[1] Song-chú ke fa lìm-to Yâ-li-mí, kóng:
[2] “Song-chú — Yî-set-lie̍t ke Song-ti án-ngiòng kóng: Ngì oi chiông Ngài lâu ngì kóng-ko só-yû ke fa chhiòn-phu siá chhai sû tî-poi,
[3] yîn-vi sṳ̀-kiên voi-to, Ngài ke chṳ́-mìn tui Yù-thai lâu Yî-set-lie̍t pûn-ngìn chok-chéu ke, Ngài oi pûn kì-têu chón-to ku-hiông, chhùng-chṳ́n kâ-yèn. Ngài oi tai kì-têu chón-to Ngài su-pûn kì-têu chú-siên ke thú-thi; kì-têu voi chhùng-sîn tet-tó liá thú-thi. Ngài — Song-chú án-ngiòng siên-pu lé.”
[4] Song-chú tui Yî-set-lie̍t lâu Yù-thai ke ngìn-mìn kóng:
[5] Ngài thâng-tó voi pûn ngìn pi̍t-pi̍t-chhat ke sâng, liá he tet-ngìn-kiâng ke sâng, mò phìn-ôn ke sâng!
[6] Hi mun khon-é, he m̀-he yû nàm-ngìn oi kiung se-ngìn-è? Cho-má-ke Ngài khon-tó tak-ke nàm-ngìn yung sûng-sú nám-tén tú-sṳ́, chhiong he oi kiung ke fu-ngìn-kâ? Cho-má-ke tak-ke nàm-ngìn mien-set la̍k-chhiâng nè?
[7] Chhám lé! Tet-ngìn-kiâng ke ngit-è voi-to lé! Màng-sṳt yû án-ngiòng ke ngit-è; liá he Ngài chṳ́-mìn Ngâ-kok su-nan ke sṳ̀-khì, chúng-he kì-têu yit-thin voi tet-kiu.
[8] Song-chú — Van-kiûn ke Ngièn-soi án-ngiòng kóng: “To ke-ngit, Ngài oi áu-thôn koa chhai kì-têu kiáng-kîn ke ak, pâng-thôn kì-têu sṳ̂n-song ke só-lien, kì-têu m̀-voi chai cho ngoi-koet ngìn ke nù-chhòi.
[9] Kì-têu oi sṳ-fung Ngài — Song-chú, kì-têu ke Song-ti, lâu Ngài vi kì-têu hîn-hí lòi sṳ̀n-chiap Thai-ví ke vòng.
[10] Ngài ke phu̍k-ngìn Ngâ-kok â, m̀-sṳ́ kiâng; Yî-set-lie̍t-ngìn â, m̀-sṳ́ chho̍k-kiâng. Ngài oi tui yén-yén ke thi-fông, ngì-têu pûn-ngìn chok-hi ke koet-kâ chiông ngì-têu ke chṳ́-sûn kiu chhut-lòi. Ngâ-kok oi chón-lòi ku-hiông, ôn-kî lo̍k-ngia̍p, mò kiâng má-ke.
[11] Yîn-vi Ngài lâu ngì khiung-ha, oi chṳ́n-kiu ngì. Ngài oi chiông Ngài kiuk ngì hi ke ke-têu koet-kâ vàn-chhiòn sêu-me̍t; chúng-he Ngài m̀-voi sêu-me̍t ngì. Ngài oi yung kûng-chṳn kón-kau ngì, cho-m̀-tet m̀ chit-fa̍t ngì. Ngài — Song-chú án-ngiòng siên-pu lé.”
[12] Song-chú án-ngiòng kóng: Ngì ke su-sông mò phan-fap yî, sông-héu mò fap-thu yî-hó lé.
[13] Ngì ke on-é mò-ngìn voi thoi ngì chhut-thèu, chhiong mò yo̍k hó kò, mò yo̍k hó yî.
[14] Oi-siak ngì ke ngìn chhiòn-phu m̀ ki-tet ngì; kì-têu m̀-voi chai lòi koân-sîm ngì. Ngài oi chhiong kûng-kit thi̍t-ngìn án-ngiòng kûng-kit ngì, tông chhàn-ngiûn lòi chit-fa̍t ngì; yîn-vi ngì tông chit-ok, chhui tông chhûng.
[15] Cho-má-ke hàn vi ngì ke su-sông kín-kieu? Ngì ke sông-héu mò fap-thu yî-hó lé. Yîn-vi ngì tông chit-ok, chhui tông chhûng, Ngài chang án-ngiòng chit-fa̍t ngì.
[16] Chúng-he, thûn-sṳ̍t ngì ke, voi pûn-ngìn sṳ̍t-thet; ngì só-yû ke thi̍t-ngìn voi pûn-ngìn chok-chéu. Khî-fu ngì ke, voi pûn-ngìn khî-fu; chhióng ngì ke, voi pûn-ngìn chhióng.
[17] Sûi-yèn ngì ke thi̍t-ngìn kóng: “Siak-ôn he pûn-ngìn fit-thet ke, mò-ngìn koân-sîm ke”; chúng-he Ngài oi yî ngì ke sông-héu, pûn ngì hó hí-lòi. Ngài — Song-chú án-ngiòng siên-pu lé.
[18] Song-chú án-ngiòng kóng: Khon â, Ngài oi fu̍k-hîn Ngâ-kok ke chong-phùng, ya oi lìn-mén kì ke kâ-yèn; Ngài oi sṳ́ kì chhùng-kien Yâ-lu-sat-lâng, chhai ngièn-lòi ke thi-fông hí vòng-kiûng.
[19] Kì-têu voi fat-chhut kám-chhia ke kô-sâng; kì-têu voi fôn-hí khoai-lo̍k. Ngài oi sṳ́ kì-têu ke ngìn-khiéu chen-kâ, m̀-voi kám-séu. Ngài oi sṳ́ kì-têu yû chûn-yùng, m̀-voi chai su vú-yu̍k.
[20] Kì-têu ke chṳ́-sûn voi chhiong ló thèu-pái án mùng-ên, kì-têu ke koet-kâ thin-chho̍k voi chhai Ngài mien-chhièn khî hí-lòi; Ngài oi chit-fa̍t só-yû khî-fu kì-têu ke ngìn.
[21] Kì-têu chhṳ-kâ ngìn cho thúng-chhṳ-chá; kì-têu ke liâng-chhiu he pún-chhu̍k ngìn. Ngài ham kì to Ngài mien-chhièn lòi, kì chhiu lòi chhîn-khiun Ngài; mò su yêu-chhiáng ke, má-ngìn kám chhṳ-kâ lòi chiap-khiun Ngài nè? Kì-têu oi cho Ngài ke chṳ́-mìn; Ngài oi cho kì-têu ke Song-ti. Ngài — Song-chú án-ngiòng siên-pu lé.
[23] Khon â, Song-chú ke thai fat-khién voi chhiong khòng-fûng fat-sên, chhiong liùng-kién-fûng án-ngiòng chhai fái-ngìn thèu-nà táng lit-lit-chón. Song-chú ke thai fat-khién m̀-voi sû chón-hi, chhṳ̍t-to Kì vàn-sṳ̀n chhṳ-kâ só-yû ke kie-va̍k. Ke-sṳ̀, ngì-têu chhiu voi mìn-pha̍k liá-sṳ.