[1] Song-chú fûn-fu Yâ-li-mí hâ-to Yù-thai vòng-kiûng, hi lâu Thai-ví vòng-chhèu ke kiûn-vòng, kì ke kôn-yèn, pin tui Yâ-lu-sat-lâng kok sàng-mùn chhut-ngi̍p ke ngìn-mìn kóng, Song-chú án-ngiòng kóng:
[3] “Ngài — Song-chú min-lin ngì-têu chṳp-hàng kûng-chṳn ke sṳ́m-phan, sṳ̂n-chông chṳn-ngi, tui khî-fu ngìn ke sú-chûng kié-kiu pûn-ngìn ap-pet ke. Ngì-têu cho-m̀-tet fái khoán-thai ya-he ap-pet ngoi-chhu̍k-ngìn, kû-yì lâu koá-fu; ya cho-m̀-tet chhai liá só-chhai liù mò-chhui ke ngìn ke hiet.
[4] Na-he ngì-têu chûn-sú Ngài ke min-lin, Thai-ví ke heu-thoi chhiu voi ki-siu̍k cho vòng. Kì-têu lâu kì-têu ke kôn-yèn, hàn-yû ngìn-mìn, chhiòn-phu cho-tet chhô chan-chhâ, khì-mâ, kîn-ko liá-têu sàng-mùn, ngi̍p-to vòng-kiûng.
[5] Na-he ngì-têu m̀ fu̍k-chhiùng Ngài ke min-lin, Ngài chṳ́-tén Ngài chhṳ-kâ ke miàng fat-sṳ, liá vòng-kiûng voi pien-cho fông-phû. Ngài — Song-chú án-ngiòng siên-pu lé.
[6] “Chhai Ngài khon-lòi, Yù-thai vòng-sṳt ke vòng-kiûng chhiong Kî-lie̍t, yu chhiong Lì-pâ-nun sân-táng án-chiâng; chúng-he Ngài oi sṳ́ kì pien-cho khóng-yâ, mò-ngìn he̍t ke sàng-sṳ.
[7] Ngài oi phai ngìn fí-me̍t kì. Kì-têu chhiòn-phu voi tai pú-thèu lòi, chám-thôn ke-têu chhin-chiâng ke hiông-pak-su chhû-é, fit-lo̍k fó-teu tú hi.
[8] “Heu-lòi, chhin-tô ngoi-koet ngìn voi kîn-ko liá só-chhai, thai-kâ voi mun, Song-chú cho-má-ke án-ngiòng tui-fu liá-chho thai-sàng?
[9] Yèn-heu kì-têu yu chhṳ-kâ en-kóng: Yîn-vi liá-chho sàng ke ngìn vì-poi Song-chú — kì-têu ke Song-ti lâu kì-têu li̍p ke yok, hi fu̍k-sṳ pai phe̍t ke sṳ̀n.”
[10] Yù-thai ngìn-mìn â, m̀-hó vi sí-thet ke vòng kieu; m̀-hó vi-tó Yok-sî-â-vòng pî-sông. Oi vi kì ke lai-é Yok-ha̍p-sṳ̂ lòi kieu; kì pûn-ngìn chok-chéu, yún-yén m̀-voi chón-lòi, m̀-voi chai khon-tó chhṳ-kâ ke ku-hiông lé.
[11] Yû-koân sṳ̀n-chiap kiâ-pâ Yok-sî-â cho Yù-thai-vòng ke Yok-ha̍p-sṳ̂, Song-chú án-ngiòng kóng: “Kì pûn-ngìn chok-chéu, lì-khôi liá só-chhai, yún-yén m̀-voi chón-lòi.
[12] Kì voi sí chhai pûn-ngìn chok-hi ke só-chhai, m̀-voi chai khon-tó liá-ke thi-fông lé.”
[13] Chhám lé, liá-sà ngìn yû châi-fo lé! Kì yung put-ngi ke sú-thon vi chhṳ-kâ hí vòng-kiûng, yung mò kûng-chṳn ke fông-fap hí tông-tô lèu-fòng; kì khiòng-pet ngìn-mìn cho pha̍k-kûng, m̀ fu kûng-chhièn.
[14] Chhám lé, liá-sà ngìn yû châi-fo lé! Kì kóng: “Ngài oi hí chhin ví-thai ke vòng-kiûng, hí chhin-fat ke lèu-fòng.” Kì khôi tông-thai ke chhûng-mùn, yung hiông-pak-su cho thiên-fâ-pán, chhit thai-fùng ke yù-chhit.
[15] Kám-kóng ngì hí pí phe̍t-ngìn kha kô-kui ke hiông-pak-su vòng-kiûng, chhiu péu-sṳ ngì he yit-vi hièn-mìn ke kiûn-vòng he-mò? Ngiâ-pâ yit-sên-ngìn hióng-fuk, yu sṳ̍t yu lîm. Kì cho-ngìn cho-sṳ cheu kûng-phìn kûng-ngi lòi hàng; kì só-cho ke chhiòn-phu sun-li.
[16] Kì vi khiùng-khú mò-ngìn pông-chhu ke sṳ̂n-yên; kì só-cho ke yit-chhiet sun-li. Liá he péu-sṳ kì ngin-sṳt Song-chú.
[17] Chúng-he ngì tông thâm-sîm, tân-tân ku chhṳ-kâ ke li-yit; ngì liù mò-chhui ke ngìn ke hiet, yung phau-li̍t ap-chṳ ngìn-mìn. Ngài — Song-chú án-ngiòng siên-pu lé.
[18] Só-yî, yû-koân Yok-sî-â ke lai-é Yù-thai-vòng Yok-ngâ-kin, Song-chú án-ngiòng kóng: Mò-ngìn voi vi kì ôi-sông kóng: “Âi-châi, ngài ke hiûng-thi chí-moi â, hàn-chhám ô!” Mò-ngìn voi vi kì sông-sîm kieu kóng: “Ngài ke chú! Ngài ke vòng â!”
[19] Kì voi pûn-ngìn thô-chéu, pûn-ngìn fit-to Yâ-lu-sat-lâng sàng-ngoi, chhiu-chhiong mài-chong yit-chak lì-è.
[20] Yâ-lu-sat-lâng ke ngìn-mìn â, sông-to Lì-pâ-nun sân-táng hi hêm! To Pâ-sân hi thai-sâng kieu! Tui Mô-ap ke sân-táng hêm! Yîn-vi ngì-têu ke thùng-mèn-koet chhiòn-phu pûn-ngìn tá-sû lô.
[21] Ngì-têu fàn-yùng ke sṳ̀ Song-chú kín-ko ngì-têu, chúng-he ngì-têu kóng: “Ngài-têu mò-oi thâng!” Ngì-têu chhiùng-se chhiu m̀ thâng-kóng; chhṳ-chhiùng m̀-sṳt chṳn-kîn fu̍k-chhiùng Song-chú.
[22] Ngì-têu ke liâng-chhiu voi pûn khòng-fûng kién-chéu; ngì-têu ke thùng-mèn-koet voi pûn-ngìn chok-chéu; ngì-têu chhiòn-phu voi tù-tó kien-seu, pûn-ngìn vú-yu̍k; yîn-vi ngì-têu cho án-tô ke fái-sṳ.
[23] Ngì-têu he̍t chhai yung Lì-pâ-nun hiông-pak-su hí ke vòng-kiûng, ngì-têu chhṳ-kâ láu-tó tông ôn-chhiòn, chúng-he thai-nàn lìm-to ke-sṳ̀, ngì-têu he ngióng-pân khó-lièn â! Ngì-têu voi chhiong kiung se-ngìn-è ke fu-ngìn-kâ án-ngiòng thai-sâng kín-chhên.
[24] Song-chú tui Yù-thai-vòng Yok-ngâ-kin ke lai-é Yok-ngâ-kîn kóng: “Ngài — yún-sên ke Song-ti fat-sṳ: Chhiu-son ngì he Ngài chṳn-sú só tai yin-é yung ke kim-chṳ́, Ngài ya oi chiông ngì pok-thet,
[25] kâu-pûn ngì só kiâng, oi sû ngiâ miang ke ngìn. Ngài oi chiông ngì kâu-pûn Pâ-pí-lùn-vòng Nì-pu-kap-nì-sat lâu kì ke kiûn-chhui.
[26] Ngài oi chiông ngì lâu ngiâ-mê kiuk-to ngoi-koet hi, to ke m̀-he ngì-têu chhut-se ke só-chhai hi; ngì-têu voi sí chhai ke-vi.
[27] Ngì-têu chhin-sióng oi chón-lòi, chúng-he yún-yén mò phan-fap chón-lòi.”
[28] Yû-ngìn kóng: “Yok-ngâ-kîn-vòng kám m̀-he chhiong yit-chak mò-ngìn oi ke lan âng-é? Na-m̀-he, cho-má-ke kì lâu kì ke chṳ́-ńg chhiòn-phu pûn-ngìn fit-thet, kiuk-to ngoi-pâng hi nè?”
[29] Thai-thi â! Thai-thi â! Thai-thi â! Oi thâng Song-chú ke fa.
[30] Song-chú án-ngiòng kóng: Oi chiông liá-ngìn tên-ki cho mò chṳ́-ńg, kì yit-sên-ngìn mò pan-tiám sṳ̀n-chhiu! Kì m̀-voi yû heu-thoi hó sṳ̀n-chiap Thai-ví ke vòng-vi; mò yit-ke voi cho vòng thúng-chhṳ Yù-thai.