[1] Song-chú kóng: “To ke-ngit, thi̍t-ngìn voi chiông Yù-thai ke vòng, kôn-chóng, chi-sṳ̂, siên-tî, lâu Yâ-lu-sat-lâng ngìn-mìn ke kut-hài, chhiòn-phu tui fùn-mu tú yet chhut-lòi,
[2] pài chhai ngit-thèu, ngie̍t-kông, lâu sên-é hâ-poi. Liá-têu thiên-thí chhiu-he kì-têu sên-chhièn só oi-mu, fu̍k-sṳ, thèn-chhiùng, puk-koa, kin-pai ke. Liá-têu kut-hài mò-ngìn voi hi sû-si̍p hí-lòi mài-thet, chhiòn-phu voi pien-cho thi-mien song ke lá-sap.
[3] Liá-chak sià-ok mìn-chhu̍k chhûn-tó ke ngìn voi chhai Ngài fûn-san kì-têu hi ke só-chhai, khiù-sí m̀ khiù-sâng. Ngài — Song-chú, Van-kiûn ke Ngièn-soi án-ngiòng siên-pu lé.”
[4] Song-chú fûn-fu ngài hiong Kì ke chṳ́-mìn án-ngiòng kóng: “Ngìn tiet-tó, kám mò sióng-oi hong-hí-lòi? Ngìn hàng chhâ-lu, kám mò sióng-oi fì-thèu?
[5] Ngì liá-têu Yâ-lu-sat-lâng-ngìn â, ngì-têu cho-má-ke phoi-ngia̍k to-tái nè? Ngì-têu yit-chhṳ̍t hàng kúi-cha, m̀-hén chón-to Ngài liá-vi lòi.
[6] Ngài tông chu-yi thâng, chúng-he ngì-têu mò kóng ló-sṳ̍t fa. Mò-ngìn vi chhṳ-kâ ke fái hàng-vì fí-kói; mò-ngìn chhṳ-kâ fán-sén kóng: ‘Ngài to-tái cho má-ke m̀-chho̍k?’ Tak-sà ngìn cheu chhṳ-kâ ke yi-sṳ hi-cho, chhiu-chhiong mâ-é chéu-tén hi chan-chhòng.
[7] Lièn khûng-chûng ke kon-niâu tû tî lòi-hi ke chiet-khì, thin-khì pî chón-lòi; pân-kiêu, yen-é, pha̍k-ho̍k-é ya chhiòn-phu cheu sṳ̀-chiet chhiên-sái. Chúng-he Ngài ke chṳ́-mìn â, ngì-têu phiên-phiên m̀-tî Ngài ke fap-chet!
[8] Ngì-têu ngióng cho-tet chhṳ-khoâ chhûng-mìn, kóng ngì-têu mìn-pha̍k Ngài ke fap-li̍t nè? Khì-sṳ̍t, Ngài ke fap-li̍t yí-kîn pûn kúi-cha ke kîn-ho̍k kau-sṳ̂ kói-cho ká ke fap-li̍t lé.
[9] Ngì-têu ke chhûng-mìn ngìn voi tù-tó kien-seu, kiâng-to pi̍t-pi̍t-chhat, pûn-ngìn chok-tó. Kì-têu khî-chhie̍t Ngài ke fa, hàn-yû má-ke chṳ-fi hó-kóng nè?
[10] Só-yî, Ngài oi chiông kì-têu ke pû-ngiòng sung-pûn phe̍t-ngìn, thièn-thi ya kâu-pûn sîn ke chú-ngìn; yîn-vi kì-têu mò-lun thi-vi kô-tâi chhiòn-phu thâm put-ngi ke chhièn-chhòi, lièn siên-tî lâu chi-sṳ̂ ya chhiòn-phu cha-khî ngìn-mìn.
[11] Ngài chṳ́-mìn ke chho̍k-sông, kì-têu ya mò ngin-chṳ̂n yî-chhṳ. Kì-têu kóng: ‘Phìn-ôn! Phìn-ôn!’ Khì-sṳ̍t mò phìn-ôn.
[12] Kì-têu cho án tet-ngìn-nâu ke sṳ yin-tông tî kien-seu, chúng-he kì-têu m̀-tî kien-seu, ya m̀-voi mien-fùng. Só-yî, kì-têu voi lâu phe̍t-ngìn khiung-yong tiet-tó. Ngài chit-fa̍t kì-têu ke sṳ̀, kì-têu chhiu voi vang-to tap-tap. Ngài — Song-chú án-ngiòng siên-pu lé.”
[13] Song-chú kóng: “Ngài oi chiông kì-têu só-yû ke chhiòn-phu chhióng-chéu, kâu-pûn ke-têu lòi cham-liâng liá thi-fông ke ngìn; to-mî, phù-thò-su táng m̀-voi yû phù-thò, vù-fâ-kó-su táng ya m̀-voi yû vù-fâ-kó, lièn ya̍p-é ya chhiòn-phu châu-thet.”
[14] Song-ti ke chṳ́-mìn mun: “Ngài-têu cho-má-ke hàn chhô-tén m̀ thîn-thûng nè? Hong-hí-lòi, ngi̍p-lòi hi fòng-ví ke sàng, chhiu-he sí chhai ke-vi ya hó! Song-chú — ngài-têu ke Song-ti yí-kîn thin ngài-têu sí-chhui. Kì pûn ngài-têu thu̍k-súi lîm, yîn-vi ngài-têu tet-chhui Kì.
[15] Ngài-têu khì-thai phìn-ôn, hî-mong tet-tó yî-chhṳ, chúng-he mò háu-kó, fán-chón hak-to voi sí.
[16] Thi̍t-ngìn yí-kîn to Tan, ngài-têu thâng-tó chan-mâ phun-hi. Chan-mâ thai-sâng sê, chhiòn-thi thai chṳ́n-thung. Thi̍t-ngìn voi lòi tá-fái ngài-têu ke thú-thi lâu thi-song ke yit-chhiet; kì-têu voi lòi sêu-me̍t ngài-têu ke sàng-sṳ lâu he̍t chhai khì-chûng ke ngìn-mìn.”
[17] Song-chú kóng: “Khon â, Ngài oi chiông thu̍k-sà piong chhai ngì-têu tông-chûng, yung fap-su̍t ya kiuk kì-têu m̀-chéu; kì-têu voi ngâu ngì-têu.”
[18] Ngài ke sîm fî-sòng pî-sông, mò fap-thu yî-hó, chhiong voi fûn-thet yit-yong.
[19] Ngài yén-yén chhiu thâng-tó thùng-pâu pî-sông ke sâng kóng: “Song-chú mò chhai Siak-ôn he-mò? Siak-ôn ke vòng mò chhai sàng-tú he-mò?” Song-chú kóng: “Kì-têu cho-má-ke pai ngiéu-siong? Cho-má-ke pai ngoi-koet hî-ká ke sṳ̀n-mìn, lòi-ngiâ Ngài fat-khién nè?”
[20] Ngìn-mìn kóng: “Ngie̍t-thiên ko-thet, sû-sṳ̀n kiet-suk lé, ngài-têu hàn-he màng tet-kiu!”
[21] Yâ-li-mí kóng: Thùng-pâu su sông-hoi, ngài ya su sông-hoi; ngài fî-sòng pî-sông, chho̍k-kiâng to voi sí.
[22] Kám-kóng Kî-lie̍t mò kò-yo̍k he-mò? Kám-kóng ke-vi mò yî-sên he-mò? Cho-má-ke ngài ke thùng-pâu mò tet-tó yî-chhṳ nè?