[1] «Hadamaden, i ka kiraya kɛ Gog ko la k'a fɔ a ye ko, Matigi ko: ‹Ros ni Mesɛk ni Tubal siyaw ka kuntigiba Gog, ne bɛ wuli i kama.
[2] Ne na i minɛ ka i sama ka bɔ saheli yanfan fɛ ka taa n'i ye Israɛl kuluw kan.
[3] Ne na i numanbolo la bonnikɛ kala kari ka i kininbolo la biɲɛkisɛw bi duguma.
[4] I ni i ka kɛlɛbolow ani i fɛ jama bɛɛ na sa Israɛl kuluw kan. Ne na i kɛ sogo dun kɔnɔw sifa bɛɛ ani kungo waraw ka dumuni ye.
[5] I na bi duguma kungo kɔnɔ sabu ne, Matigi Ala ye o fɔ.
[6] ‹Ne na tasuma tugu Magog la ani mɔgɔ minw lafiyalen bɛ kɔgɔji dala jamanaw la. U n'a dɔn ko ne ye Matigi de ye.
[7] Ne na tɔgɔ senuma jira ne ka mɔgɔ Israɛl bɔnsɔn cɛma. Ne tɛna sɔn ne tɔgɔ senuma ka nɔgɔ tun. Siyaw n'a dɔn ko ne ye Matigi, Israɛl bɔnsɔn ka Senuma de ye.›
[8] «Matigi Ala ko: ‹Tiɲɛ la, o kow na kɛ ka dafa. Ne kumana don min ko la, u na kɛ o don na.
[9] Israɛl bɔnsɔn na bɔ u ka duguw kɔnɔ ka u juguw ka kɛlɛkɛ minanw jeni san wolonwula kɔnɔ, nɛgɛ bɛnnan kunbabaw ni misɛnmanw ani kalaw ni biɲɛkisɛw ni tamaw ani berew.›
[10] Matigi Ala ko: ‹U tɛna dɔgɔ ɲini kungo kɔnɔ, u tɛna jiri tigɛ tu kɔnɔ sabu u na o kɛlɛkɛ minanw kɛ dɔgɔ ye. Mɔgɔ minw ye u ka fɛnw minɛ u la, u na olu taw minɛ u la. Minw ye u bolo fɛnw cɛ, u na olu taw cɛ.
[11] ‹Ni o kow sera, ne na su don yɔrɔ di Gog ma Israɛl jamana kɔnɔ yen. O na kɛ tɛmɛnbaaw ka jɛkɛnɛ la Kɔgɔji Salen ni kɔrɔn cɛ. O kaburu na tɛmɛnbaaw ka sira tigɛ. U na Gog ni a ka kɛlɛbolow suw don yen. O yɔrɔ na wele ko: «Gog ka jamakulu ka jɛkɛnɛ.»
[12] Israɛl ka so na kalo wolonwula kɛ o su donni la walisa ka jamana saniya.›
[13] Matigi Ala ko: ‹Jamana kɔnɔ mɔgɔw bɛɛ na o su donni baara kɛ. O na kɛ u bonya sababu ye. Ne na ne nɔɔrɔ jira o don na.
[14] U na mɔgɔ dɔw ɲɛnatɔmɔ, ko olu ka jamana yɔrɔw bɛɛ yaala, ni u tɛmɛntɔ ye su minw ye, u ka olu don walisa ka jamana saniya. Olu na o baara kɛ kalo wolonwula kɔnɔ.
[15] Ayiwa ni u yaalayaalatɔ ye mɔgɔ kolo minw ye, u na olu tonɲɔgɔn kan ka taamashyɛn kɛ u kɛrɛ fɛ sani su donnaw ka taa olu don Gog ka jamakulu ka jɛkɛnɛ la.
[16] Dugu dɔ fana na kɛ yen, o na wele ko Hamona, o kɔrɔ ko jamakulu. Jamana na saniya o cogo la.›
[17] «Matigi Ala ko: ‹Hadamaden, i k'a fɔ kɔnɔ sifaw bɛɛ ni kungo waraw bɛɛ ye ko: «Aw ka bɔ fan bɛɛ la ka aw lajɛ yɔrɔ kelen na saraka bɔ kama. Ne na o labɛn aw ye Israɛl kuluw kan, aw na sogo dun ka joli min.
[18] Aw na fa kɛlɛkɛ cɛ ja gɛlɛnw sogo la, aw na dugukolo kan kuntigiw joli min. Olu na kɛ saraka ye Basan sagajigiw ni sagadenw ni bakɔrɔw ni ntura tɔlɔlenw nɔ na.
[19] Ne ye saraka min faga aw ye, aw na o kɛn dun ka aw wasa, ka o joli min fo ka aw ɲɛnamini.
[20] Aw na fa sow ni sotigiw ni kɛlɛkɛ cɛ ja gɛlɛnw ni kɛlɛden sifa bɛɛ sogo la.» › Matigi Ala ko ten.
[21] «Matigi ko: ‹Ne na ne nɔɔrɔba jira siya wɛrɛw la. Ne bɛ kiri ko minw bi siyaw kan, ne bɛ u gosi cogo min na ni ne bolo ye, siyaw bɛɛ na o ye.
[22] Kabini o don na, Israɛl ka so n'a dɔn ko ne ye Matigi u ka Ala ye.
[23] ‹Siya wɛrɛw n'a dɔn ko Israɛl bɔnsɔn cɛra ka taa jɔnya la u yɛrɛw ka ko jugu kɛlenw kosɔn ne la. O de kosɔn ne ye neɲɛ cɛ ka bɔ u la ka u don u juguw bolo walisa olu ka u bɛɛ faga kɛlɛ la.
[24] Ne ye neɲɛ cɛ ka bɔ u la ka u tɔɔrɔ ka kɛɲɛ ni u ka nɔgɔlenyaw ni u ka ko haramulenw ye.›
[25] «Nka ne, Matigi Ala ko: ‹Sisan ne bɛ hinɛ Israɛl mɔgɔw la, Yakuba bɔnsɔn kɔni, ne na u ka kɔɲɛ yɛlɛma ka u bɔ jɔnya la, ne na ne tɔgɔ senuma mara.
[26] U naɲinɛ u ka mafiɲɛyali kɔ ani u ye kanntanya minw kɛ ne la, olu minw kɛra u kunna doni ye. U lakanalen na sigi u ka jamana kɔnɔ. Ko jugu si tɛna u sɔrɔ, mɔgɔ si tɛna u lasiran tun.
[27] Ni ne ye u lajɛ ka bɔ siyaw cɛma ka u labɔ u juguw ka jamanaw kɔnɔ tuma min na, ne na saniya u fɛ siyaw camanɲɛ na.
[28] U n'a dɔn ko, ne ye Matigi u ka Ala ye min ye u bila jɔnya la siyaw cɛma, o kɔ, ka u lajɛ ka taa u yɛrɛw ka jamana la. Ne tɛna u si to siyaw cɛma tun.
[29] Ne tɛna neɲɛ cɛ ka bɔ u la tun sabu ne na ne Ni jigin Israɛl ka so kan.› Ne, Matigi Ala ko ten.»