[1] Song-chú hiong siên-tî Yâ-li-mí kóng-hí yû-koân lie̍t-koet ke sṳ.
[2] Yû-koân Âi-khi̍p: Kì thì-tó Âi-khi̍p-vòng Nì-kô ke kiûn-chhui, chhai Yù-thai-vòng Yok-sî-â ke lai-é Yok-ngâ-kin cho vòng ke thi-si ngièn, pûn Pâ-pí-lùn-vòng Nì-pu-kap-nì-sat chhai Yu-fat-lâ-tí-hò fu-khiun ke Kâ-kî-mí-sṳ̂ tá-sû. Song-chú kóng:
[3] Âi-khi̍p ke kiûn-kôn fat min-lin: Chún-phi thai-se tún-phài! Hiong chan-chhòng chhièn-chin!
[4] Lap mâ-ôn, khì chan-mâ! Chhiu thin-vi, tai thiet-mo! Nò-li chhiông, chok thiet-kap!
[5] Chúng-he Song-chú mun: Ngài khon-tó má-ke nè? Kì-têu kiâng-to tá-lon-thui; kì-têu ke chan-sṳ pûn-ngìn tá-sû, chhin-miang chéu, m̀-kám vat-thèu, kám-kok si-vì tông tet-ngìn-kiâng!
[6] Chui voi chéu ke ya chéu m̀-chhat; chan-sṳ chhiòn-phu chéu m̀-thet. Chhai pet-fông, Yu-fat-lâ-tí hò-pa sùn, kì-têu chhiòn-phu tiet-to tap-tap.
[7] Chhiong Nì-lò-hò ke súi chong hí-lòi ke he má-ngìn nè? Chhiong hò-pa pot thai-súi ke he má-ngìn nè?
[8] He Âi-khi̍p chhiong Nì-lò-hò ke súi chong hí-lòi, chhiong hò-pa pot thai-súi. Âi-khi̍p kóng: “Ngài oi chong hí-lòi, chiông chhiòn-thi chim-thet; ngài oi fí-me̍t sàng-sṳ lâu khì-chûng ke ngìn-mìn.
[9] Khì-pîn chhûng-fûng, chan-chhâ chin-kûng! Kú-sṳ̍t-ngìn lâu Fut-ngìn tai-tén tún-phài; Lî-tí-â-ngìn nâ-tén kiûng-chien. Liá-têu yúng-sṳ chhiòn-phu chhut-hi siông-chhṳ̀!”
[10] Chúng-he, liá he Chṳ-kô ke Song-chú — Van-kiûn Ngièn-soi ke ngit-è: Kîm-pû-ngit, Kì oi po-sù; kîm-pû-ngit, Kì oi chit-fa̍t thi̍t-ngìn. Kì ke pó-kiam oi sṳ̍t thi̍t-ngìn ke ngiuk to-páu, lîm thi̍t-ngìn ke hiet to-chiuk. Kîm-pû-ngit, Chṳ-kô ke Song-chú, Van-kiûn ke Ngièn-soi oi chhai pet-fông ke Yu-fat-lâ-tí hò-pa sùn, chiông thi̍t-ngìn tông-cho sên-ngì.
[11] Âi-khi̍p-ngìn â, sông Kî-lie̍t hi! To ke-vi hi chhìm kò-yo̍k! Ngì só-yû ke yo̍k-é chhiòn-phu mò-háu; mò phan-fap yî-hó ngì.
[12] Lie̍t-koet thâng-tó ngì ke kien-seu; chhiòn-thi chhûng-mân ngì ke kieu-sâng. Chan-sṳ lâu chan-sṳ siông-chhong; lióng-sà khiung-ha vang-tó.
[13] Pâ-pí-lùn-vòng Nì-pu-kap-nì-sat oi hi kûng-tá Âi-khi̍p ke sṳ̀, Song-chú tui siên-tî Yâ-li-mí kóng:
[14] Oi chhai Âi-khi̍p tak sàng-sṳ siên-pu, chhai Me̍t-thot, Men-fì-sṳ̂, Tap-pí-ni̍t siên-ko kóng: Hong-hí-lòi, chún-phi siông-chhṳ̀! Chan-chên voi thûn-me̍t ngì ke yit-chhiet.
[15] Ngì-têu ke thai-ngiù sṳ̀n Â-pí-sṳ cho-má-ke voi phu̍k lo̍k-hi? He Song-chú chiông kì súng-vang!
[16] Ngì-têu ke chan-sṳ chhong-lòi chhong-hi, vang-tó. Kì-têu thai-kâ kóng: “Hong-hí-lòi! Chón ló-vuk hi! Chón-to pún-chhu̍k ke-vi, yén-yén lì-khôi thi̍t-ngìn ke tô-kiam!”
[17] Kì-têu lâu Âi-khi̍p-vòng nang-ngoi chhí yit-ke miàng, ôn-to: “Kiê-kôi-siên, kì ke kî-fi sṳt-thet hi lé.”
[18] Ngài ke miàng he Song-chú — Van-kiûn ke Ngièn-soi, Ngài he thai kiûn-vòng. Ngài chṳ́-tén Ngài ke yún-sên fat-sṳ: Nì-pu-kap-nì-sat lòi chhîm-fam ke thai-kiûn voi chhiong kô-ko khiùn-sân ke Thâ-phok-sân, chhiong khî chhai hói-sùn ke Kâ-me̍t-sân.
[19] Âi-khi̍p-ngìn â, pâu-fu̍k oi khún-hó, chún-phi thò-miang! Men-fì-sṳ̂ voi pûn-ngìn sêu-thet, pien-cho fông-phû, chhiòn mò-ngìn he̍t.
[20] Âi-khi̍p chhiong yit-chak chhin-phì ke ngiù-mà, pûn pet-fông pî-lòi ke lu̍k-màng kûng-kit.
[21] Kì chhiáng-lòi ke pîn-é chhiong ngiù-làn tú phì-phì ke se ngiù-kú, lûng-chúng chón-sṳ̂n thò-chéu, mò yit-ke kám khî chhut-lòi siông-chhṳ̀. Kì-têu tù-tó châi-nan ke ngit-è to lé; kì-têu su chit-fa̍t ke sṳ̀-chiet to lé!
[22] Âi-khi̍p thò-chéu ke sâng, chhiong sà-kô thò-chéu ke sâng. Thi̍t-kiûn lòi kûng-kit kì, chhiong tó-su ke ngìn yung pú-thèu chám-thôn su-é.
[23] Âi-khi̍p sûi-yèn chhiong meu-sṳn ke su-nà, chúng-he voi pûn thi̍t-ngìn chám-thet, yîn-vi thi̍t-kiûn pí chhó-máng hàn-kha tô, tô-to son m̀-chhut.
[24] Âi-khi̍p-ngìn voi tù-tó siû-yu̍k; kì-têu voi pûn pet-fông lòi ke ngìn cham-liâng. Ngài — Song-chú án-ngiòng siên-pu lé.
[25] Song-chú — Van-kiûn ke Ngièn-soi, Yî-set-lie̍t ke Song-ti kóng: “Ngài oi chit-fa̍t Tí-pí-sṳ̂ ke sṳ̀n-mìn Â-mùn, Âi-khi̍p-vòng, lâu Âi-khi̍p chhiòn-thi, ya oi chit-fa̍t Âi-khi̍p só-yû ke sṳ̀n-mìn lâu ke-têu fûn-fûng ke vòng.
[26] Ngài oi chiông Âi-khi̍p-vòng lâu só-yû thèu-kho kì ke ngìn, chhiòn-phu kâu-pûn sióng-oi fí-me̍t kì-têu sin-miang ke Pâ-pí-lùn-vòng Nì-pu-kap-nì-sat lâu kì ke kiûn-chhui. Chúng-he ko yit-cham sṳ̀-kiên, Âi-khi̍p voi chhiong thèu-pái khiung-yong yû-ngìn he̍t. Ngài — Song-chú án-ngiòng siên-pu lé.”
[27] Ngài ke phu̍k-ngìn Ngâ-kok â, m̀-sṳ́ kiâng; Yî-set-lie̍t-ngìn â, m̀-sṳ́ chho̍k-kiâng. Ngài oi tui yén-yén ke thi-fông, ngì-têu pûn-ngìn chok-hi ke koet-kâ chiông ngì-têu ke chṳ́-sûn kiu chhut-lòi. Ngâ-kok oi chón-lòi ku-hiông, ôn-kî lo̍k-ngia̍p, mò kiâng má-ke.
[28] Ngài ke phu̍k-ngìn Ngâ-kok â, m̀-sṳ́ kiâng, yîn-vi Ngài lâu ngì khiung-ha. Ngài oi chiông Ngài kiuk ngì hi ke ke-têu koet-kâ vàn-chhiòn sêu-me̍t; chúng-he Ngài m̀-voi sêu-me̍t ngì. Ngài oi yung kûng-chṳn kón-kau ngì, cho-m̀-tet m̀ chit-fa̍t ngì. Ngài — Song-chú án-ngiòng siên-pu lé.