[1] Matigi ka kuma sera ne ma ko kura ko:
[2] «Hadamaden, i ka kuma kɔrɔma fɔ ka ntalen da Israɛl ka so ye.
[3] Ko, ne, Matigi Ala ko, bɔnba min kaman ka jan ni a kaman sɛɛnɛlen don, a kaman jolow kalankalannen don, o nana i sigi Liban kuluw kan ka sedere jiribolo dɔ kari ka taa n'a ye.
[4] Bolo min ka jan ni tɔw bɛɛ ye, a ye o kari ka taa ni o ye jagokɛ jamana dɔ la ka o bila jagokɛ duguba dɔ kɔnɔ.
[5] O kɔ, a ye o jamana kɔnɔ jirishyɛn dɔ ta ka o turu dugukolo hinɛma dɔ la. A ye o turu ba da la jiba kɛrɛ fɛ ka a turu i ko tufin.
[6] O jirishyɛn nugura ka kɛ rezɛn sun woyota ye duguma nka a ma janya san fɛ. A bolow taara bɔn fan fɛ, a diliw tun bɛ a jukɔrɔ. A kɛra rezɛn sun ye ka bolow ni furaw bɔ.
[7] «Nka bɔnba wɛrɛ tun bɛ yen. O kamanw tun ka jan, a jolow tun ka ca. O rezɛn sun min turula dugukolo la, o diliw ni a bolow woyora ka taa o bɔn filanan fan fɛ walisa o bɔn ka a sɔn ni ji ye.
[8] O bɛɛ n'a ta a turulen tun bɛ dugukoloɲumanɲuman la ba kɛrɛ fɛ jiba da la, walisa a ka fura bɔ ka kɛ rezɛn sunɲuman ye ka den kɛ.
[9] «Ne, Matigi Ala bɛ ɲininkali kɛ ko, yala o rezɛn sun na jiidi wa? Yala bɔnba fɔlɔ tɛna a dili sama ka bɔ k'a denw kari k'a to u bɛɛ ka ja walisa a kana den kɛ tun wa? A na ja. U mago tɛna kɛ barikaba wala mɔgɔ caman na k'a dili sama ka bɔ yen.
[10] Ayiwa o rezɛn sun tun turula kaɲɛ nka a tɛna se ka jiidi. Ni kɔrɔn fɛ fiɲɛ sera a ma, a bɛɛ na ja. Ɔwɔ, a na ja a turu yɔrɔ yɛrɛ la.»
[11] Matigi ka kuma sera ne ma ko:
[12] «I k'a fɔ nin so murutilen ye ko, yala aw ma nin ntalen kɔrɔ dɔn wa? Ko a filɛ, Babilonɛ masakɛ taara Jerusalɛm masakɛ ni a ka kuntigiw minɛ ka taa ni u ye Babilonɛ.
[13] A ye masa si mɔgɔ kelen minɛ. U ye layidu taɲɔgɔn ye, a y'a wajibiya ko a ka i kali fana. A taara ni o jamana kɔnɔ mɔgɔ barikamaw ye
[14] walisa o masaya fanga ka dɔgɔya, o kana se ka wuli tun, walisa u ka a ka layidu mara ka to kantigiya la a ye.
[15] Nka Sedesiasi murutira a ma ka cidenw ci ka taa Misira walisa olu ka sow ni kɛlɛkɛ cɛ caman ci a ma. Mɔgɔ min bɛ ninɲɔgɔn kɛ, yala o bɛ se ka tila wa? A ye layidu tiɲɛn, a na se ka tila cogo di?»
[16] Matigi Ala ko: «Neɲɛnama tɔgɔ kosɔn, ka a to a ka masaya so kɔnɔ a ka masasigilan kan, a ye ne ka kalili kɛ fuu ye ka ne ka layidu tiɲɛn. A na sa k'a to o masakɛ bolo Babilonɛ jamana la.
[17] Ni juguw ye yɛlɛnyɛlɛnnanw jɔ dugu kama ka kɛlɛ kunbɛn kogow jɔ walisa u ka mɔgɔ caman faga tuma min na, masakɛ Faraon ni a ka kɛlɛboloba ni a ka jamaba tɛna se ka Sedesiasi dɛmɛ o waati la.
[18] Sedesiasi ye kalilikan tiɲɛn ka layidu fana tiɲɛn k'a sɔrɔ a tun ye a bolo di. A ye o fɛnw bɛɛ kɛ, o de kosɔn a tɛna kisi.»
[19] Matigi Ala ko: «A ye ne ka kalili tiɲɛn ka ne ka layidu tiɲɛn. O de kosɔn ne ɲɛnama tɔgɔ kosɔn, ne na nin kow doni da a kun.
[20] Ne na ne ka juru da a ɲɛ, a na minɛ ne ka jan na. Ne na taa ni a ye Babilonɛ ka kiri tigɛ a kan yen a ka ko kɛlenw kosɔn.
[21] A ka sɔrɔdasi bolitɔw na faga npan fɛ. Minw ye dan kɛ, olu na jɛnsɛn fan bɛɛ la. O tuma la aw n'a dɔn ko ne, Matigi kumana.»
[22] Matigi Ala ko: «Ne yɛrɛ na sedere sun kuncɛma bolo kari ka o turu. Ne na a nugukun kura kelen kari ka taa o turu kulu jan dɔ kan.
[23] Ɔwɔ, ne na o turu Israɛl jamana kulu jan dɔ kan. A na nugu ka bolow bɔ ka den kɛ ka kɛ sedere sunɲumanɲuman ye, fo sanfɛ kɔnɔw bɛɛ na u ɲaaw da a bolow la. Kamanma fɛnw bɛɛ na sigi a suma la.
[24] Kungo kɔnɔ jiriw bɛɛ n'a dɔn ko ne, Matigi de bɛ jiri jan majigin ka jiri surun janya. Ko ne bɛ jiri kɛnɛ ja ka jiri jalan kɛ jiri kɛnɛ ye. Ne, Matigi ko ten. Ne na o kɛ k'a dafa.»