[1] San tan ni filanan kalo tan ni filanan tile fɔlɔ don, Matigi ka kuma sera ne ma ko:
[2] «Hadamaden, i ka nin maɲumatɔkan fɔ Misira masakɛ Faraon kosɔn k'a fɔ a ye ko: ‹E min bɔlen bɛ waraba fɛ siyaw cɛma, i kɛra i ko bajiw la bamaba. I girinna ka don ji la, i senw bɛ ji bɛɛ duuru ka ji kɛ bɔgɔ ye.›
[3] Matigi Ala ko: ‹Ne na ne ka jɔ bila i la. Jamaba dama dɔnbali na i sama ka bɔ ji la ni o jɔ ye.
[4] Ne na i fili gwele kan ka i fili kungo kɔnɔ. Ne na i kɛ sanfɛ kɔnɔw ni dugukolo kan waraw ka dumuni ye.
[5] Ne na kuluw ni kulu furancɛw bɛɛ datugu ni i su tolilen ye,
[6] ka dugukolo yɔrɔw fa ni i joli ye fo ka woyo ka taa se kuluw ma ka kɔjiw fa.
[7] Ni ne ye i nɔɔrɔ ban tuma min na, ne na sankolo datugu ka dolow dibi ka tile datugu ni sankaba ye. Kalo tɛna jɛ.
[8] Ne na sanfɛ kɛnɛbɔlanw bɛɛ kɛ dibi ye e kosɔn ka i ka jamana yɔrɔw bɛɛ kɛ dibi ye. Ne, Matigi Ala ko ten.
[9] ‹Ni ne ye i halakili kibaru fɔ siyaw cɛma, i tɛ jamana minw dɔn kɔni, ne na siya caman dusukun yɛrɛyɛrɛ.
[10] Ne na min kɛ i la, u na kabakoya o kosɔn. Ni ne ye ne ka npan yigiyigi masakɛw kun na tuma min na, siya ja na tigɛ kosɛbɛ. I bi don na, u na yɛrɛyɛrɛ tuma bɛɛ, u bɛɛ kelen-kelen na jɔrɔ u yɛrɛw ni ko la.›
[11] «Matigi Ala ko: ‹Babilonɛ masakɛ ka npan na wuli i kama.
[12] Ne na i ka mɔgɔw bɛɛ bi kɛlɛkɛ cɛw ka npan fɛ, siyaw ka kɛlɛkɛ cɛ ja gɛlɛnw kɔni. U na Misira kuncɛbaya tiɲɛn ka a kɔnɔ mɔgɔw bɛɛ faga.
[13] Ne na a ka baganw bɛɛ faga a ka jibaw da la. A ka jiw si tɛna duuru mɔgɔ senw ni bagan ntɔrɔnw fɛ tun.
[14] O tuma la ne n'a to Misira jiw kaɲɛmajɔ. U ka jiw na woyo nɛmɛnɛmɛ i ko tulu.› Matigi Ala ko ten.
[15] ‹Ni ne ye Misira jamana kɛ kungokolon ye, ni jamana kɔnɔ fɛnw bɛɛ cɛra, ni ne ye a kɔnɔ mɔgɔw bɛɛ faga tuma min na, u n'a dɔn ko ne ye Matigi de ye.
[16] Maɲumatɔkan min na fɔ, o filɛ nin ye. Siyaw denmusow na o dɔnkili da ni kan sumalen ye. U na o dɔnkili da ka kasi Misira ni a kɔnɔ mɔgɔw bɛɛ kosɔn.› Matigi Ala ko ten.»
[17] San tan ni filanan kalo tile tan ni duurunan don, Matigi ka kuma sera ne ma ko:
[18] «Hadamaden, i ka nin maɲumatɔkan fɔ Misirakaw bɛɛ kosɔn. I ka nin mɔgɔw ni siya barikama wɛrɛw fili dugukolo jukɔrɔ yɔrɔ donbaw la.
[19] «I man fisa ni siya wɛrɛw ye, o de kosɔn i ka jigin ka i da o bolokobaliw fɛ yen.
[20] «Ɔwɔ, u na bi npan ka mɔgɔ fagalenw cɛma. Npan samana ka bɔ. I ka taa Misira ni a kɔnɔ mɔgɔw kama ka taa ni u ye.
[21] Kɛlɛkɛ cɛ farin minw dalen bɛ kaburu kɔnɔ, olu b'a fɔ a ko la, ko u bɛɛ jiginna ka na yan. Npan ye bolokobali minw faga, u ni olu dalen bɛɲɔgɔn fɛ.
[22] «Asiri masakɛ ni a ka kɛlɛkɛ cɛw bɛɛ bɛ yen. A lamininen bɛ ni a ka kɛlɛkɛ cɛw kaburuw ye. U bɛɛ fagara npan fɛ kɛlɛ la.
[23] U kaburuw bɛ fo dugukolo jukɔrɔ. A ka kɛlɛkɛ cɛw kɛra ka a kaburu lamini. Olu bɛɛ fagara npan fɛ kɛlɛ la. U tun bɛ mɔgɔw bɛɛ ja tigɛ mɔgɔɲɛnamaw ka jamana la.
[24] «Elam masakɛ dalen bɛ yen. A lamininen bɛ ni a ka kɛlɛkɛ cɛw kaburuw ye. U bɛɛ fagara npan fɛ kɛlɛ la. O mɔgɔw bolokobaliw bɛɛ jiginna dugukolo jukɔrɔ. U tun bɛ mɔgɔw ja tigɛ mɔgɔɲɛnamaw ka jamana la. U bɛ u ka mafiɲɛyali kow muɲu mɔgɔ salenw cɛma kaburu kɔnɔ.
[25] Da yɔrɔ dira Elam masakɛ ma mɔgɔ salenw cɛma. A lamininen bɛ ni a ka kɛlɛkɛ cɛw kaburuw ye. O bolokobaliw bɛɛ fagara npan fɛ, sabu u ye mɔgɔw ja tigɛ mɔgɔɲɛnamaw ka jamana la. U ye u ka dɔgɔyali kow muɲu i ko kaburu kɔnɔ mɔgɔ tɔw. U dalen bɛ mɔgɔ salenw cɛma.
[26] «Mesɛk ni Tubal masakɛw bɛ yen. U lamininen bɛ ni u ka kɛlɛkɛ cɛw kaburuw ye. O bolokobaliw bɛɛ fagara npan fɛ, sabu u ye mɔgɔw ja tigɛ mɔgɔɲɛnamaw ka jamana la.
[27] U ni kɛlɛkɛ cɛ ja gɛlɛnw ma daɲɔgɔn fɛ, olu minw ni u ka kɛlɛkɛ minanw jiginna ka taa lahara. U ka npanw dalen bɛ u kun kɔrɔ. U ka tilenbaliya kow dalen bɛ u kolow kan k'a masɔrɔ u tun bɛ hali kɛlɛkɛ cɛ ja gɛlɛnw ja tigɛ mɔgɔɲɛnamaw ka jamana la.
[28] E fana, Faraon, i na gosi bolokobaliw cɛma ka i da npan ka mɔgɔ fagalenw cɛma.
[29] «Edɔmkaw ni u ka masakɛw ni u ka kuntigiw bɛ yen. Hali ni u ka kɛlɛkɛ cɛw ye mɔgɔ caman faga ni npan ye, u dalen bɛ bolokobaliw cɛma kaburu kɔnɔ.
[30] «Saheli yanfan kuntigiw ni Sidɔnkaw jiginna mɔgɔ fagalenw cɛma, hali k'a sɔrɔ u ka kɛlɛkɛ cɛw ye mɔgɔw ja tigɛ. U maloyalen kun suulilen dalen bɛ bolokobaliw ni npan ka mɔgɔ fagalenw cɛma. U ye u ka dɔgɔyali kow muɲu i ko kaburu kɔnɔ mɔgɔ tɔw.
[31] «Faraon na olu ye, a dusu na saalo a ka mɔgɔw saya ko la, a ka kɛlɛbolo minw bɛɛ fagara npan fɛ kɔni.» Matigi Ala ko ten.
[32] «Hali ni ne y'a to Faraon ka siranba bila mɔgɔw la mɔgɔɲɛnamaw ka jamana la, Faraon yɛrɛ ni a ka mɔgɔw bɛɛ na da mɔgɔ bolokobaliw ni npan ka mɔgɔ fagalenw cɛma.» Matigi Ala ko ten.