[1] Ngien ngài ke thèu-nà he súi-chiáng, muk-chû he muk-chṳp ke chhièn-ngièn! Ngài cho-tet ngit-ya vi pûn-ngìn chhṳ̀-sí ke thùng-pâu lòi-kieu.
[2] Ngien ngài chhai khóng-yâ yû chhut-ngoi ngìn hiet-khun ke só-chhai, sṳ́ ngài cho-tet yén-yén phit-khôi thùng-pâu. Yîn-vi kì-têu chhiòn-he hàng kiên-yìm, he chhiòn-mò chûng-sîm ke yit-khiùn.
[3] Kì-têu ke sa̍t-mà vân-lòi vân-hi chhiong kiûng yit-yong, kì-têu sùi-sṳ̀ kóng fâ-liâu chhiong sa-chien khiung-yong; kì-têu tet-tó khièn-sṳ m̀-he kho kóng chṳ̂n-sṳ̍t fa, vàn-chhiòn he yung phien ke. Song-chú kóng: “Ngài ke chṳ́-mìn chhòng-theu cho fái-sṳ, kîn-pún m̀ ngin-sṳt Ngài.”
[4] Tak-ke ngìn chhiòn-phu oi thì-fòng chhîn-yû, chhîn hiûng-thi ya sin-yung m̀-tet; yîn-vi hiûng-thi chhiòn-phu lâu Ngâ-kok khiung-yong án kúi-cha, phèn-yû lòi-vông chhiòn-phu pân-nung sṳ-fî.
[5] Tak-sà phien phèn-yû; mò-ngìn kóng ló-sṳ̍t fa; kì-têu kâu ngìn kóng fâ-liâu. Kì-têu yit-chhṳ̍t fam-chhui, khioi to m̀-tî oi fí-kói;
[6] kì-têu yit-ngit to-am cha-khî ngìn, khî-fu ngìn. Song-chú kóng: “Kì-têu kîn-pún m̀-hén sṳ̀n-ngin Ngài.”
[7] Só-yî, Song-chú — Van-kiûn ke Ngièn-soi án-ngiòng kóng: “Khon â, Ngài oi thon-lien Ngài ke chṳ́-mìn, kháu-ngiam kì-têu. Ngài ke chṳ́-mìn cho án-fái ke sṳ, na-mò chit-phi kì-têu, ngióng cho-tet nè?
[8] Kì-têu ke sa̍t-mà chhiong chhṳ̀-ngìn ke li-chien; kì-têu kín-kóng fâ-sa̍t. Tak-sà tui lìn-sa choi kóng phìn-ôn ke fa, chúng-he sîm-tú sat-kie oi ham-hoi kì.
[9] Ngài ngióng cho-tet mò vi liá-têu sṳ lòi chit-fa̍t kì-têu nè? Ngài ngióng cho-tet mò po-yin chhiong án-ngiòng ke koet-kâ nè?”
[10] Ngài kóng: Ngài oi vi sân lòi pî-ôi thai-kieu, vi khóng-yâ ke chhó-phû chhong pî-sông ke kô; yîn-vi kì-têu sêu-to kông-kông, mò-ngìn kîn-ko, ya thâng m̀-tó ngiù-yòng ke sâng-yîm, lièn fî-niâu yâ-chhu chhiòn-phu chéu chhiang-chhiang.
[11] Song-chú kóng: Ngài oi sṳ́ Yâ-lu-sat-lâng pien-cho lon-sa̍k-tôi, sàng-cho yâ-kiéu ke teu; Ngài oi sṳ́ Yù-thai ke sàng-chṳ́n fông-fi, m̀-voi chai yû-ngìn he̍t.
[12] Ngài mun: “Song-chú â, cho-má-ke liá thú-thi voi fông-fi, chhiong sâ-mo̍k án châu-hôn, mò-ngìn kîn-ko nè? Má-ngìn yû án chhûng-mìn, voi mìn-pha̍k liá tho-lî nè? Ngì sṳt hiong má-ngìn sot-mìn, sṳ́ kì voi hiong phe̍t-ngìn kié-sṳt liá tho-lî nè?”
[13] Song-chú en-kóng: “Liá he yîn-vi Ngài ke chṳ́-mìn vok-thet Ngài vi kì-têu sat-li̍p ke kau-hiun, m̀ thâng-chhiùng Ngài ke fa, m̀ sṳ̍t-hàng Ngài ke min-lin.
[14] Kì-têu tông ngang-kiáng, khiòng-khiòng oi thèn chú-siên só-kâu ke hi pai chung Pâ-li̍t.
[15] Só-yî, Ngài — Song-chú, Van-kiûn ke Ngièn-soi, Yî-set-lie̍t ke Song-ti án-ngiòng siên-pu: Ngài oi sṳ́ liá chṳ́-mìn sṳ̍t khú-kó, lîm thu̍k-súi.
[16] Ngài oi chiông kì-têu fûn-san to kok-koet, to kì-têu lâu chú-siên chhiòn m̀-sṳt thâng-ko ke só-chhai hi. Ngài oi sṳ́ thi̍t-ngìn kiuk kì-têu, chiông kì-têu chhiòn-phu chhṳ̀-sí.”
[17] Song-chú — Van-kiûn ke Ngièn-soi án-ngiòng kóng: Ngì-têu oi sióng khon-é: Oi chhiáng thoi ngìn kieu ke fu-ngìn-kâ lòi-kieu, chhiáng chôn-mùn chhong ôi-kô ke se-moi-é lòi-chhong.
[18] Ngìn-mìn kóng: Oi chhûi kì-têu kiak-kiak lòi vi ngài-têu chhong ôi-kô, chhong to ngài-têu thai-kieu, muk-chṳp sûng-liù!
[19] Siak-ôn-sàng chhòn-chhut ôi-sông ke sâng kóng: Ngióng-voi án lau-khui! Ngióng-voi án kien-seu! Ngài-têu mò lì-khôi kâ-hiông cho-m̀-tet; ngài-têu ke vuk pûn-ngìn chhak-thet lé.
[20] Ngài kóng: Fu-ngìn-kâ â, oi thâng Song-chú ke fa; ngì-têu oi chu-yi thâng Kì ke fa. Oi kâu ngì-têu ke moi-é ngióng-pân kieu, tak-sà oi fu-siông ho̍k-chhong ôi-kô.
[21] Sí-mòng tui chhûng-mùn phà ngi̍p-lòi, chin-ngi̍p ngài-têu ke sàng-pó; sí-mòng tá-vang kiê-lu ke se-ngìn-è, sêu-me̍t kóng-chhòng ke heu-sâng-ngìn.
[22] Mân-phien vang-tén sṳ̂-thí, chhiong thièn-yâ ke pun-tôi, yu chhiong kot tiet-thet ke ma̍k-chhon, mò-ngìn lòi ngiâm. Song-chú min-lin ngài án-ngiòng siên-pu lé.
[23] Song-chú án-ngiòng kóng: Chhûng-mìn-ngìn m̀-hó khoâ-khiéu chhṳ-kâ ke chhûng-mìn; yúng-sṳ m̀-hó khoâ-khiéu chhṳ-kâ ke yúng-hi; yû-chhièn ngìn m̀-hó khoâ-khiéu chhṳ-kâ ke chhièn-chhòi.
[24] Ngìn na-oi khoâ-khiéu, yin-kôi khoâ-khiéu liáu-kié Ngài, ngin-sṳt Ngài; yîn-vi Ngài he Song-chú, Ngài sṳ̍t-hàng put-pien ke chhṳ̀-oi. Chhai sṳ-kiên Ngài chṳp-hàng kûng-phìn, sṳ̂n-chông chṳn-ngi; yîn-vi liá-têu sṳ he Ngài só fôn-hí ke. Ngài — Song-chú án-ngiòng siên-pu lé.
[25] Song-chú kóng: “Khon â, ngit-è voi to lé! Ngài oi chit-fa̍t só-yû tân-tân ngiuk-thí su kot-lî, chúng-he sîm-lìn mò su kot-lî ke ngìn:
[26] Chhiu-he Âi-khi̍p-ngìn, Yù-thai-ngìn, Yî-tûng-ngìn, Â-mùn-ngìn, Mô-ap-ngìn, lâu ke-têu he̍t chhai khóng-yâ thi-thet thèu-nà chû-vì ke thèu-nà-mô ke mìn-chhu̍k. Yîn-vi kok-koet ke ngìn sûi-yèn ngiuk-thí tû su kot-lî, chúng-he kì-têu lâu Yî-set-lie̍t-ngìn ke sîm-lìn ya chhiòn-phu mò su kot-lî, mò chûn-sú kot-lî só siong-chṳ̂n ke yok.”