[1] O kɔ, cɛ taara ni ne ye kɔrɔn yanfan donda la.
[2] Ne ye Israɛl ka Ala nɔɔrɔ natɔ ye ka bɔ kɔrɔn yanfan fɛ. A kan bɔlen tun bɛ jiba mankan fɛ. Dugukolo yɔrɔ bɛɛ fara a nɔɔrɔ la.
[3] Ne ye yeli fɛn min ye, o bɛ i ko yeli fɛn min y'i jira ne la dugu cili kiraya kɛ tuma la. Ne ye yeli fɛn min ye Kebar ba da la ani o ye kelen ye. O tuma la ne ye ne bi ka neɲɛda biri duguma.
[4] Matigi nɔɔrɔ donna Alabatosoba kɔnɔ kɔrɔn yanfan fɛ donda fɛ.
[5] Ala Ni ye ne kɔrɔta ka ne ladon so kɔnɔ dukɛnɛ la. Ne y'a ye ko Matigi nɔɔrɔ ye Alabatosoba fa.
[6] Ka cɛ jɔlen to ne kɛrɛ fɛ, ne ye kumakan dɔ mɛn ka bɔ Alabatosoba kɔnɔ.
[7] A ko: «Hadamaden, yan ye ne ka masasigilan sigi yɔrɔ de ye. Ne senda yɔrɔ filɛ nin ye. Ne na sigi Israɛl cɛma badaa. Israɛl bɔnsɔn ni u ka masakɛw tɛna ne tɔgɔ senuma nɔgɔ ni u ka boli batoli ni u ka masakɛw suw ye batoli kɛ yɔrɔw la tun,
[8] sabu u ye u ka batoli yɔrɔw jɔ ne ka batoli yɔrɔ la. U ka daw bɛ ne ka daw kɛrɛ fɛ. Kogo dama tun bɛ u ni ne cɛ. U ye ne tɔgɔ senuma nɔgɔ ni u ka ko haramulen kɛlenw ye. O de kosɔn ne diminnen ye u halaki ka u ban.
[9] Sisan Israɛl bɔnsɔn na u ka boli batoli dabila ka u ka masakɛw suw janya ne la. Ni o kɛra ne na sigi u cɛma badaa.
[10] «Hadamaden, i ka nin Alabatosoba ko fɔ Israɛl ka so ye walisa u ka maloya u ka tilenbaliyaw kosɔn. Ko u ka nin Alabatosoba jɔ cogo jate minɛ kosɛbɛ.
[11] Ni u maloyara u ka ko kɛlenw bɛɛ kosɔn tuma min na, i ka nin Alabatosoba jɔ cogoɲɛ fɔ u ye, a jɔ yɔrɔ ni a bɔdaw ni a dondaw ani a cogow bɛɛ ni a laadaw bɛɛ ani a ko kɛ cogow ni a jɔli sariyaw bɛɛ. I ka a bisigi dila u ɲɛ na walisa u ka a ci fɔlenw ni a ko latigɛlenw mara ka u ka batoli cogo kɛɲɛ ni o ye.
[12] Alabatosoba sariya jɔnjɔn filɛ nin ye. A lamini yɔrɔ min bɛ kulu san fɛ, o bɛɛ ka senu. O ye Alabatosoba sariya ye.
[13] «Saraka bɔlan suma cogo filɛ nin ye. A bɛ suma ni nɔnkɔnɲɛ min ye, o ka jan ni nɔnkɔn yɛrɛ ye ni tɛgɛfura dayɔrɔ kelen ye. A jusigilan kundama ka kɛ nɔnkɔnɲɛ kelen ye. A bonya fana ka kɛ nɔnkɔnɲɛ kelen ye. A dawolo kirinkirin min bɛ kɛ k'a lamini, o bonya ka kɛ sibiriɲɛ kelen ye. Saraka bɔlan jusigilan filɛ o ye.
[14] Ka bɔ a ju la duguma fo ka taa se a cɛmancɛ kogo kundama ma, o ka kɛ nɔnkɔnɲɛ fila ye. A bonya ka kɛ nɔnkɔnɲɛ kelen ye. Ka bɔ cɛmancɛ kogo la ka se san fɛ, o ka kɛ nɔnkɔnɲɛ naani ye. Sanfɛ dawolo bonya ka kɛ nɔnkɔnɲɛ kelen ye.
[15] Saraka bɔlan jɔ kundama ka kɛ nɔnkɔnɲɛ naani ye. Biɲɛkolow ka kɛ a seleke naani la.
[16] A tasuma kɛ yɔrɔ janya ka kɛ nɔnkɔnɲɛ tan ni fila ye. A bonya ka kɛ nɔnkɔnɲɛ tan ni fila ye. A fan bɛɛ ka kɛɲɛ.
[17] A dawolo janya ni a bonya ka kɛɲɛ. A fan naani bɛɛ ka kɛ nɔnkɔnɲɛ tan ni naani-naani ye. A dawolo lamini kirinkirin bonya ka kɛ nɔnkɔnɲɛ tilancɛ ye. A jusigilan ka kɛ nɔnkɔnɲɛ kelen ye. A yɛlɛnyɛlɛnnan ka kɛ kɔrɔn yanfan fɛ.»
[18] O cɛ y'a fɔ ne ye ko: «Hadamaden, Matigi Ala ko: ‹Ni u bɛ saraka bɔlan dila don min na walisa u ka saraka jenitaw bɔ u kan ka joli seriseri a kan, o sariyaw filɛ ninw ye.›
[19] Matigi Ala ko: ‹Zadɔk siya la Levite minw bɛ sarakalasebaaya baara kɛ ne ye, i ka nturabɔlan kelen di olu ma. U ka o lase ka kɛ jurumu yafa saraka ye.
[20] I ka o joli minɛ ka o kɛ saraka bɔlan biɲɛkolo naani kan ani a dawolo seleke naani ani a lamini dawolow kan ka saraka bɔlan saniya ka a bila Ala ye.
[21] I ka ntura kelen minɛ ka o kɛ jurumu yafa saraka ye. O na jeni Alabatosoba yɔrɔ latigɛlen na yɔrɔ senuma kɔ fɛ.
[22] A tile filanan don, i ka bakɔrɔ fiɲɛntan dɔ kɛ jurumu yafa saraka ye walisa ka saraka bɔlan saniya i ko u y'a saniya ni ntura ye cogo min na.
[23] Ni i tilara a saniyali la tuma min na, i ka nturabɔlan fiɲɛntan dɔ ani sagajigi fiɲɛntan dɔ minɛ bagankuluw la ka olu kɛ saraka ye.
[24] I ka na ni u ye Matigi ɲɛ kɔrɔ. Sarakalasebaaw ka kɔgɔ seri u kan ka u kɛ saraka jenitaw ye Matigi ye.
[25] I ka bakɔrɔ kelen kɛ jurumu yafa saraka ye don o don tile wolonwula kɔnɔ, u ka nturabɔlan fiɲɛntan kelen ni sagajigi fiɲɛntan kelen fana bɔ bagankuluw la ka olu kɛ saraka ye o donw bɛɛ la.
[26] Saraka bɔlan jɛyali na kɛ tile wolonwula kɔnɔ ka a saniya ka a bila Ala ye.›
[27] Matigi Ala ko: ‹O donw tɛmɛnnen kɔ, k'a daminɛ a tile seginnan don na, ni sarakalasebaaw bɛ aw ka saraka jenitaw ni aw ka barika dali sarakaw lase o saraka bɔlan kan, ne na sɔn aw la.›» Matigi Ala ko ten.