[1] Ayiwa Matigi ka kuma sera ne ma ko:
[2] «Hadamaden, i ka Jerusalɛm ka ko haramulenw jira a la
[3] k'a fɔ a ye ko Matigi Ala y'a fɔ Jerusalɛm ko la, ko: «I bɔ yɔrɔ ni i bange yɔrɔ ye Kanan jamana ye. I fa tun ye Amɔr bɔnsɔn ye, i ba tun ye Hɛti bɔnsɔn ye.
[4] I bangera don min na, i barajuru tun ma tigɛ. I tun ma ko ji la ka i jɛya. I tun ma mun ni kɔgɔ ye, fini ma meleke i la.
[5] Mɔgɔ si ma hinɛ i la ka janto i la, nka i fililen tun bɛ kungo kɔnɔ i bange don na, sabu u tun ye i mangoya.
[6] «Ne tɛmɛntɔ i kɛrɛ fɛ, ne ye i kolonkolontɔ ye joli la. Ne y'a fɔ i ye ko i kaɲɛnamaya ka i to joli cɛma. Ne segira a kan ko i kaɲɛnamaya ka i to joli cɛma.
[7] Ne ye i jiidi i ko kungo kɔnɔ bin. I bonyara ka i cɛɲɛ kosɛbɛ. I kɔgɔ fara, i sera furu ma nka i farilankolon tun don.
[8] «Ayiwa, ne tɛmɛntɔ ye i lajɛ. Ne y'a ye ko i sera furu ma. Ne ye ne ka dulɔkiba biri i la ka i farilankolon datugu. Ne ye ne kali i ye ka layidu ta i ye. I kɛra ne ta ye.» Matigi Ala ko ten.
[9] «Ne ye i ko ji la ka joliw bɛɛ ko ka bɔ i fari la ka i mun ni tulu ye.
[10] Ne ye i fɛɛrɛbɔ ni fini sɔgɔlenw ye ka golo sabara bagalen don i sen na ka i cɛ siri jala kɛ lenfu fini ye ka suwa fini biri i kan.
[11] Ne ye masiri fɛnw don i la ka bololanɛgɛw don i bolo la ka kɔnɔnw don i kan na
[12] ka nunnanɛgɛ don i nun na ka tulolanɛgɛw don i tulow la ka jalamugu nɔɔrɔmaɲuman siri i kun na.
[13] I masirila ni sanu ni warijɛ ye. I ka finiw tun ye lenfu finiw ni suwa finiw ni fini sɔgɔlenw ye. I balo kɛraɲɔ mugu bɛɛ laɲuman ni di ani tulu ye. I cɛ tun ka ɲi fo ka dama tɛmɛn. I ye bonya sɔrɔ i ko masakɛ den.
[14] I tɔgɔ bɔra siyaw bɛɛ cɛma i cɛɲɛ kosɔn sabu i dafalen tun bɛ, i cɛ tun ka ɲi haali. Ne ye i masiri ten.» Matigi Ala ko ten.
[15] «Nka i ye i jigi da i cɛɲɛ kan. I ye jatɔya kɛ i tɔgɔ bɔli kosɔn. I ye tɛmɛnbaaw bɛɛ kanu ka i yɛrɛ di u ma.
[16] I ye yɔrɔ kɔrɔtalenw masiri ni i ka fini dɔw ye ka i yɛrɛ don kakalaya la, min ɲɔgɔn tun ma kɛ ka kɔrɔ, a ɲɔgɔn tɛna kɛ tun.
[17] Ne ye masiri fɛnɲumanɲuman minw di i ma, i ye o sanu ni warijɛ ta ka cɛ bisigiw dila ni u ye ka i biri olu kɔrɔ ka u bato.
[18] I ye i ka fini sɔgɔlenw ta ka olu don o jaw la ka ne ka tulu ni ne ka suma diyalan mana ta ka olu kɛ sarakaw ye o jaw ye.
[19] Ne ye muguɲumanɲuman min di i ma ka kɛ i balo ye, i ye o buuru ta ani tulu ni di ka olu bɛɛ kɛ wusulan suma duman ye o boliw ye. A kɛra ten dɛ.» Matigi ko ten.
[20] «I ye denkɛ ni denmuso minw bange ne ye, i ye olu kɛ saraka fagataw ye o boliw ye, olu ka kɛ u balo ye. I ka kakalaya kow tun ka dɔgɔ i ɲɛ na wa?
[21] fo i ye ne denkɛw faga ka u di boliw ma ka u jeni.
[22] Ka i to i ka ko haramulenw ni i ka jatɔya kɛli la, i ma miiri i ka denmisɛnya donw na, k'a sɔrɔ i farilankolon tun don, foyi tun tɛ i la, i fililen tun bɛ i joli la.»
[23] Ayiwa Matigi Ala ko: «Bɔnɛ bɛ i ye, i ka kɛwale jugu kɛlenw kosɔn. Bɔnɛ bɛ i ye.
[24] I ye so jɔ jatɔya kama ka batoli kɛ yɔrɔw jɔ dugu fɛrɛkɛnɛw bɛɛ la.
[25] I ye batoli kɛ yɔrɔw jɔ dugu bɔlɔnw kunbɛn yɔrɔw bɛɛ la ka i ka cɛɲɛ cogo tiɲɛn k'a masɔrɔ i ye jatɔya kɛ tɛmɛnbaaw bɛɛ fɛ.
[26] I ye jatɔya kɛ i sigiɲɔgɔn Misira jamana kamalen barikamaw fɛ ka ne dusu bɔ ni i ka jatɔya dama tɛmɛnnenw ye.
[27] O de kosɔn ne ye ne bolo kɔrɔta i kama ka i niyɔrɔ dɔgɔya ne fɛ ka i don i juguw Filisitikaw bolo. Olu yɛrɛ maloyara i taama cogo juguw kosɔn.
[28] «I ye jatɔya kɛ Asirikaw fɛ sabu i ma wasa. I tilalen jatɔya kɛli la u fɛ, o ma i wasa.
[29] K'a masɔrɔ i ye nɔgɔlenya ko caman kɛ Kanankaw fɛ ka taa se Kalde jamana ma. Olu si ma i wasa.
[30] «I dusukun nɔrɔlen tora nin jatɔya kow la ka nin kɛwale juguw kɛ tuma bɛɛ.
[31] I ye sungurunba sow jɔ dugu bɔlɔnw kunbɛn yɔrɔw bɛɛ la. I ye batoli kɛ yɔrɔw jɔ yɔrɔw bɛɛ la, i ma kɛ i ko jatɔmuso min bɛ wari ɲini.
[32] I ye i cɛ bila ka jatɔya kɛ dunanw fɛ.
[33] Jatɔmusow bɛɛ bɛ sara nka e de bɛ nili fɛnw di i kanubaaw ma. I ye wari di u ma walisa u ka na ka bɔ fan bɛɛ la ka jatɔya kɛ i fɛ.
[34] I ni muso tɔw ka jatɔya cogo tɛ kelen ye katuguni cɛ si tɛ i ɲini. I bɛ cɛw sara, cɛw tɛ i sara. O de y'a to i ni tɔw tɛ kelen ye.»
[35] O de kosɔn, jatɔmuso Jerusalɛm, i ka Matigi ka kuma lamɛn.
[36] Matigi Ala ko: «I ka nafolo tiɲɛnna. I farilankolon yera i ka kakalaya kosɔn i kanubaaw fɛ ani i ka boli haramulenw fɛ. I ye i denw kɛ saraka ye olu ye.
[37] O de kosɔn ne na i jɛɲɔgɔnw bɛɛ lajɛ yɔrɔ kelen na, olu minw ko ka di i ye ani i ye minw kanu ani i ye minw koniya. Ne na olu bɛɛ lajɛ i kama ka bɔ fan bɛɛ la. Ne na i farilankolon jira u la, u bɛɛ na a ye.
[38] Ne diminnen na kiri tigɛ i kan i ko kiri bɛ tigɛ jatɔmuso ni mɔgɔ fagamuso kan cogo min na. Ne ka dimiya ni ne ka keleya kosɔn, ne na i sara kɛ saya ye.
[39] Ne na i don i juguw bolo, olu na i ka sungurunba sow ci ka i ka batoli kɛ yɔrɔw ci ka i ka finiw farafara ka i ka masiri finiɲumanw bɔ i la ka i farilankolon bila.
[40] «U na jamaba bila ka taa i nɔ fɛ ka i bon ni kabakurunw ye ka i sɔgɔ ni u ka npanw ye.
[41] U na i ka sow jeni ni tasuma ye ka kiri tigɛ i kan muso camanɲɛ na. Ne na i ka jatɔya kow ban ten, i tɛna i kanubaaw sara tun.
[42] Ni ne ye ne ka dimiya bi i kan tuma min na, i keleya tɛna ne minɛ tun, ne ka dimiya na mada. Ne dusu tɛna bɔ tun.
[43] Ne ye min kɛ i ye i ka denmisɛnya waati la, i ma i hakili to o la, nka i ye ne dusu dimin ni i ka kɛwalew ye. O de kosɔn ne na i ka kɛwalew doni da i kan. I ma kakalaya fara i ka ko haramulen tɔw bɛɛ kan wa?» Matigi Ala ko ten.
[44] «A filɛ, ntalen dalaw bɛ na nin ntalen da i la ko: ‹Denmuso ni a ba jogo ka kan.›
[45] Muso min ɲiginna a cɛ ni a denw na, i ye o denmuso ye. I bɛ i ko i balimamuso tɔ minw ɲiginna u cɛw ni u denw na. Aw ba tun ye Hɛti bɔnsɔn ye, aw fa tun ye Amɔr bɔnsɔn ye.
[46] I kɔrɔmuso min sigilen bɛ saheli yanfan fɛ, o ye Samari ni a dafɛ duguw ye. I dɔgɔmuso min sigilen bɛ worodugu yanfan fɛ, o ye Sodɔmɛ ni a dafɛ duguw ye.
[47] I ma dan olu ka siraw taama ni u ka ko haramulenw kɛli ma, olu ta tun ka dɔgɔ i ɲɛ na. I ye i yɛrɛ toli ka tɛmɛn olu kan i taama cogo jugu kosɔn.»
[48] Matigi Ala ko: «Neɲɛnama tɔgɔ kosɔn, i balimamuso Sodɔmɛ ni a dafɛ duguw ma se ka e ni i dafɛ duguw ka kɛtaw kɛ.
[49] O cogo la, i balimamuso Sodɔmɛ tun bɛ taama kuncɛbaya ni dumuniɲumanw ni salaya ni lafiya la. A ni a dafɛ duguw ma sɛgɛnbaatɔw ni faantanw dɛmɛ.
[50] U kuncɛ bonyara ka ko haramulenw kɛ ne ɲɛ kɔrɔ. O de kosɔn kabini ne ye olu bɛɛ ye, ne ye u halaki ka bɔ ne ɲɛ kɔrɔ.
[51] «I ye ko haramulen minw kɛ ka i yɛrɛ jalaki i ka jatɔya kow la, hali Samari ma o tilancɛ kɛ. I balimamusow Sodɔmɛ ni Samari tilennen bɛ ka tɛmɛn i kan i ka tilenbaliya ko dama tɛmɛnnenw kosɔn.
[52] E min ye i balimamusow jalaki, i na i yɛrɛ ka maloya kow doni ta. I ye i jogo juguya ka tɛmɛn u kan. U tilennen bɛ ka tɛmɛn i kan. O de kosɔn i ka maloya ka i kun suuli sabu i taama cogo ye i balimamusow kɛ tilennenw ye.»
[53] Matigi ko: «Sodɔmɛ ni a dafɛ duguw ani Samari ni a dafɛ duguw ani i ka mɔgɔ minw bɛ jɔnya la u cɛma, ne na olu kɔsegin ka bɔ jɔnya la,
[54] walisa i ka i yɛrɛ ka maloya kow doni ta k'a masɔrɔ i ka ko kɛtaw ye u dusu suma.
[55] I balimamusow, Sodɔmɛ ni a dafɛ duguw na segin u cogo kɔrɔ la. Samari ni a dafɛ duguw na segin u cogo kɔrɔ la. E ni i dafɛ duguw na segin aw cogo kɔrɔ la.
[56] I da tun tɛ i balimamuso Sodɔmɛ tɔgɔ fɔ i ka kuncɛbaya waati la,
[57] sani i ka juguya ka bɔ kɛnɛkan. Nka sisan, Sirikaw ka duguw ni u dafɛ duguw ani Filisitikaw ka duguw bɛ i mafiɲɛya. U ye i mangoya fan bɛɛ la.
[58] I ka tilenbaliya kow ni i ka ko haramulenw na kɛ doniba ye i kun.» Matigi Ala ko ten.
[59] Ɔwɔ, Matigi Ala ko: «I ye min kɛ ne la ka i ka kalili ni i ka layidu tiɲɛn, ne na o ɲɔgɔn kɛ i la.
[60] O bɛɛ n'a ta, ne ye layidu min ta i denmisɛnma ye, ne na o sigi ka kɛ layidu wulibali ye i ye.
[61] Ni i ye i balimamusow, i kɔrɔmusow ni i dɔgɔmusow sɔrɔ tuma min na, o tuma la i hakili na jigin i ka siraw la, i na maloya. Ne na u di i ma ka kɛ i denmusow ye, nka o tɛ kɛ i ka layidu kosɔn.
[62] Ne na ne ka layidu dafa i ye, i n'a dɔn ko ne ye Matigi de ye.
[63] O tuma la i hakili na jigin i taama cogo kɔrɔ la ka maloya. Ni ne ye i ka ko kɛlenw bɛɛ yafa i ma tuma min na, i tɛna se ka i da yɛlɛ, i maloyalen na to.» Matigi Ala ko ten.