[1] Yâ-li-mí pûn Nì-pu-kap-nì-sat ke sṳ-ví-chóng Nì-pu-sat-lâ-tan chhai Lâ-mâ piong-thet yî-heu, Song-chú tui kì kóng-fa. Yâ-li-mí sṳt pûn lien-é só-tén, lâu só-yû pûn-ngìn chok-to Pâ-pí-lùn hi ke Yâ-lu-sat-lâng pin Yù-thai ngìn-mìn khiung-ha pûn-ngìn tai-to Lâ-mâ.
[2] Sṳ-ví-chóng chiông Yâ-li-mí ham-to sùn-thèu, tui kì kóng: “Song-chú — ngì ke Song-ti siên-pu oi fí-me̍t liá só-chhai,
[3] liá-ha Song-chú yí-kîn cheu Kì só kóng ke cho, sṳ́ châi-fo lìm-to lé; yîn-vi ngì-têu tet-chhui Song-chú, m̀ thâng-chhiùng Kì ke min-lin.
[4] Liá-ha ngài kié-khôi ngì sú-hong ke só-lien, pûn ngì chhṳ-yù. Na-he ngì sióng-oi hi Pâ-pí-lùn, cho-tet lâu ngài khiung-ha lòi-hi, ngài voi hó-hó cheu-ku ngì. Na-he ngì m̀ sióng-oi hi, chhiu m̀-sṳ́ hi. Chhiòn-thi lûng-chúng chhai ngì mien-chhièn, ngì khon má-ke só-chhai kha-hó, chhiu cho ngì hi!”
[5] Yâ-li-mí hàn-màng en kì, Nì-pu-sat-lâ-tan yu kóng: “Ngì chón-to Sâ-fân ke sûn-é, Â-hî-kâm ke lai-é Kî-thai-li ke-vi hi kha-hó! Pâ-pí-lùn-vòng yí-kîn chṳ́-phai kì cho Yù-thai thi-khî ke-têu sàng-sṳ ke chúng-tuk. Ngì cho-tet liù chhai kì ke-vi, he̍t chhai ngì thùng-pâu tông-chûng. Na-he ngì fôn-hí to phe̍t ke só-chhai, ya cho-tet sùi ngì ke yi-sṳ hi.” Sṳ-ví-chóng chhiu sung Yâ-li-mí lî-vu̍t lâu liòng-sṳ̍t, piong kì chéu.
[6] Yâ-li-mí chhiu to Mí-sṳ̂-pâ hi chhìm Â-hî-kâm ke lai-é Kî-thai-li, lâu kì pin liù chhai ke thi-fông ke thùng-pâu khiung-ha he̍t.
[7] Ke-têu mò thèu-hòng ke Yù-thai kôn-yèn lâu sṳ-pîn thâng-tó Pâ-pí-lùn-vòng chṳ́-phai Â-hî-kâm ke lai-é Kî-thai-li cho Yù-thai thi-khî ke chúng-tuk, kón-lî mò pûn-ngìn chok-to Pâ-pí-lùn hi ke nàm-ngìn, fu-ńg, se-ngìn-è, chhiu-he ke-têu chui khiùng-khú ke ngìn.
[8] Só-yî liá-têu kôn-yèn — pâu-hàm Nì-tham-ngâ ke lai-é Yî-sṳ̍t-mâ-li, Kâ-li-â lióng-ke lai-é Yok-ha̍p-nàn lâu Yok-nâ-tân, Tân-fu-me̍t ke lai-é Sî-lòi-ngâ, Nì-thò-fap-ngìn Yî-fî ke-têu lai-é, lâu Mâ-kâ-ngìn Yâ-sat-nì-â — tai-liâng phu-ha to Mí-sṳ̂-pâ hi kien Kî-thai-li.
[9] Sâ-fân ke sûn-é, Â-hî-kâm ke lai-é Kî-thai-li hiong kì-têu pó-chṳn kóng: “Ngì-têu m̀-sṳ́ kiâng oi fu̍k-sṳ Pâ-pí-lùn-ngìn; cho ngì-têu he̍t chhai liá-vi, fu̍k-sṳ Pâ-pí-lùn-vòng, chhiu voi phìn-ôn mò-sṳ.
[10] Ngài oi chhîn-sṳ̂n liù chhai Mí-sṳ̂-pâ; Pâ-pí-lùn-ngìn lòi ke sṳ̀, ngài voi cho ngì-têu ke thoi-péu. Ngì-têu cho-tet sû-chhùn chiú, ngie̍t-thiên ke kó-chṳ́, kám-lám-yù, he̍t chhai ngì-têu só-cham ke sàng-chṳ́n.”
[11] Liá-sṳ̀, chéu-to Mô-ap, Â-mùn, Yî-tûng, lâu khì-thâ tak só-chhai yit-chhiet ke Yù-thai-ngìn, thâng-kóng Pâ-pí-lùn-vòng chún chhûn-tó ke Yù-thai-ngìn he̍t chhai Yù-thai thi-khî, pin sat-li̍p Sâ-fân ke sûn-é, Â-hî-kâm ke lai-é Kî-thai-li cho kì-têu ke chúng-tuk,
[12] thai-kâ chhiu tui thò-nan ke tak só-chhai, chón-to Yù-thai thi-khî. Kì-têu to Mí-sṳ̂-pâ hi kien Kî-thai-li, yu chhai Yù-thai sû chhin-tô chiú lâu ngie̍t-thiên ke kó-chṳ́.
[13] Liá-sṳ yî-heu, Kâ-li-â ke lai-é Yok-ha̍p-nàn lâu mò thèu-hòng ke kiûn-chhui chṳ́-fî-kôn to Mí-sṳ̂-pâ hi kien Kî-thai-li,
[14] lâu kì kóng: “Ngì tî Â-mùn-ngìn ke vòng Pâ-li-sṳ̂ phai Nì-tham-ngâ ke lai-é Yî-sṳ̍t-mâ-li lòi am-sat ngì mâ?” Â-hî-kâm ke lai-é Kî-thai-li m̀ siông-sin liá-ke fa.
[15] Heu-lòi, Kâ-li-â ke lai-é Yok-ha̍p-nàn chhai Mí-sṳ̂-pâ am-chûng lâu Kî-thai-li kóng: “Chhiáng chún ngài hi chiông Nì-tham-ngâ ke lai-é Yî-sṳ̍t-mâ-li chhṳ̀-thet, mò ngìn voi tî he má-ngìn cho ke. Ngióng-hó yù-chhai kì am-sat ngì nè? Na-he ngì pûn-ngìn chhṳ̀-sí, chhai ngì chû-vì ke ngìn voi san thet-hi; chhûn-tó ke Yù-thai ngìn-mìn chhiòn-phu voi me̍t-mòng.”
[16] Chúng-he Â-hî-kâm ke lai-é Kî-thai-li tui Kâ-li-â ke lai-é Yok-ha̍p-nàn kóng: “Ngài m̀-chún ngì án-ngiòng cho. Ngì yên-vóng Yî-sṳ̍t-mâ-li lé!”