[1] Song-chú kóng: “Na-he nàm-ngìn lâu pû-ngiòng lì-fûn, pû-ngiòng lì-khôi kì hi lâu phe̍t-ngìn kiet-fûn, kì ngióng cho-tet chiông pû-ngiòng chai chiap chón-lòi nè? Kì án-ngiòng cho chhiu voi tá-lá-sap Ngài ke thú-thi. Yî-set-lie̍t â, sûi-yèn ngì lâu án-tô chhìn-lòng hàng kiên-yìm, chúng-he liá-ha ngì hàn sióng-oi chón-lòi chhìm Ngài he-mò!
[2] Ngì ngo-thèu khon ke-têu kông-kông ke sân! Kám nèn chhìm-tó yit-te ngì m̀-sṳt tá-lá-sap ke thú-thi mò? Ngì chhô chhai lu-sùn tén chhìn-lòng, chhiu-chhiong Â-lâ-pak-ngìn chhai khóng-yâ phu̍k-tén oi chhióng-kiap yit-yong. Ngì ke yìm-lon lâu sià-ok yí-kîn tá-lá-sap thú-thi;
[3] só-yî kâm-lìm thìn-chṳ́, chhûn-yí m̀-lo̍k. Ngì hàn-he yû yit-fu kî-ńg ke yong-siong, vàn-chhiòn m̀-tî kien-seu.
[4] “Yî-set-lie̍t â, liá-ha ngì fán-chón tui Ngài kóng: ‘Ngì he ngài ke â-pâ, tui ngài heu-sâng ke sṳ̀ Ngì chhiu thung-siak ngài.
[5] Ngì kám voi tui ngài fat-khién to yún-kiú mâ?’ Liá he ngì só kóng ke fa, chúng-he ngì hàn yit-chhṳ̍t chhin-miang cho fái-sṳ.”
[6] Yok-sî-â cho Yù-thai-vòng ke sṳ̀, Song-chú tui ngài kóng: “Ngì khon-tó ke mò chṳ̂n-chiet ke Yî-set-lie̍t só-hàng ke mò? Kì sông-to tak-chho kô-sân táng, chhai tak-thèu thai-su hâ hàng kiên-yìm.
[7] Ngài láu-tó, kì cho liá yit-chhiet yî-heu, voi chón-to Ngài liá-vi lòi; chúng-he kì mò chón-lòi; kì mò chṳ̂n-chiet ke chí-moi Yù-thai ya khon-tó lé.
[8] Ngài lì-thet mò chṳ̂n-chiet ke Yî-set-lie̍t, pûn kì lì-fûn chṳn-sû, yîn-vi kì hàng kiên-yìm; ke mò chṳ̂n-chiet ke chí-moi Yù-thai khon-tó, chúng-he kì pin m̀-kiâng, hàn-he hi hàng kiên-yìm,
[9] yit-si̍t-é tû mò kám-kok kien-seu. Kì tá-lá-sap thú-thi; kì pai sa̍k-thèu, su-é, tui Ngài mò sú chṳ̂n-chiet.
[10] Cho liá yit-chhiet yî-heu, Yî-set-lie̍t mò chṳ̂n-chiet ke chí-moi Yù-thai cha-yi chón-lòi, m̀-he chṳ̂n-sîm oi kûi-hiong Ngài. Ngài — Song-chú án-ngiòng siên-pu lé.”
[11] Song-chú yu lâu ngài kóng, Yî-set-lie̍t sûi-yèn mò chṳ̂n-chiet, chúng-he pí mò chṳ̂n-chiet ke Yù-thai yû kha-hó têu-é.
[12] Só-yî, Song-chú min-lin ngài to pet-fông, hi hiong Yî-set-lie̍t kóng: “Tui Ngài mò chûng-sîm ke Yî-set-lie̍t â, chón-to Ngài liá-vi lòi! Ngài m̀-voi tui ngì pien-mien, Ngài tui ngì ke thung-siak mò kói-pien; Ngài m̀-voi yún-kiú hiong ngì fat-khién.
[13] Ngì thin-chho̍k oi sṳ̀n-ngin chhṳ-kâ ke chhui-ko, sṳ̀n-ngin ngì tet-chhui Song-chú — ngì ke Song-ti, sṳt cheu chhṳ-kâ ke yi-sṳ chéu-lòi chéu-hi, chhai tak-thèu thai-su hâ pai ngoi-koet ke sṳ̀n-mìn, vì-poi Ngài ke min-lin. Ngài — Song-chú án-ngiòng siên-pu lé.”
[14] Song-chú kóng: “Tui Ngài mò chûng-sîm ke chṳ́-mìn â, to-chón-lòi! Ngài he ngì-têu ke ló-kûng. Ngài oi tui ngì-têu ke tak-chak sàng sién-chhut yit-sà, mî chûng-chhu̍k sién-chhut lióng-sà, tai-chón Siak-ôn hi.
[15] Ngài oi su-pûn ngì-têu ha̍p Ngài sîm-yi ke thúng-chhṳ-chá, kì-têu voi yung chhûng-mìn lâu chṳ-fi lòi thúng-chhṳ ngì-têu.
[16] To ngì-têu chhai liá-te thú-thi song sên-yông chung-tô ke sṳ̀, ngìn-mìn m̀-voi chai thì-hí Ngài — Song-chú ke yok-khui, m̀-sṳ́ chai sióng-tó, ya m̀-sṳ́ chai ki-ngiam. Kì-têu yí-kîn mò sî-yeu yok-khui, ya m̀-sṳ́ nang-ngoi chṳ-chho.
[17] To ke-sṳ̀, kì-têu voi chhṳ̂n Yâ-lu-sat-lâng cho ‘Song-chú ke Pó-chho’; van-koet van-mìn chhiòn-phu voi chhi-si̍p chhai ke-vi kin-pai Ngài. Kì-têu m̀-voi chai ngang-kiáng cheu sià-ok ke sîm hi hàng-sṳ.
[18] Ke-sṳ̀, Yî-set-lie̍t voi lâu Yù-thai lièn-ha̍p; kì-têu voi khiung-ha tui pet-fông chón-to Ngài su-pûn ngì-têu chú-siên cho sán-ngia̍p ke thú-thi.”
[19] Song-chú kóng: Yî-set-lie̍t â, Ngài lo̍k-yi ngin ngì cho lai-é, chiông chhiòn sṳ-kie chui-hó ke thú-thi — ke chhin-phì ke, su-pûn ngì cho sán-ngia̍p. Ngài láu-tó ngì thin-chho̍k voi ham Ngài “Â-pâ”, yún-yén m̀-voi chai phoi-ngia̍k Ngài.
[20] Chúng-he ngì tui Ngài mò chûng-sîm, chhiong mò chṳ̂n-chiet ke pû-ngiòng thèn-ngìn chéu. Ngài — Song-chú án-ngiòng siên-pu lé.
[21] Thâng â, kông-kông ke sân-táng yû khiù-ham sâng, he Yî-set-lie̍t-ngìn kieu-chṳ̂ ôi-khiù ke sâng-yîm; yîn-vi kì-têu phiên-lì chṳn-lu, m̀ ki-tet Song-chú — kì-têu ke Song-ti.
[22] Ngì-têu mò chûng-sîm ke ngìn â, to-chón-lòi! Ngài — Song-chú oi yî-chhṳ ngì-têu, sṳ́ ngì-têu m̀-voi chai phoi-ngia̍k. Ngì-têu en-kóng: “He ô! Ngài-têu oi chón-to Song-chú ke-vi, yîn-vi Kì he ngài-têu ke Song-ti.
[23] Ngài-têu chhai thai-sân lâu se-sân táng pai ngiéu-siong, sṳ-sṳ̍t-song mò tet-tó yit-si̍t-é pông-chhu. Chṳ́-yû Song-chú — ngài-têu ke Song-ti chang nèn chṳ́n-kiu Yî-set-lie̍t.
[24] Chúng-he ngài-têu chhiùng-se pai Pâ-li̍t — ke kien-seu ke ngiéu-siong, só-yî ngài-têu ke yòng-khiùn, ngiù-khiùn, chṳ́-ńg, chhiu-he ngài-têu chú-siên chhṳ-kú yî-lòi lò-luk kien-li̍p ke kâ-ngia̍p chhiòn-phu liáu chhiang-chhiang.
[25] Ngài-têu yin-kôi kien-seu to vang lo̍k-hi, yung siû-chhṳ́ lòi châ-sṳ̂n. Ngài-têu lâu ngài-têu ke chú-siên chhòng-theu tet-chhui Song-chú — ngài-têu ke Song-ti; ngài-têu yit-chhṳ̍t m̀ thâng-chhiùng Song-chú — ngài-têu Song-ti ke min-lin.”