[1] Yok-sî-â ke lai-é Yok-ngâ-kin khôi-sṳ́ cho vòng thúng-chhṳ Yù-thai-koet ke sṳ̀, Song-chú ke fa lìm-to Yâ-li-mí.
[2] Song-chú án-ngiòng kóng: “Ngì oi khî chhai sṳn-thien ke thìn-yen tú, chiông Ngài min-lin ngì kóng ke fa hiong ke-têu tui Yù-thai kok sàng-chṳ́n chhièn-lòi lî-pai ke khiùn-chung siên-pu, yit-ki ya cho-m̀-tet leu-thet.
[3] Na-he kì-têu hén thâng, tak-sà hén lì-khôi sià-ok ke tho-lu, Ngài chhiu voi chhí-sêu yîn-vi kì-têu ke fái hàng-vì oi kâ-pûn kì-têu ke châi-nan.
[4] Ngì oi tui kì-têu kóng: ‘Song-chú án-ngiòng kóng: Ngì-têu m̀ chûn-hàng Ngài su-pûn ngì-têu ke fap-li̍t, m̀ thâng-chhiùng Ngài phu̍k-ngìn — ke-têu siên-tî ke fa, m̀ fu̍k-chhiùng Ngài. Ngài yit-pái yu yit-pái phai Ngài ke phu̍k-ngìn — ke-têu siên-tî hiong ngì-têu chhòn-fa, chúng-he ngì-têu m̀-thâng.
[6] Na-he ngì-têu ki-siu̍k vì-poi, Ngài chhiu oi fí-me̍t liá sṳn-thien, chhiong Ngài yî-chhièn fí-me̍t Sṳ-lò khiung-yong. Sṳ-kie kok-koet chhiòn-phu voi khon liá-sàng cho su chu-chú ke kam-kie.’ ”
[7] Chi-sṳ̂, siên-tî lâu thai-chung chhiòn-phu thâng-tó Yâ-li-mí chhai Song-chú ke sṳn-thien tú kóng liá-têu fa.
[8] Yâ-li-mí yit kóng-so̍t, kì-têu chhiu chok-tén kì, tui kì kóng: “Ngì chṳ̂n kôi-sí!
[9] Ngì cho-má-ke fung Song-chú ke miàng siên-pu liá sṳn-thien voi chhiong Sṳ-lò khiung-yong fí-me̍t, yu kóng liá-sàng voi sàng-cho mò-ngìn he̍t ke fông-phû?” Só-yî thai-chung chiông Yâ-li-mí pâu-vì hí-lòi.
[10] Yû-têu Yù-thai-koet ke kôn-yèn thâng-tó liá-khien sṳ, chhiu tui vòng-kiûng sông-to Song-chú ke sṳn-thien lòi, chhai “Sîn-mùn” khôi-thìn.
[11] Ke-têu chi-sṳ̂ lâu siên-tî hiong kôn-yèn lâu thai-chung ko Yâ-li-mí; kì-têu kóng: “Liá-ngìn yin-kôi phan sí-hìn, yîn-vi kì kóng yi-ngièn kûng-kit liá-sàng; ngì-têu chhiòn-phu chhîn-ngí thâng-tó lé.”
[12] Yâ-li-mí chhiu tui só-yû ke kôn-yèn lâu thai-chung kóng: “Song-chú phai ngài lòi siên-pu chu-chú sṳn-thien lâu liá-sàng ke liá-têu fa, ngì-têu chhiòn-phu thâng-tó lé.
[13] Liá-ha ngì-têu oi hi-sià kûi-chṳn, fu̍k-chhiùng Song-chú — ngì-têu ke Song-ti. Án-ngiòng, Kì chhiu voi chhí-sêu pún-lòi oi kâ-pûn ngì-têu ke châi-nan.
[14] Lun-tó ngài, ngài chhai ngì-têu sú-chûng! Ngì-têu ngin-vì ngióng-pân tui-thai ngài chang hó, chang kûng-tong, cheu án-ngiòng tui-thai ngài chhiu hó lé.
[15] M̀-ko ngì-têu yit-thin oi tî: Na-he ngì-têu chhṳ̀ ngài, ngì-têu lâu liá-sàng, pin sàng-tú ke ngìn-mìn, chhiòn-phu oi phòi-sóng chhṳ̀ mò-chhui ngìn ke hiet-chai, yîn-vi ngài khok-sṳ̍t he Song-chú phai-lòi ke, oi chiông liá yit-chhiet ke fa chhòn-to ngì-têu ke ngí-kûng.”
[16] Só-yî ke-têu kôn-yèn lâu thai-chung tui ke-têu chi-sṳ̂ lâu siên-tî kóng: “Liá-ke ngìn mò yin-kôi phan sí-hìn, yîn-vi kì he fung Song-chú — ngài-têu Song-ti ke miàng hiong ngài-têu kóng-fa.”
[17] Chiap-tén, chóng-ló tông-chûng yû kí-sà khî hí-lòi tui thai-chung kóng:
[18] “Thèu-pái, chhai Hî-sî-kâ-vòng thúng-chhṳ Yù-thai sṳ̀, Mô-li-sâ-ngìn siên-tî Mì-kâ sṳt hiong Yù-thai ngìn-mìn siên-pu, Song-chú — Van-kiûn ke Ngièn-soi án-ngiòng kóng: Siak-ôn voi chhiong thièn-thi pûn-ngìn lài pién chón-lòi; Yâ-lu-sat-lâng voi pien-cho fông-phû; hí sṳn-thien ke sân voi pien-cho su-lìm.
[19] Yù-thai-vòng Hî-sî-kâ lâu Yù-thai ngìn-mìn kám yû chiông Mì-kâ chhú-sí nè? Hî-sî-kâ kám m̀-he kin-vi Song-chú, to Song-chú mien-chhièn khiù Kì sṳ̂-ên lìn-mén? Só-yî Song-chú kói-pien sîm-yi, mò chiông só siên-pu ke châi-nan kong chhai kì-têu sṳ̂n-song. Chúng-he liá-ha ngài-têu sa sióng-oi ngiâ liá-ke thai châi-nan, hoi-sí chhṳ-kâ!”
[20] (Ke-sṳ̀, yû yit-ke Kî-lie̍t-Yâ-lìm-ngìn — Sṳ-mâ-ngâ ke lai-é Vû-li-â; liá ngìn lâu Yâ-li-mí khiung-yong fung Song-chú ke miàng kóng yi-ngièn, kûng-kit liá sàng lâu liá koet-kâ.
[21] Yok-ngâ-kin-vòng lâu kì ke sṳ-pîn, kôn-yèn, thâng-tó Vû-li-â ke fa, chhiu sióng-oi chhṳ̀ kì. Vû-li-â tî liá-ke yîm-mèu, kiâng-to kón-kín chéu-hi Âi-khi̍p.
[22] Yok-ngâ-kin-vòng phai Â-kiet-pô ke lai-é Yî-li-nâ-tân tai-liâng yit-chhui ngìn kiuk-to Âi-khi̍p hi.
[23] Kì-têu chok-tó Vû-li-â, chiông kì tai-to Yok-ngâ-kin-vòng mien-chhièn. Vòng yung tô-é chhṳ̀-sí kì, chiông kì ke sṳ̂n-sṳ̂ fit chhai phìn-mìn ke mu-thi.)
[24] Chúng-he Yâ-li-mí tet-tó Sâ-fân ke lai-é Â-hî-kâm ke pó-fu, mò ngìn chiông kì kâu-pûn ngìn-mìn chhú-sí.