[1] «Hadamaden, i ka muru da duman ta ka i kun ni i dala si di. O kɔ, i ka sumanikɛ ja ta ka o si suma k'a tila saba ye.
[2] Ni daga sigili tilew dafara tuma min na, i ka o tila kelen jeni ni tasuma ye dugu cɛmancɛ la. O kɔ, i ka tila filanan ta ka o tigɛtigɛ ni muru ye ka dugu lamini. O kɔ, i ka tila sabanan ta ka o seri fiɲɛ fɛ. Ne yɛrɛ na npan ta u kama.
[3] I ka kunsigi dɔɔnin mara ka olu siri i ka dulɔki dawolo la.
[4] I ye dɔɔnin min mara, i ka olu dɔ ta ka u fili tasuma la ka u jeni. Tasuma na bɔ olu la ka Israɛl ka so bɛɛ minɛ.»
[5] Matigi Ala ko: «Jerusalɛm filɛ nin ye. Ne y'a sigi siyaw cɛma k'a lamini ni jamana wɛrɛw ye.
[6] A juguyara ka ne ka sariya tiɲɛn ka tɛmɛn siya wɛrɛw kan. A ye ne ka ci fɔlenw tiɲɛn ka tɛmɛn a lamini jamanaw kan, k'a masɔrɔ a kɔnɔ mɔgɔw banna ne ka ci fɔlenw ma. U ma ne ka ko latigɛlenw sira taama.»
[7] O de kosɔn Matigi Ala ko: «Aw murutilen bɛ ka tɛmɛn aw lamini siyaw kan. Aw ma ne ka ko latigɛlenw mara. Aw ma sɔn ka ne ka ci fɔlenw sira taama. Aw ma se ka hali aw lamini siyaw ka laadaw sira taama.»
[8] O de kosɔn Matigi Ala ko: «A filɛ, ne yɛrɛ na kiri tigɛ i kan siyaw cɛma.
[9] I ka ko haramulenw bɛɛ kosɔn, ne na ko dɔ kɛ i la, ne ma min ɲɔgɔn kɛ i la fɔlɔ ani ne tɛna o ɲɔgɔn kɛ i la tun.
[10] Ɔwɔ, faw na u yɛrɛ wolodenw sogo dun i cɛma, denw na u bangebaaw sogo dun. Ne na ne ka kiri tigɛ kow bi i kan. Ni minw ɲɛnama tora i kɔnɔ, ne na olu jɛnsɛn fiɲɛ la fan bɛɛ fɛ.»
[11] Matigi Ala ko: «Neɲɛnama tɔgɔ kosɔn, i ye ne ka yɔrɔ senuma nɔgɔ ni i ka boliw ni i ka ko haramulenw ye, o de kosɔn ne na neɲɛ cɛ ka bɔ i la. Neɲɛ tɛna hinɛ i la, ne tɛna makari i la fewu.
[12] I ka mɔgɔw tila kelen na sa fiɲɛbana ni kɔngɔba fɛ i cɛma. U tila filanan na faga ni npan ye i fan bɛɛ la. Ne na u tila sabanan jɛnsɛn fiɲɛ fan bɛɛ la ka npan ci u nɔ fɛ.
[13] «Ne na ne ka fariya ko da u kan ka ne ka dimiya ban. Ne na ne mɔnɛbɔ u la fo ka wasa. Ni ne ye ne ka fariya bi u kan tuma min na, u n'a dɔn ko ne ye Matigi de ye, ko keleya bɛ ne la.
[14] Ne na i kɛ tomon ni mafiɲɛyali fɛn ye i lamini siyaw cɛma ani taamabaaw ɲɛ na.
[15] Ni ne dusu bɔlen diminnen ye kiri kow bi i kan tuma min na ka i kɔrɔfɔ ni dimiya ye, i na kɛ mafiɲɛyali fɛn ni nenili fɛn ni lasɔmili fɛn ani kabako fɛn ye i lamini siyaw cɛma. Ne, Matigi ye o fɔ.
[16] Ni ne ye kɔngɔba bi aw kan tuma min na, i n'a fɔ biɲɛ jugu halakilikɛla, ne na o kɛ ka aw halaki ka aw ban, sabu ne na kɔngɔba fara aw ka tɔɔrɔ tɔw kan ka aw ka dumuni ban.
[17] Ne na kɔngɔba ni wara farinmaw ci aw kama, olu na aw bɔnɛ aw denw na. Fiɲɛbana ni fagali kow na kɛ aw cɛma. Ne na npan bi aw kan. Ne, Matigi ye o fɔ.»