-chú ke, liá-chúng ngìn ngióng-pân yû fuk-hi!
[8] Kì chhiong chung chhai hò-pa sùn ke su: Su-kîn chhûn-tó hò-pa, m̀-kiâng ngie̍t-hi, ya m̀-kiâng châu-hôn, su-ya̍p ngiùng-ngiùng, tá-chṳ́ mò-thìn.
[9] Ngìn-sîm pí van-vu̍t kúi-cha, fái-to mò-hó yî; má-ngìn khon tet-theu nè?
[10] Ngài — Song-chú kam-chhat ngìn ke sîm-chhòng, sṳ-ngiam ngìn ke sîm-yi; Ngài cheu tak-sà ke hàng-vì lâu kì yin-kôi su ke po-yin kì.
[11] Yung mò chṳn-tông ke sú-thon fat-chhòi ke ngìn, chhiong yit-chak phu̍k-kû-é phu m̀-he chhṳ-kâ sâng ke lón. Kì voi chhai chûng-ngièn sṳt-thet chhòi-fu; to-mî sàng-cho ngong-é.
[12] Ngài-têu ke sṳn-thien he Song-chú yùng-yeu ke pó-chho, yit khôi-sṳ́ chhiu hí chhai kô-sân táng.
[13] Song-chú â, Ngì he Yî-set-lie̍t ke phan-mong; lì-khôi Ngì ke ngìn chhiòn-phu voi kien-seu. Phoi-ngia̍k Ngì ke ngìn, kì-têu voi chin-ngi̍p yîm-kiên, yîn-vi kì-têu lì-khôi Song-chú — sâng-miang súi ke ngièn-thèu.
[14] Song-chú â, khiù Ngì yî ngài, ngài chhiu voi hó; khiù Ngì kiu ngài, ngài chhiu voi tet-kiu. Ngì he ngài oi siung-chan ke.
[15] Khon â, ngìn lâu ngài kóng: “Song-chú ke fa chhai nai-vi? Cho kì lòi sṳ̍t-hien â!”
[16] Song-ti â, ngài chhiùng-lòi m̀-sṳt khiù Ngì kong châi-fo chhai kì-têu sṳ̂n-song, ya mò hî-mong châi-nan ke ngit-è lòi-to. Liá he Ngì só-tî ke; Ngì mìn-pha̍k ngài kóng ke fa.
[17] Khiù Ngì m̀-hó pûn ngài chho̍k-kiâng, yîn-vi Ngì he ngài tù-tó châi-nan sṳ̀ vì-yit ke phit-nan-só.
[18] Khiù Ngì sṳ́ pet-hoi ngài ke ngìn kien-seu, m̀-hó pûn ngài kien-seu; khiù Ngì sṳ́ kì-têu chho̍k-kiâng, m̀-hó pûn ngài chho̍k-kiâng. Khiù Ngì sṳ́ kì-têu tù-tó châi-nan, chha̍t-tái sêu-me̍t kì-têu.
[19] Song-chú tui ngài án-ngiòng kóng: “Yâ-li-mí â, ngì to Yù-thai ke kiûn-vòng chhut-ngi̍p Yâ-lu-sat-lâng ke ‘Ngìn-mìn Mùn’ hi, ya khî chhai Yâ-lu-sat-lâng tak-ke sàng-mùn héu,
[20] tui kì-têu kóng: ‘Yù-thai ke kiûn-vòng, ngìn-mìn, lâu só-yû chhut-ngi̍p Yâ-lu-sat-lâng liá-têu sàng-mùn ke ngìn â! Ngì-têu oi thâng Song-chú ke fa.
[21] Song-chú án-ngiòng kóng: Vi-tó chhṳ-kâ ke sâng-miang, ngì-têu oi se-ngi ô! Cho-m̀-tet chhai ôn-sit-ngit pân tûng-sî, cho-m̀-tet pân-yun tûng-sî ngi̍p Yâ-lu-sat-lâng ke sàng-mùn.
[22] Cho-m̀-tet chhai ôn-sit-ngit pân tûng-sî chhut-mùn, cho-m̀-tet cho-se. Ngì-têu oi chûn-hàng Ngài pûn ngì-têu chú-siên ke kie-min, sú ôn-sit-ngit cho sṳn-ngit.’
[23] Kì-têu ke chú-siên m̀ tân-chhiang m̀ chu-yi thâng, fán-chón ngang-kiáng m̀-hén thâng, m̀-hén chiap-su kón-kau.”
[24] Song-chú kóng: “Ngì-têu oi fu̍k-chhiùng Ngài. Mo̍k chhai ôn-sit-ngit pân-yun tûng-sî ngi̍p liá-sàng. Sú ôn-sit-ngit cho sṳn-ngit; m̀ cho yit-chhiet ke sṳ.
[25] Án-ngiòng, chhô Thai-ví vòng-vi ke kiûn-vòng lâu ke-têu liâng-chhiu chhiu nèn chhô chan-chhâ ya-he khì-mâ ngi̍p Yâ-lu-sat-lâng ke sàng-mùn. Kì-têu lâu Yù-thai ke ngìn-mìn, pin só-yû he̍t chhai Yâ-lu-sat-lâng ke ngìn voi khiung-ha ngi̍p-sàng. Liá-sàng yún-yén voi yû-ngìn he̍t.
[26] Ngìn-mìn voi tui Yù-thai ke tak sàng-sṳ, Yâ-lu-sat-lâng chû-vì tak chhûn-chông, Phien-ngâ-mén thi-khî, sî-phién ke kô-ngièn, sân-thi, lâu Yù-thai ke nàm-phu, lòi Yâ-lu-sat-lâng. Kì-têu voi tai-tén sêu-fa-chi, sên-ngì, su-chi, nen-hiông, lâu kám-ên chi lòi-to Ngài — Song-chú ke sṳn-thien.
[27] Chúng-he, ngì-têu na m̀ thâng-chhiùng Ngài ke min-lin, m̀ sú ôn-sit-ngit cho sṳn-ngit, chhai ôn-sit-ngit pân-yun tûng-sî ngi̍p Yâ-lu-sat-lâng ke sàng-mùn, Ngài chhiu chhai kok sàng-mùn tiám-fó; fó voi chiông Yâ-lu-sat-lâng ke vòng-kiûng sêu-thet, mò-ngìn yû phan-fap tá-vû.”