[1] Song-chú fûn-fu ngài
[2] hi hiong Yâ-lu-sat-lâng ke ngìn-mìn án-ngiòng kóng: Ngài ki-tet, ngì heu-sâng sṳ̀ lâu Ngài ngióng-pân ên-oi! Sîn-fûn khì-kiên, ngì ngióng-pân siak Ngài! Ngì thèn-tén Ngài hàng-ko khóng-yâ, kîn-ko mò kâng-chung ke só-chhai.
[3] Yî-set-lie̍t â, ngì he Ngài sṳ̀n-sṳn ke chṳ́-mìn, he su̍k Ngài ke, he chui-siên siuk ke kó-chṳ́; má-ngìn thûn-sṳ̍t ngì, Ngài chhiu thin kì-têu yû-chhui, kong châi-fo pûn kì-têu. Ngài — Song-chú án-ngiòng siên-pu lé.
[4] Ngâ-kok ke heu-thoi, Yî-set-lie̍t ke tak kî-chhu̍k â, ngì-têu oi liù-sîm thâng Song-chú ke fa!
[5] Song-chú án-ngiòng kóng: To-tái ngì-têu ke chú-siên khon-tó Ngài yû má-ke m̀-chho̍k, kì-têu ngióng voi lì-khôi Ngài án-yén, hi thèn hî-khûng ke ngiéu-siong, sṳ́ chhṳ-kâ sàng-cho hî-hî ká-ká ke ngìn nè?
[6] Kì-têu ya m̀ mun: “Ke kiu ngài-têu lì-khôi Âi-khi̍p, thu ngài-têu kîn-ko khóng-yâ, yû chhṳ̂m-lak ke sâ-mo̍k, châu-hôn vû-am ke fông-thi, mò-ngìn he̍t, mò-ngìn hàng ke só-chhai, ke Song-chú chhôi nai-vi?”
[7] Ngài chiông kì-têu tai-to chhin-phì ke thú-thi hi, pûn kì-têu hióng-su kó-chṳ́ lâu fûng-sṳn ke chhut-sán. Chúng-he kì-têu châu-tha̍p Ngài ke thú-thi, tá-lá-sap Ngài su-pûn kì-têu ke sán-ngia̍p.
[8] Chi-sṳ̂ m̀-sṳt mun: “Song-chú chhôi nai-vi?” Kâu Fap-li̍t-sû ke m̀ ngin-sṳt Ngài. Liâng-chhiu phoi-ngia̍k Ngài; siên-tî fung Pâ-li̍t ke miàng kóng yi-ngièn, pai chhiòn-mò li-yit ke ngiéu-siong.
[9] Só-yî, Ngài — Song-chú oi ko chhṳ-kâ ke chṳ́-mìn lâu kì-têu ke heu-thoi.
[10] Ngì-têu to sî-phién ke Sai-phú-lu-sṳ̂ hi khon! Ngì-têu phai-ngìn to tûng-phién ke Kî-tha̍t hi tham-chhà! Khon sṳt fat-sên án-ngiòng ke sṳ mò?
[11] Sûi-yèn ngiéu-siong m̀-he chṳ̂n-sṳ̀n, kám yû koet-kâ chiông kì ke sṳ̀n-mìn von-thet? Ngài he yùng-kông ke Song-ti, Ngài ke chṳ́-mìn fán-chón chiông Ngài von-cho mò-yung ke ngiéu-siong.
[12] Song-chú kóng: Chû-thiên oi yîn-vi án-ngiòng chho̍k-kiâng, kiâng-to pi̍t-pi̍t-chhat!
[13] Yîn-vi Ngài ke chṳ́-mìn fam lióng-yong ke chhui: Kì-têu lì-khôi Ngài — sâng-miang súi ke chhièn-ngièn; chhṳ-kâ hi yet súi-fut, he pho-lie̍t mò-fap tún-súi ke súi-fut.
[14] Yî-set-lie̍t kám-he nù-chhòi? Kám-he nù-chhòi kiung ke? Cho-má-ke thi̍t-ngìn oi lòi chok kì nè?
[15] Thi̍t-ngìn chhiong sṳ̂-é hiong kì ho-ho-kún, sṳ́ kì ke hó-thièn pien-cho fông-phû, chiông kì ke sàng sêu-thet, pien-cho mò-ngìn he̍t.
[16] Men-fì-sṳ̂-ngìn lâu Tap-pí-ni̍t-ngìn chiông kì ke thèu-nà thi kông-kông.
[17] Yî-set-lie̍t â, kám m̀-he ngì chhṳ-kâ ngiâ-fo sông-sṳ̂n mâ! Ngài yit-lu tai-liâng ngì ke sṳ̀, ngì kám m̀-he lì-khôi Ngài — Song-chú, ngì ke Song-ti mâ?
[18] Liá-ha ngì cho-má-ke oi hi Âi-khi̍p? Sióng-oi lîm Nì-lò-hò ke súi he-mò? Cho-má-ke oi hi Â-sut? Sióng-oi lîm Yu-fat-lâ-tí-hò ke súi he-mò?
[19] Ngì chhṳ-kâ ke chhui-ok voi chit-fa̍t ngì; ngì ke phoi-ngia̍k voi chit-phi ngì. Ngì oi tî, oi mìn-pha̍k: Lì-khôi Ngài — Song-chú, ngì ke Song-ti, m̀ kin-vi Ngài, he ngióng-pân kân-khú ke fái-sṳ! Ngài — Chṳ-kô ke Song-chú, Van-kiûn ke Ngièn-soi án-ngiòng siên-pu lé.
[20] Chṳ-kô ke Song-chú kóng: Yî-set-lie̍t â, ngì chó chhiu áu-thôn ngì ke ak, kié-khôi ngì ke sok-è, m̀-hén sṳ-fung Ngài. Ngì chhai tak-chho kô-sân táng, tak-thèu thai-su hâ, pai sṳ̀n-mìn fam yìm-lon.
[21] Ngài châi-chung ngì, chhiong chung thi̍t-sién ke phù-thò-su; Ngài chhiòn-phu he yung chui-hó ke phù-thò chúng. Chúng-he ngì ngióng-pân voi pien-cho chui-chhâ ke yâ phù-thò nè?
[22] Chhiu-son ngì yung chui-hó ke chhà-kû sé-chhiang, Ngài hàn-he khon-chhut ngì chhui-ok ke vû-tiám.
[23] Ngì ngióng cho-tet kóng ngì mò vû-ve chhṳ-kâ, mò thèn-ko Pâ-li̍t? Khon ngì liù chhai sân-lak ke kiok-chiak, fì-sióng ngì cho-ko má-ke sṳ! Ngì chhiu-chhiong lon-pêu ke lo̍k-thò-mà,
[24] chhiong chhìn-yu̍k chhûng-thung ke yâ-lì, chéu-siáng ke sṳ̀ mò fap-thu khúng-chṳ. Kûng-lì oi tûi kì chhiòn-mò khun-nàn; kâu-phi khì-kiên ngiàm-sṳ̀ chhiu chhìm tet-tó kì.
[25] Yî-set-lie̍t â, m̀-hó thèn phe̍t ke sṳ̀n-mìn, m̀-hó thèn-to hài lan-thet, tûi-to hèu-lièn châu! Chúng-he ngì kóng: “Kóng me mò-háu lé! Ngài chung-yi tó ngoi-koet ngìn ke sṳ̀n-mìn; ngài oi thèn to-tái!”
[26] Song-chú kóng: “Chhe̍t-é pûn-ngìn chok-tó he ngióng-pân kien-seu; Yî-set-lie̍t-ngìn â, ngì-têu lâu ngì-têu ke kiûn-vòng, liâng-chhiu, chi-sṳ̂, siên-tî chhiòn-phu ya voi án kien-seu.
[27] Ngì liá-têu ngin su-é cho â-pâ, ham sa̍k-thèu cho â-mê ke, ngì-têu poi-hiong Ngài, m̀-he mien-hiong Ngài. Chúng-he ngì-têu tù-tó châi-nan ke sṳ̀, yu khiù Ngài lòi chṳ́n-kiu!
[28] “Ngì-têu vi chhṳ-kâ chho ke sṳ̀n-mìn chhai nai-vi nè? Na-he kì-têu nèn kiu ngì-têu, tù-tó fam-nan ke sṳ̀, pûn kì-têu lòi kiu ngì-têu chhiu hó nâ! Yù-thai-ngìn â, ngì-têu ke sṳ̀n-mìn lâu ngì-têu ke sàng-sṳ phiàng-tô.
[29] Ngì-têu chhiòn-phu phoi-ngia̍k Ngài! Cho-má-ke hàn lâu Ngài au nè?
[30] Ngài chit-fa̍t ngì-têu chhiòn mò háu-kó, yîn-vi ngì-têu m̀ su-kau. Chhiong pot-khòng ke sṳ̂-é khiung-yong, ngì-têu chhṳ̀ chhṳ-kâ ke siên-tî.
[31] Liá sṳ-thoi ke ngìn â, ngì-têu oi mìn-pha̍k Ngài — Song-chú ke fa! Tui Yî-set-lie̍t-ngìn lòi kóng, Ngài kám sṳt chhiong khóng-yâ? Kám chhiong vû-am yîm-hiám ke só-chhai mâ? Cho-má-ke Ngài ke chṳ́-mìn oi kóng: ‘Ngài-têu oi cheu chhṳ-kâ ke yi-sṳ hàng, mò-oi chón Ngì ke-vi hi â’?
[32] Se-moi-é voi m̀ ki-tet chhṳ-kâ ke chû-pó mò? Sîn-ngiòng kám voi m̀ ki-tet kì ke lî-fu̍k mò? Chúng-he Ngài ke chṳ́-mìn m̀ ki-tet Ngài, yí-kîn son m̀-chhut yû kí-kiú!
[33] Ngì-têu tông chîn-thûng khiù oi ke fông-fap ô! Lièn chui-fái ke se-moi-é ya oi ho̍k ngì-têu.
[34] Ngì-têu ke sâm-fu kò-tó khiùng-ngìn lâu mò-chhui ke ngìn ke hiet, chúng-he kì-têu pin-mò yet ngì ke vuk thêu tûng-sî! “Sûi-yèn án-ngiòng,
[35] ngì-têu hàn-he kóng: ‘Ngài he mò-chhui ke; Song-chú tui ngài ke fat-khién yí-kîn mò-thet hi lé.’ Khon â, Ngài — Song-chú yit-thin oi chit-fa̍t ngì-têu, yîn-vi ngì-têu m̀ sṳ̀n-ngin chhṳ-kâ ke chhui!
[36] Ngì-têu cho-má-ke chéu-lòi chéu-hi, si-chhu hi chhìm phe̍t ke sṳ̀n-mìn nè? Âi-khi̍p voi pûn ngì-têu sṳt-mong, chhiong Â-sut sṳt pûn ngì-têu sṳt-mong khiung-yong.
[37] Ngì-têu voi sûng-sú nám-tén thèu-nà tông kien-seu tui Âi-khi̍p chhut-lòi. Yîn-vi Ngài — Song-chú vok-thet ngì-têu só yí-kho ke ngiéu-siong; ngì-têu m̀-voi tui kì-têu tet-tó má-ke pông-chhu.”