[1] Song-chú — kì-têu ke Song-ti phai Yâ-li-mí lâu kì-têu kóng ke yit-chhiet fa, Yâ-li-mí hiong só-yû ke ngìn-mìn yit kóng-so̍t,
[2] Hò-sâ-ngâ ke lai-é Â-sat-li-ngâ, Kâ-li-â ke lai-é Yok-ha̍p-nàn, pin só-yû kiêu-ngau ke ngìn chhiu tui Yâ-li-mí kóng: “Ngì kóng fâ-liâu! Song-chú — ngài-têu ke Song-ti pin mò phai ngì lòi kóng: ‘Ngì-têu cho-m̀-tet hi Âi-khi̍p he̍t.’
[3] Liá he Nì-li-â ke lai-é Pâ-liu̍k san-thung ngì chhut-lòi fán-tui ngài-têu, oi chiông ngài-têu kâu-pûn Pâ-pí-lùn-ngìn ke sú-chûng, yù-chhai kì-têu chhṳ̀, ya-he chiông ngài-têu chok-to Pâ-pí-lùn hi.”
[4] Só-yî, Kâ-li-â ke lai-é Yok-ha̍p-nàn, só-yû ke kiûn-kôn, lâu khì-thâ ke ngìn chhiòn-phu m̀-hén thâng-chhiùng Song-chú ham kì-têu he̍t chhai Yù-thai thi-khî ke min-lin.
[5] Kâ-li-â ke lai-é Yok-ha̍p-nàn lâu só-yû ke kiûn-kôn chiông chhûn-tó ke Yù-thai-ngìn, chhiu-he tui kok-koet chón-lòi ke nan-mìn chhiòn-phu tai-to Âi-khi̍p hi;
[6] khì-chûng pâu-hàm nàm-ńg, se-ngìn-è, lâu ke-têu kûng-chú. Kì-têu ya chiông sṳ-ví-chóng Nì-pu-sat-lâ-tan liù-pûn Sâ-fân ke sûn-é, Â-hî-kâm ke lai-é Kî-thai-li kón-lî ke chung-ngìn, lâu siên-tî Yâ-li-mí, pin Nì-li-â ke lai-é Pâ-liu̍k, chhiòn-phu tai-chéu.
[7] Kì-têu m̀ thâng-chhiùng Song-chú ke min-lin, chhiu ngi̍p-hi Âi-khi̍p, to Tap-pí-ni̍t.
[8] Chhai Tap-pí-ni̍t, Song-chú tui Yâ-li-mí kóng:
[9] “Ngì oi chhai Yù-thai-ngìn mien-chhièn, pân-têu thai sa̍k-thèu lòi, mài chhai Tap-pí-ni̍t vòng-kiûng mùn-chhièn kóng-chhòng ke thi-nài-hâ.
[10] Yèn-heu hiong thai-kâ kóng: ‘Ngài — Song-chú, Van-kiûn ke Ngièn-soi, Yî-set-lie̍t ke Song-ti án-ngiòng kóng: Ngài oi tai Ngài ke phu̍k-ngìn Pâ-pí-lùn-vòng Nì-pu-kap-nì-sat to liá-vi lòi. Ngài oi chhai só mài ke sa̍k-thèu táng, ôn kì ke pó-chho; kì oi tap thiên-phùng khièm-tén pó-chho.
[11] Nì-pu-kap-nì-sat voi lòi kûng-tá Âi-khi̍p. Ke-têu kôi-tông phiang-sí ke, voi phiang-sí; ke-têu kôi-tông pûn-ngìn chok-chéu ke, voi pûn-ngìn chok-chéu; ke-têu kôi-tông pûn tô-é chhṳ̀ ke, voi pûn tô-é chhṳ̀.
[12] Ngài oi piong-fó sêu-thet Âi-khi̍p ke-têu sṳ̀n-meu — Pâ-pí-lùn-vòng voi sêu-thet kì-têu ke sṳ̀n-meu, chiông sṳ̀n-siong chhióng-chéu. Kì oi so-chhiang Âi-khi̍p-thi, chhiu-chhiong mu̍k-ngìn pha̍t-chhiang ngoi-sâm ke thiau-cháu, yèn-heu ôn-yèn lì-khôi.
[13] Kì voi tá-sui Âi-khi̍p ngit-thèu sṳ̀n-meu ke sa̍k-chhû, sêu-thet Âi-khi̍p ke sṳ̀n-meu.’ ”