[1] Yîm-ma̍k ke lai-é, chúng-kón sṳn-thien ke chi-sṳ̂ Pâ-sṳ̂-fu-ngí yit thâng-tó Yâ-li-mí siên-pu liá-têu fa,
[2] chhiu tá siên-tî Yâ-li-mí, chhai sṳn-thien pet-phién ke Phien-ngâ-mén mùn-nui yung kâ chiông kì só-tén.
[3] Thi-ngi chêu-sṳ̀n, Pâ-sṳ̂-fu-ngí piong kì chhut-lòi. Yâ-li-mí chhiu tui kì kóng: “Song-chú pin mò chiông ngì ôn-to Pâ-sṳ̂-fu-ngí. Kì pûn ngì ke miàng he ‘Si-vì Tet-ngìn-kiâng’.
[4] Yîn-vi Song-chú án-ngiòng kóng: ‘Ngài oi sṳ́ ngì chhṳ-kâ lâu ngì ke phèn-yû chhiòn-phu yîn-vi ngì kiâng-to mò-kat mò-sat; ngì voi chhîn-muk khon-tó kì-têu sí chhai thi̍t-ngìn ke tô-kiam hâ. Ngài voi chiông só-yû ke Yù-thai-ngìn kâu-pûn Pâ-pí-lùn-vòng thúng-chhṳ; kì voi chiông kì-têu chok-to Pâ-pí-lùn hi, ya-he chhṳ̀-sí kì-têu.
[5] Ngài oi pûn thi̍t-ngìn chhióng-kiap sàng-tú ke chhòi-fu, chiông sàng-tú chit-chhùn ke pó-vu̍t chhióng-chéu, lièn Yù-thai-vòng ke pó-pi ya chhióng-chéu. Kì-têu voi chiông tak-hong tûng-sî pân-to Pâ-pí-lùn hi.
[6] Lun-tó ngì, Pâ-sṳ̂-fu-ngí, ngì lâu ngì chhiòn-kâ voi pûn-ngìn chok-to Pâ-pí-lùn hi. Ngì voi sí chhai ke-vi, chong chhai ke-vi; sṳ̀-sòng thâng ngì kóng ká yi-ngièn ke-têu phèn-yû ya voi lâu ngì tù-tó khiung-yong ke kiet-khiu̍k.’ ”
[7] Song-chú â, Ngì met-sa ngài; ngài pûn Ngì met-sa tó. Ngì pí ngài kha-khiòng, Ngì yàng-ko ngài. Tak-sà chhiòn-phu met-sôi ngài; kì-têu kûi-ngit chiông ngài tông-cho seu-khô.
[8] Ngài tak-pái khôi-choi, thin-chho̍k oi thai-sâng hêm, thai-sâng kóng: Phau-li̍t! Fí-me̍t! Song-chú â, ngài siên-pu Ngì ke sin-sit, chúng-he ngiâ-lòi sâu-nat, méu-sṳ.
[9] Ngài na kóng: “Ngài mò-oi chai thì-hí Song-chú, mò-oi chai fung Kì ke miàng siên-kóng”, Ngì ke fa chhiu voi chhiong fó chhai ngài sîm-tú sêu, chon-ngi̍p ngài ke kut-thèu. Ngài ngióng-pân tû ngiûn m̀-he̍t; ngài kô-put-chiông kóng chhut-lòi.
[10] Ngài thâng-tó chhin-tô ngìn se-sâng kóng: “Si-vì Tet-ngìn-kiâng” ke lòi lé; ngài-têu lòi ko kì! Lièn tî-kí ke phèn-yû ya chhiòn-phu tén-tén khon ngài lau-khui. Kì-têu kóng: “Mò yit-thin kì voi pûn-ngìn lau-tó! Ngài-têu chhiu yû khó-nèn yàng-ko kì, hiong kì po-sù.”
[11] Chúng-he Song-chú â, Ngì lâu ngài khiung-ha; Ngì thai-yû nèn-li̍t, fî-sòng tet-ngìn-vi. Ap-pet ngài ke ngìn chhiòn-phu voi sṳt-phai; kì-têu ke yîm-mèu voi lau-khui. Kì-têu voi fî-sòng kien-seu, yîn-vi kì-têu sṳt-phai lé; ngìn yún-yén m̀-voi m̀ ki-tet kì-têu ke siû-yu̍k.
[12] Song-chú — Van-kiûn ke Ngièn-soi â, Ngì ke chhài-kiet kûng-tong; Ngì khon-chhôn ngìn ke sîm-chhòng. Khiù Ngì pûn ngài khon-tó Ngì po-fu̍k ngài ke thi̍t-ngìn, yîn-vi ngài chiông ngài ke on-khien kâu-pûn Ngì.
[13] Oi chhong-kô siung-chan Song-chú! Oi chan-mî Song-chú! Kì kiu khiùng-khú-ngìn ke miang thot-lì fái-ngìn ke sú.
[14] Ngien ngài ke sâng-ngit su chu-chú! Ngien ngài chhut mû-thôi ke-ngit mò su chuk-fuk!
[15] Ngien ke hiong ngâ-pâ po sêu-sit ke ngìn su chu-chú! Kì tui ngâ-pâ po hó sêu-sit kóng: “Kiûng-hí ngì kiung lai-é!”
[16] Ngien ke-ngìn chhiong pûn Song-chú fí-me̍t ke sàng, tet m̀-tó Song-chú ke lìn-mén. Ngien kì chêu-sṳ̀n-thèu thâng-tó chhin-sê ke sâng, tông-chu-thèu thâng-tó chan-chên ke sê-sâng;
[17] yîn-vi Song-chú mò pûn ngài sí chhai mû-thôi, mò pûn mû-thôi sàng-cho ngài ke fùn-mu, ngâ-mê ke tú-sṳ́ chhiu yit-chhṳ̍t khoan-tén ngài.
[18] Ngài cho-má-ke oi chhut-se nè? Kám he vi-tó kîn-ngiam lò-khú, yù-sông, chhai kien-seu chûng kiet-suk ngài yit-sên ke ngièn-ngit mâ?