[1] Matigi ka kuma sera ne ma ko:
[2] «Hadamaden, i ka i ɲɛ sin worodugu yanfan jamana ma, ka ne ka kiraya kɛ worodugu yanfan fɛ kungoba mɔgɔw kama,
[3] ko u ka Matigi ka kuma lamen. Matigi Ala ko: ‹Ne na tasuma tugu i la. A na i ka yɔrɔ jirisun kɛnɛw ni a jiri jalanw bɛɛ jeni. Foyi tɛna se ka o tasuma sa. Fɛn o fɛn bɛ dugukolo san fɛ ka bɔ worodugu yanfan fɛ ka taa bila saheli yanfan fɛ, a na o bɛɛ jeni.
[4] Hadamadenw bɛɛ n'a ye ko ne, Matigi ye o tasuma tugu, a tɛna sa.›»
[5] Ne ko: «E, Matigi Ala, u b'a fɔ ne ma ko nin cɛ tɛ ntalen dala ye wa?»
[6] O kɔ, Matigi ka kuma sera ne ma, ko:
[7] «Hadamaden, i ka i ɲɛ sin Jerusalɛm fan fɛ ka kuma o yɔrɔ senuma kama ka kiraya kɛ Israɛl jamana kama.
[8] I k'a fɔ Israɛl jamana ye ko ne, Matigi ko: ‹Ne bɛ na i kama ka ne ka npan sama ka bɔ a ntan na ka mɔgɔ tilennen ni mɔgɔ jugu bɛɛ halaki ka ban ka bɔ i kɔnɔ.
[9] Ne b'a fɛ ka mɔgɔ tilennen ni mɔgɔ jugu bɛɛ halaki ka bɔ i kɔnɔ, o de kosɔn ne ka npan na bɔ a ntan na ka aw bɛɛ halaki k'a daminɛ worodugu yanfan jamana la fo ka taa bila saheli yanfan jamana la.
[10] Hadamadenw bɛɛ n'a dɔn ko ne, Matigi ye ne ka npan sama ka bɔ a ntan na, ko a tɛna kɔsegin a ntan na tun.›
[11] «E kɔni, Hadamaden, i ka i kɔ kuru jigi tigɛ hami kosɔn ka nwunan u bɛɛ ɲɛ na.
[12] Ni u ye i ɲininka ko i bɛ nwunan mun kosɔn, i ka u jaabi ko i ye kibaru jugu min mɛn, o na mɔgɔw ja tigɛ ka u bolokolow faga ka u hakiliɲaami ka u senkolow faga, ko i bɛ nwunan o kosɔn. Ɔwɔ, a bɛ na. A sera.» Matigi Ala ko ten.
[13] Matigi ka kuma sera ne ma ko kura ko:
[14] «Hadamaden, i ka kiraya kɛ k'a fɔ ko Matigi ko: ‹Npan, npan, a da diyara, a jɔsira.
[15] A da diyara fagali kama, a jɔsira walisa a ka manamana. An kaɲɛnajɛ kɛ wa? Ne denkɛ ka masaya bere bɛ jiri tɔw bɛɛ mafiɲɛya.
[16] O npan dira a jɔsibaa ma walisa a ka a don mɔgɔ bolo. O npan da diyara, a jɔsira walisa a ka di mɔgɔ fagala ma.
[17] Hadamaden, i ka kulo ka kasikan bɔ, sabu npan taara ne ka mɔgɔw ni Israɛl bɔnsɔn kuntigiw kama. O de kosɔn i ka i tɔgɔ gosi.›
[18] Ɔwɔ, kɔrɔbɔli ko bɛ na, nin masaya bere kuncɛba n'a ban pewu.» Matigi Ala ko ten.
[19] «E kɔni, Hadamaden, i ka kiraya kɛ. I ka i tɛgɛ fila ciɲɔgɔn na ko npan na gosili kɛ siɲɛ caman. O fagali kɛ npan na sɔgɔli kɛ fan bɛɛ la.
[20] Ne ye mɔgɔ lasiran npan bila u ka dondaw bɛɛ la walisa u ja ka tigɛ ani u sen ka talon ko caman. A bɛ manamana, a da diyara fagali kama.
[21] Npan da duman, i ka fagali kɛ kinin fɛ ka fagali kɛ numan fɛ. I ka i da sin fan bɛɛ fɛ ka fagali kɛ.
[22] Ne kɔni, ne na fagali kɛ ni ne bolo fila ye ka ne mɔnɛbɔ. Ne, Matigi de ye o fɔ.»
[23] Matigi ka kuma sera ne ma ko:
[24] «Hadamaden, i ka sira fila bɔ i ɲɛ fɛ Babilonɛ masakɛ ka npantigiw ye. O sira fila bɛɛ ka bɔ jamana kelen na. Sira min bɛ taa duguba min na, i ka o taamashyɛn kɛ o sira la.
[25] Sira kelen bɛ taa Babilonɛ sɔrɔdasiw bila Amɔn bɔnsɔn ka duguba Raba kɔnɔ, a tɔ kelen bɛ taa u bila Juda bɔnsɔn ka duguba Jerusalɛm kɔnɔ.
[26] K'a masɔrɔ Babilonɛ masakɛ bɛ na i jɔ sira fara la, o siraw bɛn da la ka biɲɛkisɛ ta k'a ka boliw ɲininka ka kɔlɔsili kɛ a ka saraka saga kɔnɔ biɲɛ la.
[27] Biɲɛkisɛ min bɛ Jerusalɛm jira, o bira a kininbolo la. A bɛ ci fɔ ko u ka taa Jerusalɛm ka kɛlɛ kulokan bɔ. A na kogo karilenw dila dugu dondaw la konw kama ka yɛlɛnyɛlɛnnanw dila ka kɛlɛkɛ kogow jɔ ka dingɛw sen.
[28] Jerusalɛmkaw na miiri ko a tɛna foyi kɛ u la sabu u ye kalili caman kɛ. Nka Babilonɛ masakɛ na u hakili jigin u ka tilenbaliya kow la ka u lasɔmi ko u na minɛ ka taa jɔnya la.»
[29] O de kosɔn ne, Matigi Ala b'a fɔ u ye ko: «Aw bɛ ne hakili jigin aw ka tilenbaliya kow la ni aw ka sariya tiɲɛn kow ye, aw ka kɛwalew bɛ aw jalaki. O de kosɔn aw juguw bolo na aw minɛ.
[30] «E kɔni, Israɛl kuntigi jugu, ni i ka tilenbaliya sera a dan na, npan na i faga i ka jurumu kafari don na.»
[31] Matigi Ala ko: «I ka masafugula ni i ka jalamugu na bɔ i kun na, kow bɛɛ na yɛlɛma. Mɔgɔ min majiginnen don, o na kɔrɔta, min kɔrɔtalen don, o na majigin.
[32] Ne na masaya tiɲɛn k'a tiɲɛn k'a tiɲɛn. Ɔwɔ, masaya na tiɲɛn. Kiri ko bɛ min bolo, ne na a di min ma, nin ko tɛna kɛ sani o ka na.
[33] «Hadamaden, i ka kiraya kɛ ko Matigi Ala y'a fɔ Amɔn bɔnsɔn ko la ani u ka mafiɲɛyali kosɔn ko: ‹Npan, npan fosira fagali kama, a jɔsira ka manamana walisa a ka mɔgɔw faga ka u ban.›
[34] Ka i to i ka nkalon kiraya lafilili kumaw la, npan na i gosi ka i labi mɔgɔ juguw suw cɛma ni tilenbaliya sara don sera tuma min na.
[35] «Npan kɔsegin a ntan na. I dara yɔrɔ min na, i bangera jamana min na, ne na kiri tigɛ i kan yen.
[36] Ne na ne ka dimiya bi i kan ka i bila ne dusu bɔ tasuma la ka i fyɛ ni ne dafiɲɛ ye ka i don mɔgɔ halakikɛla farinmaw bolo.
[37] I na kɛ tasuma la dɔgɔ ye. I joli na woyo jamana yɔrɔw bɛɛ la. Mɔgɔ si hakili tɛna to i la tun, sabu ne, Matigi kumana.»