[1] O kɔ, cɛ taara ni ne ye Alabatosoba donda la. Ne ye baji woyotɔ ye ka bɔ so dakun jukɔrɔ ka taa kɔrɔn yanfan fɛ. O ji tun bɛ woyo ka taa Alabatosoba kinin yanfan fɛ ka tɛmɛn saraka bɔlan ni worodugu cɛ.
[2] O cɛ bɔra ni ne ye saheli yanfan donda fɛ ka munumunu kɔfɛla fɛ fo ka taa se kɔrɔn yanfan donda ma. Ne ye o ji woyotɔ ye kinin yanfan fɛ.
[3] Cɛ taara kɔrɔn yanfan fɛ dɔɔnin, a ka sumanikɛ juru tun bɛ a bolo. A ye nɔnkɔnɲɛ waa kelen suma. A ye baji cɛ tigɛ ni ne ye. O ji sera ne senkuruw ma.
[4] A taara ni ne ye ka nɔnkɔnɲɛ waa kelen suma ko kura. O ji sera fo ne kunberew ma. A taara ni ne ye ɲɛ fɛ ka nɔnkɔnɲɛ waa kelen wɛrɛ suma. O ji sera fo ne cɛmancɛ la.
[5] A ye nɔnkɔnɲɛ waa kelen wɛrɛ suma ko kura. O yɔrɔ duɲara fo ne ma se ka o cɛ tigɛ sabu ji tun bonyara, mɔgɔ tun tɛ se ka a cɛ tigɛ fɔ i ka nɔnni kɛ. Mɔgɔ tun tɛ se ka o ji tigɛ fewu.
[6] O tuma la a y'a fɔ ne ye ko: «Hadamaden, i ye o ye wa?» O kɔ, a kɔsegira ni ne ye ji da la.
[7] Ne selen yen, ne ye jirisunba caman ye o baji fan fila fɛ.
[8] A y'a fɔ ne ye ko: «Nin ji bɛ woyo ka taa kɔrɔn yanfan fɛ dugukolo la. A bɛ woyo ka taa jɛkɛnɛ fɛ ka don kɔgɔji la. Ni a donna kɔgɔji kɔnɔ tuma min na, kɔgɔji ji bɛ diya.
[9] Jila fɛnɲɛnamaw bɛɛ bɛ balo nin ji kɔnɔ. Jɛgɛ caman bɛ sɔrɔ a kɔnɔ. Nin ji bɛ woyo ka taa yɔrɔ o yɔrɔ, o kɔgɔji bɛ diya, nin baji bɛ woyo ka taa yɔrɔ o yɔrɔ la, a bɛ fɛn bɛɛ ɲɛnamaya yen.
[10] Mɔnnikɛlaw na kɛ nin baji da la. Ka bɔ En-Gedi fo ka taa se En-Eglayim, u na u ka jɔw fɛnsɛ yen. U na jɛgɛ sifa bɛɛ sasa i ko Kɔgɔjiba jɛgɛw.
[11] Nka dalaw ni fala minw bɛ o kɔgɔji kɛrɛ fɛ, olu jiw tɛna diya, olu kɔgɔma na to yen.
[12] Jiri dentaw ani jiri furamaw sifa bɛɛ na kɛ nin baji fan fila fɛ. Olu fura tɛna burun, u den tɛna ban. U bɛ den kura kɛ kalo o kalo, k'a masɔrɔ baji min bɛ u sɔn, o bɛ woyo ka bɔ yɔrɔ senuma kɔnɔ. O jiridenw na mɔgɔw balo, u furaw na mɔgɔw kɛnɛya.
[13] «Matigi Ala ko: ‹Aw na jamana yɔrɔ minw tilatila Israɛl siya tan ni fila cɛ ka kɛ u ciyɛn ye, olu dancɛw filɛ ninw ye. Yusufu niyɔrɔ na kɛ fila ye.
[14] Aw bɛɛ kelen-kelen niyɔrɔ ka kɛɲɛ, k'a masɔrɔ ne ye layidu ta ka ne kali aw bɛnbaw ye ko ne na nin jamana di u ma. O de kosɔn a na tilatila aw cɛ.
[15] ‹Ayiwa, jamana dancɛw filɛ ninw ye. Saheli yanfan dancɛ bɛ daminɛ Kɔgɔjiba la ka tɛmɛn Hetlon sira fɛ fo ka taa se Zedad ma,
[16] ka tɛmɛn ka se Hamat ni Berota ani Sibrayim ma. Olu bɛ Damasi dancɛ ni Hamat dancɛ cɛ ka tɛmɛn Hazer-Hatikon fɛ, o ye Havran dancɛ ye.
[17] Ayiwa jamana dancɛ na bɔ Kɔgɔji la fo ka taa se Hazor-Enon. A na bɔ Damasi dancɛ la ka taa se fo Zafon ma saheli yanfan fɛ Hamat dancɛ la. O na kɛ jamana saheli yanfan dancɛ ye.
[18] A kɔrɔn yanfan dancɛ bɛ bɔ Havran ni Damasi cɛ, a na se Jurdɛn ba ma ka tɛmɛn Galad ni Israɛl ka jamana cɛ. Aw ka jamana sumali daminɛ saheli yanfan dancɛ la fo ka se kɔrɔn yanfan kɔgɔji ma. O na kɛ a kɔrɔn yanfan dancɛ ye.
[19] A worodugu yanfan dancɛ bɛ bɔ Tamar fo ka taa se Meriba-Kadɛs ji ma. O kɔji janya na kɛ a dancɛ ye fo ka taa bila Kɔgɔjiba la. O na kɛ a worodugu yanfan dancɛ ye.
[20] A tilebi yanfan dancɛ ye Kɔgɔjiba ye, ka bɔ worodugu yanfan dancɛ la fo ka taa se Hamat donda la, o na kɛ a tilebi yanfan dancɛ ye.
[21] ‹Aw ka o jamana tilatila aw cɛ ka kɛɲɛ ni Israɛl siya dama ye.
[22] Jamana ka tilatila aw ni siginfɛw cɛ, olu minw ye den sɔrɔ aw cɛma. Aw kana faranfasili kɛ olu ni Israɛl bɔnsɔn cɛ. Olu na u niyɔrɔ sɔrɔ aw fɛ Israɛl siyaw cɛma.
[23] O siginfɛw sigilen bɛ aw siya minw cɛma, aw ka u niyɔrɔ di u ma olu cɛma.› Matigi Ala ko ten.»