[1] Ayiwa siya min na sigi jamana saheli yanfan fɛ, o dancɛ bɛ tɛmɛn Hetlon fɛ fo ka taa se Hamat donda la ka taa Hazor-Enon. O yɔrɔ kɔrɔn yanfan fɛ dancɛ bɛ bɔ Kɔgɔjiba fɛ. O yɔrɔw na kɛ Dan siya ta ye.
[2] Ka bɔ Dan kɔrɔn fɛ dancɛ la ka taa tilebi fɛ, o na kɛ Asɛr siya ta ye.
[3] Ka bɔ Asɛr kɔrɔn fɛ dancɛ la ka taa tilebi fɛ, o na kɛ Nefitali siya ta ye.
[4] Ka bɔ Nefitali kɔrɔn fɛ dancɛ la ka taa tilebi fɛ, o na kɛ Manase siya ta ye.
[5] Ka bɔ Manase kɔrɔn fɛ dancɛ la ka taa tilebi fɛ, o na kɛ Efrayim siya ta ye.
[6] Ka bɔ Efrayim kɔrɔn fɛ dancɛ la ka taa tilebi fɛ, o na kɛ Rubɛn siya ta ye.
[7] Ka bɔ Rubɛn kɔrɔn fɛ dancɛ la ka taa tilebi fɛ, o na kɛ Juda siya ta ye.
[8] Ka bɔ Juda kɔrɔn fɛ dancɛ la ka taa tilebi fɛ, o na kɛ yɔrɔ bilalen ye a dan na. O bonya na kɛ kilomɛtɛrɛ tan ni fila ani tila ye. A janya ni tɔw na kɛɲɛ ka bɔ kɔrɔn fɛ ka taa tilebi fɛ. Ne ka yɔrɔ senuma na kɛ o yɔrɔ cɛmancɛ la.
[9] Aw na niyɔrɔ min bila a dan na ka kɛ Matigi ta ye, o janya ka kɛ kilomɛtɛrɛ tan ni fila ani tila ye. A bonya ka kɛ kilomɛtɛrɛ duuru ye.
[10] O niyɔrɔ senuma na kɛ sarakalasebaaw sigiyɔrɔ ye. A saheli yanfan janya na kɛ kilomɛtɛrɛ tan ni fila ani tila ye. A tilebi yanfan bonya na kɛ kilomɛtɛrɛ duuru ye. A kɔrɔn yanfan bonya na kɛ kilomɛtɛrɛ duuru ye. A worodugu janya na kɛ kilomɛtɛrɛ tan ni fila ani tila ye. Matigi ka yɔrɔ senuma na kɛ o cɛmancɛ la.
[11] O yɔrɔ na kɛ Zadɔk bɔnsɔn sarakalasebaa senumaw ta ye, olu minw ye ne ka sariyaw mara, minw ma u yɛrɛw lafili Israɛl bɔnsɔn ni Levite tɔw ka lafili waati la.
[12] Sigiyɔrɔ dɔ ka bila a dan na ka kɛ yɔrɔ senuma ye Levitew dancɛ kɛrɛ fɛ.
[13] K'a masɔrɔ Levitew sigiyɔrɔ na kɛ sarakalasebaaw dancɛ la. O janya na kɛ kilomɛtɛrɛ tan ni fila ani tila ye. A bonya na kɛ kilomɛtɛrɛ duuru ye. O yɔrɔw bɛɛ janya na kɛ kilomɛtɛrɛ tan ni fila ani tila ye. U bonya na kɛ kilomɛtɛrɛ duuru ye.
[14] U tɛ se ka a dugukolo si feere, u tɛ se ka a dugukolo falen. U tɛ se k'a di mɔgɔ wɛrɛ ma sabu o yɔrɔ bilara Matigi ye ka kɛ fɛn senuma ye.
[15] Yɔrɔ min bɛ cɛmancɛ la, ni o janya ye kilomɛtɛrɛ tan ni fila ani tila ye, ni o bonya ye kilomɛtɛrɛ fila ani tila ye, o tɛ yɔrɔ senuma ye sabu dugu na sigi o cɛmancɛ la ka kɛ mɔgɔw sigiyɔrɔw ni a lamini yɔrɔw ye.
[16] O dugu sumani dan filɛ nin ye. A saheli yanfan janya na kɛ nɔnkɔnɲɛ waa naani ani kɛmɛ duuru ye, a worodugu yanfan na kɛ nɔnkɔnɲɛ waa naani ani kɛmɛ duuru ye. A kɔrɔn yanfan na kɛ nɔnkɔnɲɛ waa naani ani kɛmɛ duuru ye. A tilebi yanfan na kɛ nɔnkɔnɲɛ waa naani ani kɛmɛ duuru ye.
[17] Kɛnɛ min bɛ bila ka dugu lamini, o saheli yanfan bonya na kɛ nɔnkɔnɲɛ kɛmɛ fila ni biduuru ye. Worodugu yanfan bonya na kɛ nɔnkɔnɲɛ kɛmɛ fila ni biduuru ye. Kɔrɔn yanfan bonya na kɛ nɔnkɔnɲɛ kɛmɛ fila ni biduuru ye. Tilebi yanfan bonya na kɛ nɔnkɔnɲɛ kɛmɛ fila ni biduuru ye.
[18] Kɛnɛ tɔ min bɛ kɛrɛ fila fɛ, kilomɛtɛrɛ duuru min bɛ o ni kɔrɔn cɛ ani kilomɛtɛrɛ duuru min bɛ o ni tilebi cɛ, olu na sɛnɛ ka kɛ dugu kɔnɔ baarakɛlaw ka balo ye.
[19] Minw bɛ baara kɛ dugu kɔnɔ ka bɔ Israɛl siyaw bɛɛ la, olu na o yɔrɔw sɛnɛ.
[20] O yɔrɔw bɛɛ lajɛlen janya na kɛ kilomɛtɛrɛ tan ni fila ani tila ye. O bonya na kɛ kilomɛtɛrɛ tan ni fila ani tila ye. Aw ka o tila naaninan kɛ dugu sigiyɔrɔ ye.
[21] A tɔ min tora, o na kɛ kuntigi ta ye. Kɛnɛ min bɛ yɔrɔ senuma ni dugu sigiyɔrɔ fan na, o min dancɛ ye kilomɛtɛrɛ tan ni fila ani tila ye, ka bɔ o la ka se kɔrɔn fɛ dancɛ ma ani o ɲɔgɔn kɛnɛ min bɛ yɔrɔ senuma ni dugu sigiyɔrɔ fan dɔ la, o fana dancɛ ye kilomɛtɛrɛ tan ni fila ani tila ye, ka bɔ o la ka taa tilebi yanfan dancɛ la siyaw niyɔrɔ kɛrɛ fɛ, o bɛɛ na kɛ kuntigi ta ye. Niyɔrɔ senuma ani Alabatosoba senuma na kɛ a cɛmancɛ la.
[22] Ka bɔ Juda dancɛ la fo ka taa se Benjamɛn dancɛ ma, o furancɛ bɛɛ na kɛ kuntigi ta ye fɔ o Levitew sigiyɔrɔ ani dugu sigiyɔrɔ.
[23] A yɔrɔ tɔw na kɛ siya tɔw ta ye. Ka bɔ kɔrɔn fɛ ka taa se tilebi fɛ dancɛ ma, o na kɛ Benjamɛn siya ta ye.
[24] Ka bɔ Benjamɛn kɔrɔn fɛ dancɛ la ka taa tilebi fɛ, o na kɛ Simeɔn siya ta ye.
[25] Ka bɔ Simeɔn kɔrɔn fɛ dancɛ la ka taa tilebi fɛ, o na kɛ Isakar siya ta ye.
[26] Ka bɔ Isakar kɔrɔn fɛ dancɛ la ka taa tilebi fɛ, o na kɛ Zabulɔn siya ta ye.
[27] Ka bɔ Zabulɔn kɔrɔn fɛ dancɛ la ka taa tilebi fɛ, o na kɛ Gad siya ta ye.
[28] Gad worodugu yanfan dancɛ bɛ tɛmɛn Tama fɛ ka taa worodugu yanfan fɛ fo ka taa se Meriba-Kadɛs ji yɔrɔ la ka taa kɔji bila yɔrɔ la Kɔgɔjiba la.
[29] Matigi Ala ko: «Jamana tilatilara Israɛl siyaw cɛ ka kɛɲɛ ni kala dali ye cogo min na, o filɛ nin ye. O na kɛ aw niyɔrɔw ye.»
[30] Ayiwa dugu dondaw cogo filɛ nin ye. Dugu saheli yanfan janya na kɛ nɔnkɔnɲɛ waa naani ani kɛmɛ duuru ye.
[31] Dugu dondaw bɛ kɛ ka kɛɲɛ ni Israɛl siyaw tɔgɔw ye. Da saba na kɛ saheli yanfan fɛ, Rubɛn ka da kelen, Juda ta kelen ani Levi ka da kelen.
[32] Dugu kɔrɔn yanfan janya na kɛ nɔnkɔnɲɛ waa naani ni kɛmɛ duuru ye. Da saba na kɛ yen fɛ, Yusufu ka da kelen, Benjamɛn ta kelen ani Dan ka da kelen.
[33] Dugu worodugu yanfan janya na kɛ nɔnkɔnɲɛ waa naani ani kɛmɛ duuru ye. Da saba na kɛ yen fɛ, Simeɔn ka da kelen, Isakar ta kelen ani Zabulɔn ka da kelen.
[34] Dugu tilebi yanfan janya na kɛ nɔnkɔnɲɛ waa naani ani kɛmɛ duuru ye. Da saba na kɛ yen fɛ, Gad ka da kelen, Asɛr ta kelen ani Nefitali ka da kelen.
[35] Dugu lamini kogo janya na kɛ nɔnkɔnɲɛ waa tan ni segin ye. Kabini o don na, dugu tɔgɔ na da ko: «Matigi bɛ yen.»