[1] Matigi ka kuma sera ne ma ko:
[2] «Hadamaden, i ka kuma i ka mɔgɔw denkɛw fɛ k'a fɔ u ye ko: ‹Ni ne ye npan ci ko a ka taa jamana dɔ halaki, ni o jamana mɔgɔw ye mɔgɔ kelen ɲɛnatɔmɔ u cɛma ka o kɛ kɔlɔsilikɛla ye,
[3] ni o tigi ye npantigiw natɔ ye jamana kama ka buru fyɛ ka mɔgɔw lasɔmi,
[4] ni mɔgɔ min ye buru fyɛkan mɛn, ni o ma sɔn k'a yɛrɛ labɛn, ni juguw nana bala o tigi la, o tigi joli hakɛ na bi a yɛrɛ kun,
[5] k'a masɔrɔ a ye buru fyɛkan mɛn nka a ma a yɛrɛ labɛn. O de kosɔn o tigi joli hakɛ na bi a yɛrɛ kun. Nka ni a y'a yɛrɛ labɛn k'a yɛrɛ kɔlɔsi, a na kisi fagali ma.
[6] Ni kɔlɔsilikɛla ye kɛlɛ natɔ ye, ni a ma buru fyɛ walisa mɔgɔw ka u labɛn, ni npantigiw nana mɔgɔ dɔ faga u cɛma, o tigi na faga a ka tilenbaliya kosɔn, nka ne na a joli hakɛ ɲininkali kɛ kɔlɔsilikɛla la.›
[7] «Ayiwa Hadamaden, ne ye i sigi ka kɛ Israɛl ka so kɔlɔsibaa ye. I ka ne dala kuma lamɛn ka Israɛl bɔnsɔn lasɔmi ne ye.
[8] Ni ne y'a fɔ mɔgɔ jugu ye ko a na sa dɛ, ni i ma foyi fɔ walisa mɔgɔ jugu ka yɛlɛma k'a ka sira juguw bila, o mɔgɔ jugu na sa a ka tilenbaliya kosɔn, nka ne na i ɲininka a joli hakɛ ko la.
[9] Nka ni i ye mɔgɔ jugu lasɔmi walisa a ka yɛlɛma, a na sa a ka tilenbaliya kosɔn, nka i na i yɛrɛ ni kisi.
[10] «Hadamaden, i k'a fɔ Israɛl ka so ye ko, u bɛ kuma k'a fɔ ko: ‹An ka tilenbaliya kow ni an ka jurumuw doni bɛ an kun, an na halaki olu kosɔn. An dun bɛ se kaɲɛnamaya cogo di?›
[11] Ayiwa, i k'a fɔ u ye ko ne, Matigi Ala ko, ne ɲɛnama tɔgɔ kosɔn, mɔgɔ jugu saya ko man di ne ye fewu, nka ne b'a fɛ a ka a ka sira juguw bila kaɲɛnamaya. Aw ka yɛlɛma, a' ye yɛlɛma ka aw ka sira juguw bila. Israɛl ka so, mun kosɔn aw ka sa?
[12] «Hadamaden, i k'a fɔ i ka mɔgɔw denkɛw ye ko, ni mɔgɔ tilennen bira jurumu la don min na, a ka tilennenya tɛ se k'a tila o don na. Ni mɔgɔ jugu yɛlɛmana k'a ka sira jugu bila, a tɛna halaki a ka o juguya kɔrɔw kosɔn. O cogo la mɔgɔ tilennen tɛ se ka kisi a ka tilennenya tɛmɛnnenw barika la a ka jurumu kɛ don na.
[13] Hali ni ne tun y'a fɔ mɔgɔ tilennen ye ko a naɲɛnamaya, ni o tigi ye i jigi da a ka tilennenya kan ka tilenbaliya sira taama, a ka tilennenya tɛmɛnnen kɔrɔw tɛna jate, nka a na sa a ka tilenbaliya kɛlenw kosɔn.
[14] «Ni ne y'a fɔ mɔgɔ jugu ye ko a na sa dɛ, ni o mɔgɔ yɛlɛmana k'a ka jurumu dabila, ni o mɔgɔ jugu ye ko tilennen ni ko bɛnnen kɛ,
[15] ni a y'a ka layidu talen dafa ka fɛn sonyalen kɔsegin a tigi ma, ci fɔlen minw bɛ mɔgɔɲɛnamaya, ni a ye o sira taama, ni a ma tilenbaliya ko si kɛ, a tɛna sa. A naɲɛnamaya, siga t'a la.
[16] A ye jurumu minw kɛ ka kɔrɔ, o si tɛna jate a kun na. A ye ko bɛnnenw ni ko tilennenw kɛ, o de kosɔn a ɲɛnama na to.
[17] «I ka mɔgɔw b'a fɔ ko: ‹Matigi ka siraw tilennen tɛ.› Olu ka siraw de ma tilen.
[18] Ni mɔgɔ tilennen yɛlɛmana ka tilenbaliya sira taama, a na sa.
[19] Ni mɔgɔ jugu yɛlɛmana k'a ka juguya sira bila ka ko tilennenw ni ko bɛnnenw kɛ, o mɔgɔ juguɲɛnama na to olu kosɔn.
[20] «Israɛl ka so, aw b'a fɔ ko Matigi ka siraw tilennen tɛ, nka aw k'a dɔn ko ne na kiri tigɛ aw bɛɛ kelen-kelen kan ka kɛɲɛ ni aw ka kɛwalew ye.»
[21] An ka jɔnya san tan ni filanan kalo tannan tile duurunan don, cɛ dɔ kisira ka bɔ Jerusalɛm ka na a fɔ ne ye ko: «Dugu minɛna.»
[22] O y'a sɔrɔ Matigi tun y'a bolo da ne kan wula da fɛ sani o cɛ bolilen ka se ne yɔrɔ la sɔgɔma da fɛ. Matigi tun ye ne da yɛlɛ. Ne da yɛlɛlen tun don, ne ma kɛ bobo ye tun.
[23] Matigi ka kuma sera ne ma ko:
[24] «Hadamaden, mɔgɔ minw sigilen bɛ nin yɔrɔ tiɲɛnnen na Israɛl ka dugukolo kan, olu ko: ‹Ibrahima kelen tun don, ale ye nin jamana sɔrɔ k'a kɛ ciyɛn ye. An dun ka ca, jamana tilatilara an cɛ.›
[25] O de kosɔn i k'a fɔ u ye ko ne, Matigi Ala ko: ‹Aw bɛ baganw joli dun ka aw ɲɛ kɔrɔta ka aw ka boliw filɛ ka mɔgɔ faga. Ayiwa, jamana dun bɛ se ka kɛ aw ta ye cogo di?
[26] Aw jigi dalen bɛ aw yɛrɛ ka kɛlɛkɛ npanw kan ka ko haramulenw kɛ. Aw bɛɛ kelen-kelen bɛ da aw mɔgɔɲɔgɔn musow fɛ. Ayiwa, jamana dun bɛ se ka kɛ aw ta ye cogo di?›
[27] «I ka min fɔ u ye, o filɛ nin ye, ko Matigi Ala ko: ‹Neɲɛnama tɔgɔ kosɔn, nin yɔrɔw tiɲɛnnen kɔnɔ mɔgɔw na faga npan fɛ. Minw bɛ kungo kɔnɔ, ne na olu di kungo waraw ma, olu ka u dun. Minw dɔgɔlen bɛ kɛlɛ kunbɛn sow ani kuluwow kɔnɔ, olu na faga fiɲɛbana fɛ.
[28] Ne na jamana kɛ jamana lankolon ye, ne na a kɛ kungokolon ye. U jigi dalen bɛ u barika min kan, o na tiɲɛn. Israɛl ka kuluw lankolon na to. Mɔgɔ si tɛna tɛmɛn yen tun.
[29] Ni ne ye jamana halaki k'a kɛ tomon ye, Israɛl bɔnsɔn ka ko haramulenw kosɔn tuma min na, aw n'a dɔn ko ne ye Matigi de ye.›
[30] «Hadamaden, i ka mɔgɔw bɛ kuma i ko la ka u jɔlen to kogow kɔ fɛ ani so daw la. U bɛ kumaɲɔgɔn fɛ ko: ‹An ka taa Matigi ka kuma lamɛn sa.›
[31] O kɔ, u jamaba bɛ taa i sɛgɛrɛ. Ne ka mɔgɔw bɛ u sigi i ɲɛ kɔrɔ ka i ka kumaw lamɛn, nka u tɛ i ka fɔlen sira taama. U bɛ u yɛrɛw diyaɲekow dama de kɛ. U dusukun tɛ miiri foyi la tɔnɔ juguw ɲinili kɔ.
[32] I kɛra u bolo dɔnkili dalaɲuman ani nkɔni fɔlaɲuman ye. U bɛ i ka kuma lamɛn nka u tɛ a sira taama.
[33] Ni o kow kɛra, siga t'a la u na kɛ, o tuma la u n'a dɔn ko kira tun bɛ u cɛma.»