[1] Matigi ka kuma sera ne ma ko:
[2] «Hadamaden, i ka i ɲɛ sin Israɛl jamana kuluw ma ka kiraya kɛ u kama.
[3] I k'a fɔ ko: ‹Israɛl ka kuluw, aw ka Matigi Ala ka kuma lamɛn.› Matigi Ala y'a fɔ kuluw ni tintinw ani kulu furancɛw ni jɛkɛnɛw ko la ko: ‹A filɛ, ne na npan kɔrɔta aw kama ka aw ka batoli kɛ yɔrɔw ci.
[4] Aw ka saraka bɔlanw na ci, aw ka tile bato samasenw na karikari, ne na aw ka mɔgɔ fagalenw suw fili aw ka boliw kɔrɔ.
[5] Ne na Israɛl bɔnsɔn suw bila u ka boliw kɔrɔ ka u ka kolow jɛnsɛn u ka saraka bɔlanw fan bɛɛ la.
[6] Aw sigilen bɛ yɔrɔ minw na, o duguw bɛɛ na kɛ tomon ye, batoli kɛ yɔrɔw na ci ka aw ka saraka bɔlanw fili ka u tiɲɛn. Aw ka boliw na karikari ka u ban. Aw ka tile samasenw na karikari, aw bolo baara nɔw bɛɛ na ban.
[7] Mɔgɔ caman na faga ka bi aw cɛma. Aw n'a dɔn ko ne ye Matigi de ye.
[8] ‹O bɛɛ n'a ta ni aw jɛnsɛnna jamanaw kɔnɔ tuma min na, ne na aw la mɔgɔ dɔɔninɲɛnama to minw na kisi npan ma.
[9] Aw la mɔgɔ kisilen minw na kɛ jɔnw ye siyaw cɛma, olu na u hakili jigin ne la. U ye jatɔya kɛ u dusukun na ka u ɲɛ jɔ u ka bato fɛn dilalenw na, o de kosɔn ne ye u dusukun jogin olu kosɔn. U naɲigin u yɛrɛw la u ka ko jugu kɛtaw kosɔn ani u ka ko haramulenw kɛli kosɔn.
[10] U n'a dɔn ko ne ye Matigi de ye, ko ne ye bɔnɛ ko minw fɔ u kama, ko olu ma fɔ fuu.›»
[11] Matigi Ala ko: «I ka i tɛgɛ ciɲɔgɔn na ka dugukolo tan ni i senw ye ka kulo ko: ‹Israɛl ka so na halaki ni npan ni kɔngɔba ni fiɲɛbana ye a ka juguya ni a ka ko haramulen dama tɛmɛnnenw kosɔn.
[12] Mɔgɔ min yɔrɔ ka jan, o na faga fiɲɛbana fɛ, min yɔrɔ ka surun, o na faga npan fɛ. U la mɔgɔ minw ɲɛnama tora dugu kɔnɔ, kɔngɔba na olu faga. Ne dusu bɔlenba na u nɔgɛn.
[13] U ka mɔgɔw suw na da u ka boliw cɛma ani u ka saraka bɔlanw laminiw na, tintinw ni kulu janw bɛɛ kan ani jirisunw ni sɛn sunw kɔrɔ ani u ka wusulan suma duman saraka bɔ yɔrɔw bɛɛ la. O tuma la aw n'a dɔn ko ne ye Matigi de ye.
[14] Ne na ne bolo kɔrɔta u kama ka u sigiyɔrɔw bɛɛ kɛ tomonw ye ka u lankolonya ka tɛmɛn Diblat kungokolon kan. U n'a dɔn o la ko ne ye Matigi de ye.›»