[1] Matigi ka kuma sera ne ma ko kura ko:
[2] «Hadamaden, Matigi Ala y'a fɔ Israɛl bɔnsɔn ko la ko: ‹Laban waati selen filɛ. Laban waati sera jamana fan naani bɛɛ ma.
[3] ‹I laban ko sera. Ne na ne ka dimiya lawuli i kama ka kiri tigɛ i kan ka kɛɲɛ ni i taama cogo ye, ka i sara ka kɛɲɛ ni i ka ko haramulenw ye.
[4] Ne tɛna neɲɛɲuman jɔ i la tun. Ne tɛna hinɛ i la, nka ne na i sara ka kɛɲɛ ni i ka tilenbaliya kow ni i ka ko haramulenw ye, olu minw bɛ kɛ i cɛma.› Aw n'a dɔn ko ne ye Matigi de ye.»
[5] Matigi Ala ko: «A filɛ bɔnɛ min bɔɲɔgɔnko tɛ, o nalen filɛ.
[6] Laban waati sera. Laban waati sera. A wulila i kama, a filɛ a sera.
[7] Jamana kɔnɔ mɔgɔ, i ka waati sera. Waati sera, a don surunyara. Sirankoba bilaraɲagalikan nɔ na kuluw kan.
[8] Sɔɔni ne na ne ka dimiya bi i kan ka ne dusu bɔ ko kɛ i la k'a dafa. Ne na kiri tigɛ i kan ka kɛɲɛ ni i ka siraw ye. Ne na i ka ko haramulenw bɛɛ bi i kan.
[9] Ne tɛna neɲɛɲuman jɔ i la tun. Ne tɛna hinɛ i la tun, nka ne na i sara i ka tilenbaliya ni i ka ko haramulen kɛlenw kosɔn i cɛma. Aw n'a dɔn ko ne ye Matigi de ye min bɛ gosili kɛ.
[10] «Kiri don natɔ filɛ. Ɔwɔ, a bɛ na. I ka ko sera, bere nugura, kuncɛbaya ye feere bɔ.
[11] Fariya wulila ka kɛ bugɔli bere ye o siya kelen kama. A ka mɔgɔw ni a ka jamana ni a ka nafolo ni a ka saramaya si tɛna to yen.
[12] «Waati sera, a don surunyara. Sannikɛla kana nisɔndiya, feerekɛla dusu kana kasi sabu dimiya na wuli nin jamana kama.
[13] Feerekɛla si tɛna kɔsegin a ka jago fɛn kunna tun hali ni a ɲɛnama tora, k'a masɔrɔ kiraya kuma min fɔra nin jamana kama, o tɛna yɛlɛma. U si tɛna se ka u ni kisi u ka tilenbaliyaw kosɔn.
[14] U ye buru fyɛ, fɛn bɛɛ labɛnna, nka mɔgɔ si tɛ taa kɛlɛ la, sabu ne ka dimiya na wuli nin jamana kama.
[15] «Npan bɛ fagali kɛ kɛnɛma, fiɲɛbana ni kɔngɔba bɛ fagali kɛ dugu kɔnɔ. Mɔgɔ min bɛ kungo la, o na faga ni npan ye. Min bɛ dugu kɔnɔ, kɔngɔba ni fiɲɛbana na o faga.
[16] Ni mɔgɔ minw kisira ka taa kuluw kan, olu na kɛ i ko jɛkɛnɛ la ntubaniw. Mɔgɔ bɛɛ kelen-kelen na nwunan u ka tilenbaliya kow kosɔn.
[17] Mɔgɔw bɛɛ bolo kolow na sa, kunbere bɛɛ na yɛrɛyɛrɛ.
[18] U na cafu fini don u la, jatigɛ na u minɛ. U ɲɛda cogo na yɛlɛmaɲɛnasisi fɛ. U bɛɛ kunw na di.
[19] U na u ka warijɛ fili dugu bɔlɔnw na, u naɲigin u ka sanu la. U ka warijɛ ni u ka sanu si tɛna se ka u tila Matigi ka dimiya don na. U ka nafolow tɛna se ka u ka kɔngɔ ban wala ka u kɔnɔ fa, o bɛɛ n'a ta o fɛnw kɛra u ka tilenbaliya sababu ye.
[20] U tun bɛ u yɛrɛw masiri ka u kuncɛ bonya ni o fɛn minw ye, u ye olu kɛ u ka boli haramulenw ye. O de kosɔn ne ye olu kɛ u ɲiginna fɛnw ye.
[21] Ne na o nafolow di jamana wɛrɛ mɔgɔw ma ka kɛ olu ka fɛn cɛlenw ye. Ne na o fɛnw kɛ dugukolo kan mɔgɔw juguw ka fɛn cɛtaw ye walisa olu ka o fɛnw nɔgɔ.
[22] Ne na ne kɔ sin u ma, u na ne ka yɔrɔ senuma nɔgɔ. Mɔgɔ farinmaw na don yen k'a nɔgɔ.
[23] «Nɛgɛ jɔlɔkɔw na dila, k'a masɔrɔ jamana falen bɛ mɔgɔ faga kow la, dugu kɔnɔnaw bɛɛ fara binkanni kow la.
[24] Ne na siyaw bɛɛ la juguman ci u kama walisa olu ka u ka sow cɛ. Ne na mɔgɔ farinmaw ka kuncɛbaya kow ban ka Israɛl bɔnsɔn ka yɔrɔ senuma nɔgɔ.
[25] Halakili ko bɛ na. Israɛl bɔnsɔn bɛ kisili ɲini, nka u tɛna a sɔrɔ.
[26] Bɔnɛ na fara bɔnɛ kan. Kibaru jugu na fara kibaru jugu kan. U na kiraw ɲininka kiraya kow la. Sariya na tunun sarakalasebaa la. Ɲɛ jirali tɛna sɔrɔ cɛkɔrɔbaw fɛ tun.
[27] Masakɛ dusu na kasi, faama ja na tigɛ, mɔgɔw bolo kolo na sa ja tigɛ fɛ. Ne na u sara ka kɛɲɛ ni u ka taama cogo ye. Ne na kiri tigɛ u kan ka kɛɲɛ ni u ka ko kɛlenw ye. U n'a dɔn ko ne ye Matigi de ye.»