[1] Heu-lòi, só-yû ke kiûn-kôn — pâu-hàm Kâ-li-â ke lai-é Yok-ha̍p-nàn lâu Hò-sâ-ngâ ke lai-é Yâ-sat-li-ngâ — pin só-yû ke ngìn-mìn tui chui-se to chui-thai khiung-ha hàng-chhièn lòi,
[2] tui siên-tî Yâ-li-mí kóng: “Chhiáng tap-yin ngài-têu ke yêu-khiù! Thoi ngài-têu hiong Song-chú — ngì ke Song-ti khì-khiù. Khiù ngì vi ngài liá-têu chhûn-tó ke ngìn khì-tó. Ngì chhîn-muk khon-tó, yî-chhièn ngài-têu yû chhin-tô ngìn, liá-ha chhûn mò kí-tô sà.
[3] Khiù Song-chú — ngì ke Song-ti chṳ́-sṳ ngài-têu yin-kôi hàng ke lu, yin-kôi cho ke sṳ.”
[4] Siên-tî Yâ-li-mí en-kóng: “Hó! Ngài tî lé, ngài tap-yin ngì-têu ke yêu-khiù. Ngài voi hiong Song-chú — ngì-têu ke Song-ti khì-tó. Mò-lun Song-chú kóng má-ke, ngài voi chhiòn-mò pó-liù lâu ngì-têu kóng.”
[5] Só-yî kì-têu yu tui Yâ-li-mí kóng: “Na-he ngài-têu m̀ chûn-sú Song-chú — ngì ke Song-ti chhâi-phai ngì pûn ngài-têu yit-chhiet ke min-lin, ngien Song-chú cho sṳ̀n-sṳ̍t khó-kho ke chṳn-ngìn lòi tui-fu ngài-têu.
[6] Ngài-têu liá-ha chhiáng ngì hiong Song-chú — ngài-têu ke Song-ti khì-khiù; mò-lun Kì ke fa he fuk-hi ya-he châi-fo, ngài-têu yit-thin oi thâng-chhiùng. Ngài-têu na-he thâng-chhiùng Song-chú — ngài-têu ke Song-ti, chhiòn-phu thin-chho̍k voi sun-li.”
[7] Sṳ̍p-ngit yî-heu, Song-chú lâu Yâ-li-mí kóng-fa.
[8] Só-yî kì seu-si̍p Kâ-li-â ke lai-é Yok-ha̍p-nàn lâu só-yû thèn kì ke kiûn-kôn, pin só-yû ke ngìn-mìn, tui chui-se to chui-thai chhiòn-phu lòi,
[9] tui kì-têu kóng: “Song-chú — Yî-set-lie̍t ke Song-ti, chhiu-he ngì-têu ham ngài chhai Kì mien-chhièn vi ngì-têu khì-khiù ke Song-ti, án-ngiòng kóng:
[10] ‘Na-he ngì-têu kiet-sîm ki-siu̍k he̍t chhai liá só-chhai, Ngài voi kien-li̍p ngì-têu, m̀-voi chhak-thet ngì-têu; Ngài voi châi-phì ngì-têu, m̀-voi pâng-thet ngì-têu; yîn-vi Ngài vi-tó hiong ngì-têu kong ke châi-nan, fì-sîm chón-yi lé.
[11] Ngì-têu m̀-sṳ́ kiâng Pâ-pí-lùn-vòng. M̀-hó kiâng kì! Yîn-vi Ngài lâu ngì-têu thùng-chhai, Ngài voi kiu ngì-têu thot-lì kì ke sú.
[12] Ngài ki-yèn lìn-mén ngì-têu, Ngài ya voi ham kì lìn-mén ngì-têu, pûn ngì-têu chón-to ku-hiông.’
[13] “Chúng-he, ngì-têu m̀ thâng-chhiùng Song-chú — ngì-têu Song-ti ke fa, chhṳ-kâ kiet-thin m̀ liù chhai liá só-chhai,
[14] kóng: ‘Ngài-têu mò-oi liù chhai liá só-chhai! Ngài-têu oi to Âi-khi̍p hi. Chhai ke-vi, ngài-têu m̀-voi tù-tó chan-chên, m̀-voi thâng-tó yòng-kok ke sâng, ya m̀-voi yîn-vi mò sṳ̍t-vu̍t lòi ngo tú-sṳ́; ngài-têu oi he̍t chhai ke-vi.’
[15] Ngì-têu chhûn-tó ke Yù-thai ngìn-mìn ki-yèn kóng liá-chúng fa, Song-chú — Van-kiûn ke Ngièn-soi, Yî-set-lie̍t ke Song-ti án-ngiòng kóng: ‘Na-he ngì-têu kiên-chhṳ̀ yit-thin oi hi Âi-khi̍p, he̍t chhai ke-vi,
[16] ngì-têu só-kiâng ke chan-chên voi chhai Âi-khi̍p tûi-tó ngì-têu; ngì-têu só-kiâng ke kî-fông voi thèn-tén lòi; ngì-têu voi sí chhai Âi-khi̍p.
[17] Só-yû kiet-thin to Âi-khi̍p hi he̍t ke ngìn, na m̀-he chan-sí, ngo-sí, chhiu-he pot-vûn lòi sí. Mò-ngìn nèn ki-siu̍k sên-chhùn, mò-ngìn sám tet-khôi Ngài oi kong chhai kì-têu sṳ̂n-song ke châi-nan.’
[18] “Song-chú — Van-kiûn ke Ngièn-soi, Yî-set-lie̍t ke Song-ti án-ngiòng kóng: ‘Yî-chhièn Ngài chiông Ngài ke su-hi lâu thai fat-khién tó chhai Yâ-lu-sat-lâng ngìn-mìn sṳ̂n-song; na-he ngì-têu to Âi-khi̍p hi, Ngài ya oi chiông Ngài ke fat-khién tó chhai ngì-têu sṳ̂n-song. Ngì-têu voi sàng-cho ke-vi ngìn só-nâu, só-kiâng, chu-chú, lâu siû-yu̍k ke tui-siong. Ngì-têu chhie̍t-tui m̀-voi chai khon-tó liá só-chhai.’
[19] “Song-chú sṳt fûn-fu ngì liá-têu chhûn-tó ke Yù-thai ngìn-mìn kóng: ‘M̀-hó to Âi-khi̍p hi.’ Ngài liá-ha ngiàm-ngiàm kín-ko ngì-têu:
[20] Ngì-têu fam liáu chṳ-miang ke chho-ngu. Ngì-têu ká-yi chhiáng ngài thoi ngì-têu hiong Song-chú — ngài-têu ke Song-ti khì-tó, pin tap-yin oi chûn-hàng Kì yit-chhiet ke min-lin.
[21] Kîm-pû-ngit ngài lâu ngì-têu kóng Song-chú — ngì-têu ke Song-ti oi ngài lâu ngì-têu kóng ke yit-chhiet fa, chúng-he ngì-têu m̀-hén thâng-chhiùng Kì.
[22] Liá-ha ngì-têu oi khok-sṳ̍t tî: Ngì-têu voi chhai chhṳ-kâ kiet-thin oi hi ke só-chhai su-tó chan-chên, kî-fông, ya-he pot-vûn lòi sí.”