[1] O kɔ, Matigi Ni taara ni ne ye Alabatosoba kɔrɔn yanfan fɛ da la, tilebɔ fan fɛ. Ne ye cɛ mugan ni duuru ye donda la. Ne ye Azur denkɛ Jaazania ni Benaja denkɛ Pelatia jɔlen ye u cɛma. Olu tun ye mɔgɔw kuntigiw ye.
[2] Matigi y'a fɔ ne ye ko: «Hadamaden, a filɛ, nin mɔgɔw bɛ ko jugu miiri ka sira jugu don mɔgɔw kɔnɔ nin dugu kɔnɔ.
[3] U b'a fɔ ko: ‹Yala so jɔ waati tɛ ɲini ka se wa? An ka dugu nin ye nɛgɛ daga ye, an ye sogo ye.›
[4] O de kosɔn i ka kiraya kɛ u kama. Hadamaden, i ka kiraya kɛ.»
[5] Matigi Ni jiginna ne kan k'a fɔ ne ye ko: «I ka kuma k'a fɔ ko, Matigi ko: ‹Israɛl ka so, aw bɛ kuma min fɔ, ne ye o dɔn. Ɔwɔ, aw ka miirili ye min ye, ne bɛ o dɔn.
[6] Aw ye mɔgɔ caman faga nin dugu kɔnɔ ka dugu bɔlɔn yɔrɔw bɛɛ fa ni mɔgɔ suw ye.›
[7] «O de kosɔn Matigi Ala ko: ‹Aw ye mɔgɔ minw faga dugu kɔnɔ, olu ye o sogo ye. O dugu ye nɛgɛ daga ye nka aw na labɔ a kɔnɔ.
[8] Aw bɛ siran npanɲɛ wa? Ne na npan ci aw kama.› Matigi Ala ko ten.
[9] ‹Ne na aw labɔ nin dugu kɔnɔ ka aw don jamana wɛrɛ mɔgɔw bolo ka ne ka kiri tigɛ aw kan.
[10] Npan na aw faga, ne na kiri tigɛ aw kan, Israɛl bɔnsɔn ka dancɛw yɛrɛ kɔnɔ. Aw n'a dɔn ko ne ye Matigi de ye.
[11] Aw bɛ Jerusalɛm min jate aw ka nɛgɛ daga ye ka aw jate sogow ye, o tɛna kɛ aw ka nɛgɛ daga ye tun. Ne na kiri tigɛ aw kan Israɛl bɔnsɔn ka dancɛw yɛrɛ kɔnɔ, siga t'a la.
[12] Aw n'a dɔn ko ne ye Matigi de ye. Aw ma ne ka ci fɔlenw ni ne ka ko latigɛlenw sira taama nka aw ye aw lamini siyaw ka ko latigɛlenw sira taama.›»
[13] Ayiwa ka ne to kiraya kɛli la, Benaja denkɛ Pelatia sara. O tuma la ne ye ne bi ka neɲɛ biri duguma ka pɛrɛn kosɛbɛ ko: «E Matigi Ala, i na Israɛl bɔnsɔn tɔ tolenw bɛɛ halaki wa?»
[14] Matigi kumana ne fɛ ko:
[15] «Hadamaden, e yɛrɛ badenw, i ka so mɔgɔw ani Israɛl bɔnsɔn ka so mɔgɔw, Jerusalɛmkaw b'a fɔ olu ye ko: ‹A' ye aw mabɔ Matigi la. Nin jamana dira an ma ciyɛn ye.›
[16] O de kosɔn i k'a fɔ u ye ko, Matigi Ala ko: ‹Ɔwɔ, ne ye u gɛn ka taa siyaw cɛma ka u jɛnsɛn jamana caman na, nka u taara jamana minw na, ne na kɛ u dogo yɔrɔ ye o yɔrɔw la o waati la.›
[17] O de kosɔn i k'a fɔ u ye ko, Matigi Ala ko: ‹Ne na aw lajɛ ka bɔ siyaw cɛma. Aw tun jɛnsɛnna ka taa jamana minw na, ne na aw lajɛɲɔgɔn fɛ ka bɔ o jamana la ka aw ladon Israɛl bɔnsɔn ka jamana kɔnɔ ko kura.›
[18] «O tuma la jɔnyadenw na kɔsegin u ka jamana kɔnɔ. U na u ka boliw ni u ka ko haramulenw bɛɛ ban ka bɔ yen.
[19] Ne na dusukun kelen di u ma ka ni kura don u kɔnɔ. Ne na dusukun gɛlɛn bɔ u kɔnɔ ka dusukunɲuman di u ma,
[20] walisa u ka ne ka ko latigɛlenw mara ka ne ka ci fɔlenw sira taama. U na kɛ ne ka mɔgɔw ye, ne na kɛ u ka Ala ye.
[21] Nka Matigi Ala ko, mɔgɔ minw bɛ tugu u ka boliw ni u ka ko haramulenw nɔ fɛ, ne na olu ka tilenbaliya doni da u yɛrɛw kun.»
[22] O kɔ, serubɛnw ye u kamanfuraw sɛɛnɛ, u senw tun bɛ u kɛrɛ fɛ. Israɛl ka nɔɔrɔ min tun bɛ u kun na, o kɔrɔtara u fɛ.
[23] Matigi nɔɔrɔ wulila ka bɔ dugu kɔnɔ ka taa sigi dugu kɔrɔn yanfan fɛ kulu kan.
[24] Ala Ni taara ni ne ye, ne ye yeli kɛ Ala Ni barika la. O taara ni ne ye jɔnyadenw cɛma Kalde jamana kɔnɔ. Ayiwa fɛn min jirala ne la, o taara ka ne to yen.
[25] Matigi ye ko minw bɛɛ jira ne la, ne ye olu bɛɛ lakali jɔnyadenw ye.