[1] Song-chú kóng: “Ke-têu pet-hoi kiuk-chéu Ngài chṳ́-mìn ke thúng-chhṳ-chá chhám lé! Kì-têu chhiu-chhiong mu̍k-ngìn pet-hoi kiuk-chéu Ngài ke yòng-khiùn khiung-yong.”
[2] Song-chú — Yî-set-lie̍t ke Song-ti tui ke-têu mu̍k-ngìn án-ngiòng kóng: “Ngì-têu ngièn-lòi yin-kôi cheu-ku Ngài ke yòng-khiùn, fán-chón kiuk-san kì-têu. Khon â, Ngài oi yîn-vi ngì-têu ke fái hàng-vì chit-fa̍t ngì-têu.
[3] Ngài oi chiông Ngài yòng-khiùn chûng só chhûn-tó ke chṳ́-mìn, tui Ngài kiuk-san kì-têu hi ke kok-koet seu-si̍p hí-lòi, tai kì-têu chón-lòi ku-hiông. Kì-têu voi tô-chṳ́ tô-sûn, ngìn-su chen-kâ chhin-tô.
[4] Ngài oi phai mu̍k-ngìn chṳn-kîn cheu-ku kì-têu. Ngài ke yòng-è m̀-voi chai chho̍k-kiâng; kì-têu lièn yit-ke ya m̀-voi sṳt-thet. Ngài — Song-chú án-ngiòng siên-pu lé.”
[5] Song-chú kóng: “Khon â, ngit-è voi-to, Ngài oi vi Thai-ví hîn-hí chṳn-ngi ke ‘Su-kî’. Kì ke vòng-khièn hièn-mìn; kì oi chhai liá-te thú-thi yung kûng-phìn chṳn-ngi chhṳ-lî koet-kâ.
[6] Chhai kì thúng-chhṳ ke ngit-è, Yù-thai ngìn-mìn voi ôn-kî lo̍k-ngia̍p, Yî-set-lie̍t ngìn-mìn voi hióng-su thai-phìn. Kì voi chhṳ̂n-cho ‘Song-chú — ngài-têu ke chṳn-ngi’.”
[7] Song-chú kóng: “Khon â, ngit-è voi to, ngìn fat-sṳ ke sṳ̀, m̀-voi chai kóng: ‘Ngài chṳ́-tén ke tai-liâng Yî-set-lie̍t-ngìn chhut Âi-khi̍p ke yún-sên Song-chú fat-sṳ’,
[8] chúng-he oi kóng: ‘Ngài chṳ́-tén ke tai-liâng Yî-set-lie̍t-ngìn ke heu-thoi lì-khôi pet-fông ke thú-thi, lì-khôi Kì kiuk-san kì-têu hi ke kok-koet ke yún-sên Song-chú fat-sṳ.’ Ke-sṳ̀, kì-têu voi chhai chhṳ-kâ ke ku-hiông ôn-kî lo̍k-ngia̍p.”
[9] Lun-tó ke-têu ká siên-tî, ngài ke sîm pho-sui; ngài chhiòn-sṳ̂n pi̍t-pi̍t-chhat. Song-chú lâu Kì sṳ̀n-sṳn ke fa sṳ́ ngài chhiong chiú-chui ke ngìn, sṳ́ ngài chhiong pûn-ngìn yung chhin-tô chiú kon-to chui-chui ke ngìn.
[10] Liá thú-thi mân-phien he tui Song-chú mò chûng-sîm ke ngìn. Kì-têu chiông khièn-li̍t nâ-lòi lon-yung, só-hàng só-cho ya tông chit-ok. Yîn-vi Song-chú ke chu-chú, thú-thi fông-liòng, mu̍k-chhòng khû-châu.
[11] Song-chú kóng: Siên-tî lâu chi-sṳ̂ lûng-chúng chhiòn mò kin-khièn; chhiu-he chhai Ngài sṳn-thien tú, Ngài ya khon-tó kì-têu cho fái-sṳ.
[12] Kì-têu hàng ke lu yu-va̍t yu-am; Ngài oi sṳ́ kì-têu thiu-to vang-tó. Kì-têu su chit-fa̍t ke sṳ̀-kiên to lé; Ngài oi kong châi-nan chhai kì-têu sṳ̂n-song. Ngài — Song-chú án-ngiòng siên-pu lé.
[13] Ngài khon-tó Sat-mâ-li-â ke-têu siên-tî ke chhui-ko: Kì-têu fung Pâ-li̍t sṳ̀n-mìn ke miàng kóng yi-ngièn, sṳ́ Ngài ke chṳ́-mìn Yî-set-lie̍t hàng chhâ-lu.
[14] Ngài khon-tó Yâ-lu-sat-lâng ke-têu siên-tî hàn-kha fái: Kì-têu hàng kiên-yìm, kóng fâ-sa̍t, sô-súng ngìn cho fái-sṳ; só-yî mò-ngìn hi-sià kûi-chṳn. Chhai Ngài khon-lòi kì-têu chhiòn-phu lâu Só-tô-mâ-ngìn khiung-yong án-fái, lâu Ngò-mô-lâ-ngìn khiung-yong fú-phai.
[15] Só-yî, lun-tó Yâ-lu-sat-lâng ke-têu siên-tî, Ngài — Song-chú, Van-kiûn ke Ngièn-soi án-ngiòng kóng: Ngài oi sṳ́ kì-têu sṳ̍t fú-kó, lîm thu̍k-súi, yîn-vi kì-têu sṳ́ chhiòn-koet liù-chhòn mò kin-khièn ke fûng-siu̍k.
[16] Song-chú — Van-kiûn ke Ngièn-soi tui Yâ-lu-sat-lâng ngìn-mìn án-ngiòng kóng: “M̀-hó thâng-sin liá-têu siên-tî ke fa; kì-têu pûn ngì-têu ke he ká ke hî-mong. Kì-têu phìn chhṳ-kâ ke nong-sióng kóng yi-ngièn, m̀-he chhòn-kóng Ngài ke fa.
[17] Kì-têu yit-chhṳ̍t tui ke-têu méu-sṳ Ngài ke ngìn kóng: ‘Song-chú kóng, ngì-têu voi phìn-ôn mò-sṳ!’ yu tui ke-têu ngang-kiáng ke ngìn kóng: ‘Ngì-têu m̀-voi tù-tó châi-nan.’ ”
[18] Yâ-li-mí kóng: “Khì-sṳ̍t, liá-têu siên-tî chûng, yû má-ngìn sṳt khî chhai Song-chú ke thiên-thìn chhîn-sṳ̂n thâng Kì kóng-fa nè? Yû má-ngìn ngin-chṳ̂n thâng Kì ke fa nè?
[19] Khon â, Song-chú ke thai fat-khién voi chhiong khòng-fûng fat-sên, chhiong liùng-kién-fûng án-ngiòng chhai fái-ngìn thèu-nà táng lit-lit-chón.
[20] Song-chú ke fun-nu m̀-voi sû chón-hi, chhṳ̍t-to Kì vàn-sṳ̀n chhṳ-kâ só-yû ke kie-va̍k; ke-sṳ̀, ngì-têu chang voi vàn-chhiòn mìn-pha̍k liá-ke sṳ.”
[21] Song-chú kóng: “Ngài mò phai liá-têu siên-tî, he kì-têu chhṳ-kâ chéu-hi ke; Ngài mò pûn kì-têu sin-sit, chúng-he kì-têu yung Ngài ke miàng kóng yi-ngièn.
[22] Na-he kì-têu sṳt chhiong khî chhai Ngài ke thiên-thìn án-ngiòng chiap-su Ngài ke fa, kì-têu chhiu voi hiong Ngài ke chṳ́-mìn chhòn-kóng Ngài ke sin-sit, sṳ́ kì-têu lì-khôi sià-ok ke lu, m̀ cho fái-sṳ.”
[23] Song-chú án-ngiòng kóng: “Ngài he vù-só put-chhai ke Song-ti.
[24] Mò-ngìn yû phan-fap khong hí-lòi, sṳ́ Ngài khon kì m̀-tó. Mò-lun chhai thiên-ngài hói-kok, Ngài — Song-chú lûng-chúng chhai ke-vi.
[25] Ngài thâng-tó ke-têu siên-tî yung Ngài ke miàng phien-ngìn, kì-têu chhṳ-kâ kóng he chhai mung-chûng tet-tó Ngài ke sin-sit.
[26] Ke-têu siên-tî kóng fâ-liâu, cheu chhṳ-kâ sîm-chûng ke kúi-cha lòi phien-ngìn; kì-têu oi phien-to kí-sṳ̀ nè?
[27] Kì-têu chiông chhṳ-kâ pot ke mung fu-siông chhòn lòi chhòn hi, oi sṳ́ Ngài ke chṳ́-mìn m̀ ki-tet Ngài, chhiu-chhiong kì-têu ke chú-siên yîn-vi Pâ-li̍t m̀ ki-tet Ngài.
[28] Pot-mung ke siên-tî yin-kôi kóng kì he pot-mung thin-thin; chúng-he thâng-tó Ngài sin-sit ke siên-tî yin-kôi chûng-sṳ̍t lòi chhòn-kóng Ngài ke sin-sit. Vò-kón lâu ma̍k-é ngióng-pân pí é-tet nè?
[29] Ngài ke sin-sit chhiong tông-mâng ke fó, ya chhiong tá-sui ngàm-sa̍k ke thai thiet-chhùi.
[30] Só-yî, Ngài — Song-chú án-ngiòng kóng: Thâng â, Ngài oi tui-fu liá-pân siên-tî. Kì-têu thai-kâ nâ tui-fông ke fa, chún-cho Ngài ke fa lòi chhòn-kóng.
[31] Thâng â, Ngài oi tui-fu liá-pân siên-tî. Kì-têu ya chiông chhṳ-kâ kóng ke fa tông-cho Ngài ke fa.
[32] Thâng â, Ngài oi tui-fu liá-pân siên-tî. Kì-têu ke mung chhiòn-phu he phien-ngìn ke. Kì-têu kóng-hí liá-têu mung, yung fâ-liâu lâu khoâ-khiéu ke fa chiông Ngài ke chṳ́-mìn tai-ngi̍p chhâ-lu. Ngài pin mò phai kì-têu, ya mò fûn-fu kì-têu. Kì-têu tui Ngài ke chṳ́-mìn chhiòn mò hó-chhu. Ngài — Song-chú án-ngiòng siên-pu lé.”
[33] Song-chú tui Yâ-li-mí kóng: “Na-he Ngài ke chṳ́-mìn, ya-he siên-tî, ya-he chi-sṳ̂ mun ngì: ‘Song-chú yû má-ke me̍t-sṳ?’ ngì oi lâu kì kóng: ‘Ngì-têu chhiu-he Song-chú ke chhûng-tâm; Kì oi chiông ngì-têu fit-thet.’
[34] Na-he yû siên-tî, chi-sṳ̂, ya-he Ngài ke chṳ́-mìn yung ‘Liá he Song-chú ke me̍t-sṳ’ liá-ki fa, Ngài chhiu oi chit-fa̍t kì lâu kì chhiòn-kâ ke ngìn.
[35] Tak-sà yin-kôi mun kì ke lìn-sa lâu hiûng-thi: ‘Song-chú ngióng-pân fì-tap? Song-chú kóng má-ke?’
[36] Kì-têu cho-m̀-tet chai-ko yung ‘Liá he Song-chú ke me̍t-sṳ’ liá-ki fa; má-ngìn chai-ko yung, Ngài chhiu chiông Ngài ke me̍t-sṳ pien-cho kì ke chhûng-tâm! Kì-têu án-ngiòng chhiu-he lám-sám yung kì-têu ke Song-ti — Song-chú, Van-kiûn ke Ngièn-soi, yún-sên Song-ti ke fa-ngî lé.
[37] Yâ-li-mí â, ngì oi mun ke-pân siên-tî: ‘Song-chú en ngì-têu ke he má-ke? Song-chú hiong ngì-têu kóng má-ke?’
[38] Na-he kì-têu vì-poi Ngài ke min-lin, yung ‘Liá he Song-chú ke me̍t-sṳ’ liá-ki fa, ngì chhiu lâu kì-têu kóng,
[39] Ngài yit-thin voi chiông kì-têu chún-cho chhûng-tâm khià hí-lòi, chiông kì-têu lièn Ngài su-pûn kì-têu lâu kì-têu chú-siên ke sàng-sṳ chhiòn-phu tui Ngài mien-chhièn fit chhut-hi.
[40] Ngài oi sṳ́ kì-têu yún-kiú kien-seu, yún-yén su vú-yu̍k, he mò phan-fap m̀ ki-tet ke vú-yu̍k.”