[1] Song-chú ke fa lìm-to Yâ-li-mí,
[2] ham kì hi khî chhai Song-chú sṳn-thien ke mùn-héu, chhai ke-vi siên-pu kóng: “Ngì-têu ngi̍p liá-têu mùn hi kin-pai Song-chú ke Yù-thai-ngìn â, oi thâng Song-chú ke fa.
[3] Song-chú — Van-kiûn ke Ngièn-soi, Yî-set-lie̍t ke Song-ti án-ngiòng kóng: Ngì-têu oi hi-sià kûi-chṳn! Án-ngiòng, Ngài chhiu pûn ngì-têu he̍t chhai liá-te thú-thi.
[4] M̀-hó chai siông-sin ke-têu phien-ngìn ke fa, kóng: ‘Ngài-têu tông ôn-chhiòn! Liá he Song-chú ke sṳn-thien; liá he Song-chú ke sṳn-thien; liá he Song-chú ke sṳn-thien!’
[5] “Ngì-têu ton-chṳ̂n oi hi-sià kûi-chṳn, fu-siông kûng-phìn khoán-thai.
[6] M̀-hó chai khî-fu ngoi-chhu̍k-ngìn, kû-yì lâu koá-fu; oi thìn-chṳ́ chhai liá-te thi-song chhṳ̀ mò-chhui ke ngìn; m̀-hó chai pai phe̍t ke sṳ̀n-mìn, hoi-tó chhṳ-kâ.
[7] Na-he ngì-têu chṳn-kîn hi-sià kûi-chṳn, Ngài chhiu pûn ngì-têu ki-siu̍k he̍t chhai liá-vi, chhiu-he yî-chhièn Ngài su-pûn ngì-têu chú-siên cho yún-kiú sán-ngia̍p ke thú-thi.
[8] “Chúng-kóng, ngì-têu vá-kho ke phien-ngìn ke fa he mò li-yit ke.
[9] Ngì-têu cho-chhe̍t, chhṳ̀-ngìn, fam kiên-yìm, fat ká-sṳ, hiong Pâ-li̍t sêu-hiông, pai ngì-têu m̀-sṳt ke sṳ̀n-mìn.
[10] Ngì-têu cho liá yit-chhiet Ngài tông-nâu ke sṳ, yèn-heu lòi-to Ngài ke sṳn-thien, khî chhai Ngài mien-chhièn, kóng: ‘Ngài-têu tông ôn-chhiòn!’
[11] Ngì-têu chiông Ngài ke sṳn-thien khon cho chhe̍t-teu he-mò? Ngài chhîn-chhîn chhú-chhú khon-tó ngì-têu ke só-hàng só-cho.
[12] Ngì-têu to Sṳ-lò hi, khon Ngài thèu-pái só sién ke su-ngìn kin-pai ke thi-fông, ngì-têu chhiu tî: Ngài yîn-vi Ngâ chṳ́-mìn Yî-set-lie̍t ke chhui ngióng-pân tui-fu ke só-chhai.
[13] Ngì-têu fam liá án-tô ke chhui; Ngài — Song-chú chó chhiu yit-chhṳ̍t khien ngì-têu, chúng-he ngì-têu m̀-thâng; Ngài hêm ngì-têu, chúng-he ngì-têu m̀-en.
[14] Só-yî, Ngài oi tui-fu ngì-têu só yí-kho, su̍k Ngài ke sṳn-thien, lâu Ngài su-pûn ngì-têu pin ngì-têu chú-siên ke só-chhai, chhiong Ngài yî-chhièn tui-fu Sṳ-lò khiung-yong.
[15] Ngài oi tui Ngài mien-chhièn chiông ngì-têu kiuk-chéu, chhiong Ngài yî-chhièn kiuk-chéu ngì-têu ke hiûng-thi Yî-set-lie̍t pet-koet ke ngìn-mìn khiung-yong. Ngài — Song-chú án-ngiòng siên-pu lé.”
[16] Song-chú kóng: “Yâ-li-mí â, m̀-hó vi liá-têu ngìn khì-tó, ya m̀-hó vi kì-têu thai-sâng ôi-khiù. Ngì m̀-hó thoi kì-têu hiong Ngài khién-khiù, yîn-vi Ngài yit-thin m̀-thâng.
[17] Kì-têu chhai Yù-thai ke tak sàng-sṳ lâu chhai Yâ-lu-sat-lâng ke kiê-hong só-cho ke sṳ, ngì mò khon-tó he-mò?
[18] Kì-têu ke chṳ́-ńg kiám-chhèu, â-pâ sêu-fó, â-mê kiâu mien-fún cho-piáng, hien-pûn kì-têu ke Thiên-heu Ńg-sṳ̀n. Kì-têu ya hiong phe̍t ke sṳ̀n-mìn hien chiú, thiâu-thiâu ngiâ Ngài fat-khién.
[19] Sṳ-sṳ̍t-song, kì-têu sông-tó ke kám-he Ngài? Kì-têu sông-tó ke he kì-têu chhṳ-kâ, hoi chhṳ-kâ to chhin kien-seu.
[20] Só-yî, Ngài — Chṳ-kô ke Song-chú án-ngiòng siên-pu: Ngài oi chiông su-hi piang chhai liá thi-fông, ya oi piang chhai ngìn, thung-vu̍t, su-é, lâu ńg-kuk táng-kô. Ngài ke thai fat-khién chhiong fó tông-mâng chho̍k hí-lòi, m̀-voi vû-thet.”
[21] Song-chú — Van-kiûn ke Ngièn-soi, Yî-set-lie̍t ke Song-ti án-ngiòng kóng: “Ngài ke chṳ́-mìn â, cho ngì-têu chiông sêu-fa-chi lâu phìn-ôn-chi ke ngiuk nâ-hi sṳ̍t-thet.
[22] Ngài tai-liâng ngì-têu ke chú-siên chhut Âi-khi̍p ke sṳ̀, Ngài pin-mò min-lin kì-têu hien sêu-fa-chi ya-he khì-thâ chi-vu̍t.
[23] Ngài chṳ́-yû min-lin kì-têu thâng-chhiùng Ngài; án-ngiòng, Ngài chhiu cho kì-têu ke Song-ti, kì-têu cho Ngài ke chṳ́-mìn. Ngài oi kì-têu chûn-hàng Ngài ke tho-lu; án-ngiòng, kì-têu chhiu voi van-sṳ sun-li.
[24] Chúng-he, kì-têu m̀ thâng-chhiùng, ya m̀-tap Ngài, fán-chón cheu chhṳ-kâ ngang-kiáng sià-ok ke sîm hi-cho, lì-khôi Ngài ye̍t-lòi ye̍t-yén.
[25] Tui ngì-têu chú-siên lì-khôi Âi-khi̍p ke-ngit khôi-sṳ́ chhṳ̍t-to liá-ha, Ngài tak-ngit yit-pái yu yit-pái chhâi-phai Ngài ke phu̍k-ngìn — chung siên-tî hiong ngì-têu chhòn-fa,
[26] chúng-he mò-ngìn tap Ngài, ya mò-ngìn thâng-fa. Ngì-têu pí ngì-têu ke chú-siên hàn-kha ngang-kiáng, hàn-kha chok-ok.
[27] “Só-yî, Yâ-li-mí â, ngì oi hiong Ngài ke chṳ́-mìn chhòn liá-têu fa, sûi-yèn kì-têu m̀-voi thâng; ngì oi hêm kì-têu, sûi-yèn kì-têu m̀-voi en.
[28] Chúng-he ngì oi chit-phi kì-têu: Kì-têu ke koet-kâ m̀ chiap-su kón-kau, m̀ thâng-chhiùng Ngài — Song-chú, kì-têu ke Song-ti. Sṳ̀n-sṳ̍t chó chhiu m̀ kien-thet lé, lièn thì ya mò-ngìn thì!
[29] “Yâ-lu-sat-lâng-ngìn â, oi thi-kông thèu-nà-mô, chiông kì fit-thet! Oi sông kông-kông ke sân-táng hi chhong ôi-kô! Yîn-vi Ngài — Song-chú yí-kîn vok-thet ngiâ Ngài su-hi ke chṳ́-mìn lé.”
[30] Song-chú kóng: “Yù-thai-ngìn cho yit-khien Ngài khon-cho chhin-ok ke fái-sṳ. Kì-têu chiông Ngài tông-nâu ke ngiéu-siong piong chhai Ngài ke sṳn-thien tî-poi, tá-lá-sap Ngài ke sṳn-só.
[31] Kì-têu chhai Hiûn-nun-chṳ́ sân-lak chho Thò-fî-thi̍t chi-thàn, chiông chhṳ-kâ ke chṳ́-ńg piong chhai táng-kô yung fó-sêu lòi hien-chi. Ngài pin-mò min-lin kì-têu hien liá-chúng chi, lièn sióng ya mò sióng-ko.
[32] Só-yî, yû yit-ngit, ke só-chhai m̀-voi chai ham-cho Thò-fî-thi̍t ya-he Hiûn-nun-chṳ́ sân-lak, voi ham-cho ‘Chhṳ̀-ngìn ke Sân-lak’. Ngìn voi chhai Thò-fî-thi̍t mài-chong sṳ̂n-sṳ̂, yîn-vi yí-kîn mò vi-só hó mài lé.
[33] Thiên-khûng ke fî-niâu lâu thi-song ke yâ-chhu voi lòi sṳ̍t sṳ̂n-sṳ̂, mò-ngìn lòi kiuk.
[34] Ngài oi sṳ́ Yù-thai tak-chak sàng-sṳ lâu Yâ-lu-sat-lâng ke kiê-hong m̀-voi chai yû fôn-hí khoai-lo̍k ke sâng, ya m̀-voi chai yû sîn-lòng lâu sîn-ngiòng ke sâng, yîn-vi liá-te thú-thi thin-chho̍k voi fông-thet.”