[1] Song-chú án-ngiòng kóng: “To ke-sṳ̀, Ngài oi cho Yî-set-lie̍t tak-chhu̍k ke Song-ti; kì-têu oi cho Ngài ke chṳ́-mìn.
[2] Chhai khóng-yâ, Ngài lìn-mén ke-têu mò pûn tô-kiam chhṳ̀-sí ke ngìn. Chhai Yî-set-lie̍t-ngìn chhin-sióng ôn-sit ke sṳ̀,
[3] Ngài tui yén-yén ke thi-fông hiong kì-têu hién-hien. Yî-set-lie̍t-ngìn â, Ngài yún-yén thung-siak ngì-têu, Ngài hàn oi yung put-pien ke chhṳ̀-oi thung-siak ngì-têu.
[4] Ngài oi chhùng-sîn kien-li̍p ngì-têu. Ngì-têu voi chai nâ-hí lìn-kú, thai-sâng chhong-kô thiau-vú.
[5] Ngì-têu voi chhai Sat-mâ-li-â ke sân-táng chhùng-sîn chung phù-thò; chung ke ngìn voi hióng-su tó yèn-tú ke chhut-sán.
[6] Yû yit-ngit, sú-mong ke ngìn voi chhai Yî-fap-lièn sân-táng thai-sâng hêm: ‘Lòi ô! Ngài-têu to Siak-ôn hi chhèu-kien Song-chú — ngài-têu ke Song-ti.’ ”
[7] Song-chú án-ngiòng kóng: Ngì-têu oi vi Yî-set-lie̍t thai-sâng chhong-kô, vi chui ví-thai ke koet-kâ thai-sâng chhin-hêm, ngì-têu oi chhong siung-chan ke kô kóng: “Song-chú â, khiù Ngì chṳ́n-kiu Ngì ke chṳ́-mìn, chhiu-he Yî-set-lie̍t chhûn-tó ke ngìn-mìn.”
[8] Khon â, Ngài oi tui pet-fông chiông kì-têu tai chón-lòi, tui thiên-ngài hói-kok chiông kì-têu chhi-si̍p hí-lòi. Mô-muk ke, pâi-kiok ke, yû sṳ̂n-hong ke, kiung se-ngìn-è ke, ya chhiòn-phu voi yê-kông tá-chhṳn khiung-ha chón-lòi.
[9] Khon â, Ngài ke chṳ́-mìn voi yit-lu kieu-tén chón-lòi; kì-têu voi thèn-tén Ngài hàng, theu-lu khì-tó. Ngài oi tai kì-têu kîn-ko hâi-súi piên, thu kì-têu hàng phiàng-phiàng ke chhṳ̍t-lu, sṳ́ kì-têu m̀-voi tiet-tó. Ngài he Yî-set-lie̍t ke â-pâ; Yî-fap-lièn he Ngài ke chóng-chṳ́.
[10] Song-chú kóng: Van-koet â, ngì-têu oi chu-yi thâng Ngài ke fa, ngì-têu oi chhai yén-yén ke hói-tó chhòn Ngài ke fa. Ngài kiuk-san Yî-set-lie̍t — Ngài ke chṳ́-mìn, chúng-he Ngài oi chai chhi-si̍p kì-têu; Ngài oi pó-fu kì-têu, chhiong mu̍k-ngìn pó-fu yòng-khiùn.
[11] Ngài oi kiu-su̍k Ngâ-kok ke heu-thoi, tui khiòng-koet sú-chûng chiông kì-têu kiu chhut-lòi.
[12] Kì-têu voi chón-lòi, chhai Siak-ôn sân-táng fôn-hí chhong-kô; kì-têu voi mân-mien fôn-hí, hióng-su Ngài fûng-fu ke ên-fi: Chhiu-he ńg-kuk, sîn-chiú, kám-lám-yù, ngiù-yòng. Kì-têu voi chhiong súi-ngièn chhûng-chiuk ke thièn-yèn; m̀-voi chai sèu má-ke, khiam má-ke.
[13] Ke-sṳ̀, se-moi-é voi fôn-hí thiau-vú; ló-ngìn-kâ lâu heu-sâng-ngìn voi khiung-ha khoai-lo̍k. Ngài oi sṳ́ kì-têu ke pî-sông pien-cho fôn-hí, Ngài oi ôn-ví kì-têu, sṳ́ kì-têu ke yù-sèu pien-cho khoai-lo̍k.
[14] Ngài oi sṳ́ ke-têu chi-sṳ̂ yû fûng-chiuk ke sṳ̍t-vu̍t, sîm-mân yi-chiuk; Ngài oi sṳ́ Ngài ke chṳ́-mìn chhiòn mò khiam-khiet. Ngài — Song-chú án-ngiòng siên-pu lé.
[15] Song-chú án-ngiòng kóng: Chhai Lâ-mâ yû thâng-tó ve-thiên ve-thi ke kieu-sâng; he Lùi-kiet vi kì ke chṳ́-ńg thai-kieu, m̀-hén chiap-su ôn-ví, yîn-vi kì-têu chhiòn-phu mò-thet-hi lé.
[16] Song-chú án-ngiòng kóng: M̀-hó kieu lé! Chhu̍t-châu muk-chṳp! Ngì ke sîn-khú voi tet-tó po-sóng; kì-têu voi tui thi̍t-ngìn ke koet-kâ chón-lòi.
[17] Ngì ke chhièn-thù chhûng-mân hî-mong; ngì ke chṳ́-ńg voi chón-lòi ku-hiông. Ngài — Song-chú án-ngiòng siên-pu lé.
[18] Ngài thâng-tó Yî-fap-lièn pî-sông kóng: Song-chú â, ngài-têu chhiu-chhiong màng kâu-koâi ke se ngiù-kú, chúng-he Ngì hiun-lien ngài-têu, sṳ́ ngài-têu sun-fu̍k. Khiù Ngì tai ngài-têu chón-lòi, ngài-têu oi kûi-hiong Ngì, yîn-vi Ngì he Song-chú — ngài-têu ke Song-ti.
[19] Sûi-yèn ngài-têu phoi-ngia̍k lì-khôi Ngì, ngài-têu chit-sṳ̀ chhiu sióng-oi fì-thèu. Ngì ke kón-kau sṳ́ ngài-têu heu-fí, pî-sông to chhùi sîm-kôn; ngài-têu yîn-vi heu-sâng sṳ̀ ke chhui kám-kok chhin kien-seu, su-tó vú-yu̍k.
[20] Song-chú kóng: Yî-fap-lièn â, Ngì he Ngài chui-siak ke lai-é, he Ngài ke sîm-kôn pó-pi. Ngài tak-pái chit-phi ngì, hàn-he chhin ku-ngiam ngì. Ngài siak ngì siak ngi̍p-kut; Ngài yit-thin voi lìn-mén ngì.
[21] Ngì oi chhap-hó chṳ́-lu-phêu, tun-hó lu-phài; ngì oi chhìm ngì hàng-ko ke ke-thiàu thai-lu. Ngài só siak ke Yî-set-lie̍t-ngìn â, hó chón-lòi lé! Chón-to ngì-têu ke ku-hiông!
[22] Phoi-ngia̍k ke ngìn â, ngì lit hi lit chón oi to kí-sṳ̀ nè? Ngài chhai thi-song hàng yit-hong sîn ke sṳ: Fu-ńg oi pó-fu nàm-ngìn.
[23] Song-chú — Van-kiûn ke Ngièn-soi, Yî-set-lie̍t ke Song-ti án-ngiòng kóng: “Ngài pûn chok-lòi ke chṳ́-mìn chón-to ku-hiông ke sṳ̀, kì-têu voi chhai Yù-thai koet-nui tak-chak sàng-sṳ chai kóng: ‘Kûng-ngi ke chhu-só, Siak-ôn sṳn-sân â, ngien Song-chú su-fuk pûn ngì.’
[24] Yù-thai ke thú-thi lâu koet-nui tak-chak sàng-sṳ chiông-lòi voi yû chhin-tô ke nùng-mìn, lâu tai-tén yòng-khiùn ke mu̍k-yòng-ngìn khiung-ha he̍t chhai ke-vi.
[25] Ngài oi sṳ́ thiám ke ngìn chîn-sṳ̀n fî-fu̍k, sṳ́ yù-mun ke ngìn sîm-mân yi-chiuk.
[26] Yîn-vi án-ngiòng ngìn-mìn voi kóng: ‘Ngài soi-siáng ke sṳ̀, kám-kok soi-to chhin sûng-sóng.’
[27] “Ngài — Song-chú kóng, ngit-è voi-to, Ngài oi sṳ́ Yî-set-lie̍t lâu Yù-thai ke ngìn-khiéu chen-kâ, thèu-sâng hîn-vong.
[28] Ngài thèu-pái ngióng-pân yung-sîm chiông kì-têu pâng-thet, chhak-thet, thûi-fân, pho-fái, pin kong-châi; Ngài ya oi ngióng-pân yung-sîm châi-phì kì-têu, kien-li̍p kì-têu.
[29] Ke-sṳ̀, ngìn m̀-voi chai kóng: ‘Yà-ôi sṳ̍t sôn phù-thò, sa sôn-tó chṳ́-ńg ke ngà-chhṳ́.’
[30] Fán-chón, má-ngìn sṳ̍t sôn phù-thò, chhiu sôn-tó má-ngìn ke ngà-chhṳ́; tak-sà oi yîn-vi chhṳ-kâ ke chhui lòi-sí.”
[31] Song-chú kóng: “Ngit-è voi-to, Ngài oi lâu Yî-set-lie̍t pin Yù-thai ke ngìn-mìn li̍p sîn ke yok.
[32] M̀-chhiong Ngài khiên-tén kì-têu chú-siên ke sú tai-liâng kì-têu chhut Âi-khi̍p ke sṳ̀, lâu kì-têu só-li̍p ke yok. Chhai ke khie-yok chûng, Ngài he kì-têu ke ló-kûng, chúng-he kì-têu vì-poi ke-yok.
[33] To ke-ngit yî-heu, Ngài oi lâu Yî-set-lie̍t ngìn-mìn li̍p ke sîn-yok he án-ngiòng: Ngài oi chiông Ngài ke fap-li̍t piong-ngi̍p kì-têu ke sîm-tú, siá chhai kì-têu ke sîm-song. Ngài oi cho kì-têu ke Song-ti, kì-têu oi cho Ngài ke chṳ́-mìn.
[34] Kì-têu m̀-voi chai kâu lìn-sa lâu chhṳ-kâ ke hiûng-thi kóng: ‘Oi ngin-sṳt Song-chú’, yîn-vi tui chui-se ke to chui-thai ke, kì-têu lûng-chúng voi ngin-sṳt Ngài. Ngài oi sa-miên kì-têu ke chhui, m̀-voi chai ki-tet kì-têu ke ko-fam. Ngài — Song-chú án-ngiòng siên-pu lé.”
[35] Song-chú chṳ́-thin ngit-thèu chhai ngit-sṳ̀-thèu fat-kông, phai ngie̍t-kông sên-é cho am-pû-thèu ke kông. Kì kiâu-thûng thai-hói, sṳ́ hói-long ho-ho-kún. Kì ke miàng he Song-chú — Van-kiûn ke Ngièn-soi.
[36] Kì kóng: Na-he liá-têu thin-li̍t chhai Ngài mien-chhièn fi-thet, Yî-set-lie̍t ke heu-thoi ya chhiu chhai Ngài mien-chhièn yún-yén m̀-voi sàng-cho koet-kâ.
[37] Song-chú yu án-ngiòng kóng: Na-he ngìn yû phan-fap liòng-chhut thiên yû kí-kô, chhet-chhut thi ke kîn-kî yû kí-chhṳ̂m, Ngài chang voi yîn-vi Yî-set-lie̍t ke heu-thoi yit-chhiet só-hàng ke lòi vok-thet kì-têu.
[38] Song-chú kóng: “Khon â, ngit-è voi-to, kûi-chho Yâ-lu-sat-lâng-sàng, oi vi Ngài chhùng-sîn kien-chho, tui Ha̍p-nàm-ngia̍p-lèu to Kok-mùn.
[39] Sàng ke sî-phién hàn-oi hiong-ngoi liòng-to Kâ-li̍p-sân, yu lit-to Kô-â.
[40] Kûi-chak tôi-tén sṳ̂n-sṳ̂ lâu chhṳ̀n-fôi ke sân-lak, hàn-yû Khi̍p-lùn-hâi to tûng-phién Mâ-mùn chón-kok yit-chhiet ke fông-thi, chhiòn-phu oi fûn-phe̍t cho-sṳn, kûi-ngi̍p Song-chú ke sṳn-sàng. Liá-sàng chhie̍t-tui m̀-voi pâng-thet, yún-yén m̀-voi vang-thet.”