[1] San tannan kalo tannan tile tan ni filanan don, Matigi ka kuma sera ne ma ko:
[2] «Hadamaden, i ka i ɲɛ sin Misira masakɛ Faraon ma ka kiraya kɛ ale ni Misira jamana bɛɛ kama
[3] ka nin kuma fɔ u ye ko: ‹E Misira masakɛ, min bɛ i ko bama belebeleba, min dalen bɛ baji cɛma, a sera i ma sa. I ko, i ka baji ye i ta ye, ko e de ye a da.
[4] Ayiwa, ne na nɛgɛ don i da la ka i ka bajila jɛgɛw nɔrɔ i faraw la. E ni i ka bajila jɛgɛ minw nɔrɔlen bɛ i faraw la, ne na aw bɛɛ sama ka bɔ baji la.
[5] Ne na i ni i ka bajila jɛgɛw bɛɛ fili gwele kan. I na bi kungo kɔnɔ. I tɛna se ka kɔsegin wala ka i su don. Ne na i kɛ dugukolo kan waraw ni sanfɛ kɔnɔw ka dumuni ye.
[6] O tuma la Misirakaw bɛɛ n'a dɔn ko ne ye Matigi de ye. ‹I ka dɛmɛni na kɛ Israɛl ka so ye i ko bɔkalaɲɔɲɔlen.
[7] Israɛl bɔnsɔn y'a bolo mɔɔnɔbɔ ka i minɛ tuma min na, i karila ka u kamankun farafara. U ye u sɛmɛ i la tuma min na, i karila ka u solo mugu.›
[8] O de kosɔn Matigi Ala ko: ‹Ne na npan ci i ka jamana kama ka i ka jamana kɔnɔ mɔgɔw ni baganw bɛɛ faga.
[9] Misira jamana na kɛ jamana lankolon ye. U n'a dɔn ko ne ye Matigi de ye. ‹Ɔwɔ, Faraon y'a fɔ ko baji ye a yɛrɛ ta ye. Ko a y'o da.
[10] O de kosɔn ne na wuli i ni i ka bajiw kama ka Misira jamana kɛ kungokolon jintan ye, k'a daminɛ Migdol fo ka taa se Siene ka tɛmɛn ka taa bila Etiopi dancɛ la.
[11] Mɔgɔ si sen tɛna Misira jamana cɛ tigɛ tun. Bagan si tɛna tɛmɛn yen. Mɔgɔ si tɛna sigi o jamana kɔnɔ san binaani kɔnɔ.
[12] Ne na Misira kɛ jamana lankolon ye. A ka duguw bɛɛ na kɛ tomonw ye ka tɛmɛn dugu cilenw bɛɛ kan san binaani kɔnɔ. Ne na Misirakaw jɛnsɛn siyaw cɛma, ka u jɛnsɛn jamanaw bɛɛ la.›
[13] «O bɛɛ n'a ta Matigi Ala ko: ‹Ne ye Misirakaw jɛnsɛn jamana minw kɔnɔ, ne na u lajɛ ka bɔ olu la san binaani tɛmɛnnen kɔ.
[14] Ne na Misirakaw bɔ jɔnya la ka na Patros jamana kɔnɔ, u yɛrɛw ka jamana la, nka u ka masaya barika na dɔgɔya.
[15] Misira masaya barika na dɔgɔya siya tɔw bɛɛ ta ye. Ne na a kɔnɔ mɔgɔ dɔgɔya walisa u kana siya wɛrɛ mara.
[16] Israɛl ka so jigi tɛna da o masaya kan tun, sabu a ye a jigi da Misirakaw kan ka dɛmɛni min ɲini u fɛ, a hakili na jigin o filili la. U n'a dɔn ko ne ye Matigi Ala de ye.›»
[17] San mugan ni wolonwulanan kalo fɔlɔ tile fɔlɔ don, Matigi ka kuma sera ne ma ko:
[18] «Hadamaden, Babilonɛ masakɛ Nebukadnezar ye baara gɛlɛn bila a ka kɛlɛbolo kan Tir kama. A ka kɛlɛkɛ cɛw bɛɛ kunsigi bɔsira ka u kamankun mugu o donibaw kosɔn. O bɛɛ n'a ta o masakɛ ni a ka kɛlɛkɛ cɛw ma nafa si sɔrɔ u ka baara gɛlɛnw na Tir kama.
[19] O de kosɔn ne, Matigi Ala ko: ‹A filɛ, ne na Misira jamana di Babilonɛ masakɛ Nebukadnezar ma. O na a kɔnɔ nafolow cɛ ka taa ni u ye ka a bolo fɛnw bɛɛ bɔsi a la. Olu na kɛ a ka kɛlɛbolow sara ye.›
[20] K'a masɔrɔ ne, Matigi Ala ko: ‹Ne na Misira jamana di a ma k'a kɛ a ka baara gɛlɛn sara ye, sabu Kaldekaw ye baara kɛ ne ye.
[21] ‹O don na ne na Israɛl ka so barika bonya. E kɔni, i na kuma k'a foori Israɛl bɔnsɔnɲɛ na. U n'a dɔn ko ne ye Matigi de ye.›»