[1] Ke-ngièn, chhiu-he Sî-tí-kâ cho Yù-thai-vòng chhû-khì ke thi-si ngièn ńg-ngie̍t, Kî-phiên-ngìn Ap-sok ke lai-é siên-tî Ha̍p-nâ-nì-ngâ chhai Song-chú ke sṳn-thien tú lâu ngài kóng-fa.
[2] Kì chhai ke-têu chi-sṳ̂ pin chung-ngìn mien-chhièn lâu ngài kóng: “Song-chú — Van-kiûn ke Ngièn-soi, Yî-set-lie̍t ke Song-ti án-ngiòng kóng: Ngài yí-kîn tá-sui Pâ-pí-lùn-vòng ke ak.
[3] Lióng-ngièn nui, Ngài oi chiông Pâ-pí-lùn-vòng Nì-pu-kap-nì-sat chhióng-to Pâ-pí-lùn hi ke sṳn-thien yung-phín chhiòn-phu yun chón-lòi liá só-chhai.
[4] Ngài ya oi chiông Yù-thai-vòng Yok-ngâ-kin ke lai-é Yok-ngâ-kîn, hàn-yû lâu kì khiung-ha pûn-ngìn chok-to Pâ-pí-lùn ke Yù-thai-ngìn chhiòn-phu tai chón-lòi. Ngài khok-sṳ̍t oi tá-sui Pâ-pí-lùn-vòng ke ak. Ngài — Song-chú án-ngiòng siên-pu lé.”
[5] Chiap-tén, chhai ke-têu chi-sṳ̂ lâu chhai sṳn-thien tú khî-tén ke chung-ngìn mien-chhièn, siên-tî Yâ-li-mí hiong siên-tî Ha̍p-nâ-nì-ngâ kóng:
[6] “Â-mén! Ngien Song-chú cheu ngì ke fa lòi sṳ̀n-chhiu liá-ke sṳ! Ngài hî-mong Song-chú voi sṳ̍t-hien ngì ke yi-ngièn, chiông sṳn-thien ke pó-vu̍t lâu só-yû pûn-ngìn chok-hi ke ngìn tui Pâ-pí-lùn tai-chón liá só-chhai.
[7] Chúng-he ngì oi chu-yi thâng ngài hiong ngì lâu chung-ngìn kóng ke fa.
[8] Chhṳ-kú yî-lòi, chhai ngì ngài yî-chhièn ke-têu siên-tî yi-ngièn yû chan-chên, châi-nan, pin pot-vûn voi lìm-to chhin-tô thi-fông lâu khiòng-koet.
[9] Só-yî, yi-ngièn fò-phìn ke siên-tî thin-chho̍k oi tén-to yi-ngièn sṳ̍t-hien, ngìn chang voi sṳ̀n-ngin kì khok-sṳ̍t he Song-chú só-phai ke siên-tî.”
[10] Yèn-heu, siên-tî Ha̍p-nâ-nì-ngâ chiông siên-tî Yâ-li-mí kiáng-kîn hong ke ak nâ hâ-lòi, áu thôn-thet,
[11] chhai chung-ngìn mien-chhièn kóng: “Song-chú kóng-ko, Kì oi cheu-yong áu-thôn Pâ-pí-lùn-vòng Nì-pu-kap-nì-sat kâ-pûn kok-koet ke ak; Kì voi chhai lióng-ngièn nui sṳ̍t-hien liá-sṳ.” Siên-tî Yâ-li-mí chhiu lì-khôi ke só-chhai.
[12] Siên-tî Ha̍p-nâ-nì-ngâ chiông siên-tî Yâ-li-mí kiáng-kîn hong ke ak áu-thôn heu, Song-chú ham Yâ-li-mí
[13] hi lâu Ha̍p-nâ-nì-ngâ kóng: “Song-chú kóng, sûi-yèn ngì áu tet-thôn su-é cho ke ak, chúng-he Kì voi nang-ngoi cho yit-chak thiet ke ak lòi-von.
[14] Song-chú — Van-kiûn ke Ngièn-soi, Yî-set-lie̍t ke Song-ti kóng-ko, Kì oi chiông thiet cho ke ak kâ-pûn kok-koet; kì-têu voi fu̍k-sṳ Pâ-pí-lùn-vòng Nì-pu-kap-nì-sat. Song-chú kóng, Kì lièn yâ-chhu ya oi kâu-pûn Nì-pu-kap-nì-sat-vòng kón-lî.”
[15] Siên-tî Yâ-li-mí yu hiong siên-tî Ha̍p-nâ-nì-ngâ kóng: “Ha̍p-nâ-nì-ngâ â, ngì thâng-hó! Song-chú pin mò phai ngì, chúng-he ngì hoi liá-têu ngìn siông-sin ngì kóng ke fâ-liâu.
[16] Só-yî Song-chú kóng, Kì oi sêu-me̍t ngì. Ngì kîm-ngièn nui chhiu voi mò-miang, yîn-vi ngì kóng phoi-ngia̍k Song-chú ke fa.”
[17] Ke-ngièn chhit-ngie̍t, siên-tî Ha̍p-nâ-nì-ngâ ton-chṳ̂n chhiu sí-thet.