[1] E kɔni, i ka nin maɲumatɔkan fɔ Israɛl bɔnsɔn ka kuntigiw ko la ko:
[2] «I ba tun ye mun ye ka kɔrɔ? A kɛra i ko warabamuso min bugura warabaw cɛma. A ye a denw lamɔ waraba kamalenw cɛma.
[3] A ye a den dɔ lamɔ, o kɛra waraba kamalen ye. A ba ye a dege sogo minɛ la, o ye mɔgɔw dun.
[4] Nka siyaw ye o kibaru mɛn, u y'a labi dingɛ kɔnɔ. U ye karafɛ don a da la ka taa n'a ye Misira jamana la.
[5] Warabamuso y'a ye ko a ka makɔnɔli kɛra fuu ye minkɛ, ko a jigi tigɛra, a ye a den dɔ wɛrɛ ta ka o labalo ka kɛ waraba kamalen ye.
[6] O taamana waraba tɔw cɛma ka kɛ waraba kamalen ye. A ba y'a dege sogo minɛ la, o ye mɔgɔw dun.
[7] A ye u ka masaya sow tiɲɛn ka u ka duguw ci. Jamana ni a kɔnɔ mɔgɔw bɛɛ ja tigɛra a konbokan kosɔn.
[8] A dafɛ siyaw bɛɛ ye u labɛn a kɛlɛli kama. U ye u ka jɔw da a ɲɛ, a bira u ka dingɛ kɔnɔ.
[9] U ye karafɛ don a da la k'a bila sansaraba dɔ kɔnɔ, ka taa n'a ye Babilonɛ masakɛ yɔrɔ. U y'a bila kɛlɛ kunbɛn so dɔ kɔnɔ, walisa a mankan kana mɛn Israɛl bɔnsɔn ka kuluw si kan.
[10] «I ba tun bɛ i ko rezɛn sun turulen baji da la. Den caman ni bolo caman tun b'a la ji caman kosɔn.
[11] A bolow barika tun ka bon, u kɛra masakɛw ka masaya berew ye. A janyara ka tɛmɛn a kɛrɛfɛ jiriw bɛɛ kan. A tun bɛ ye yɔrɔ jan, a bolow janya ni u caya kosɔn.
[12] Nka a samana ka bɔ yen dimiya kosɔn k'a fili duguma. Kɔrɔnfɛ fiɲɛ ye a denw ja, a bolobaw tigɛra ka u ja. Tasuma ye u jeni.
[13] Sisan a turula kungokolon kɔnɔ, dugukolo jalen jintan na.
[14] Tasuma bɔra a ju la ka a bolow ni a denw jeni. Boloba si t'a la min bɛ se ka kɛ masaya bere ye tun.» Nin ye maɲumatɔkan ye. A na to ka kɛ maɲumatɔkan ye.