[1] San wɔɔrɔnan kalo wɔɔrɔnan tile duurunan don, ne ni Juda bɔnsɔn na cɛkɔrɔbaw sigilen tun bɛ ne ka so kɔnɔ. O don na Matigi Ala ye a bolo da ne kan.
[2] Ne ye filɛli kɛ, ne ye mɔgɔ bisigi ye, o tun bɛ i ko tasuma mana. Ka bɔ o fɛn jiralen solo la ka jigin, o tun bɛ i ko tasuma mana. Ka bɔ a cɛmancɛ la ka taa san fɛ, o tun ye yeelenba ye i ko nsiranɛgɛ nugulen manamanatɔ.
[3] O mɔgɔ bisigi y'a bolo mɔɔnɔbɔ ka ne minɛ ne kunsigi ma. O kɛlen, Ala Ni ye ne kɔrɔta sankolo ni dugukolo furancɛ la, ka taa ni ne ye Jerusalɛm o fɛn jiralen na fo ka se Matigi ka sokala kɔnɔ du donda ma min sinnen bɛ saheli yanfan fɛ. Matigi dusu bɔra boli min kosɔn, o tun bɛ yen.
[4] Israɛl ka Ala y'a nɔɔrɔ jira ne la yen i ko ne ye yeli fɛn min ye jɛkɛnɛ la.
[5] O tuma la a y'a fɔ ne ye ko: «Hadamaden, i ka i ɲɛ kɔrɔta ka filɛli kɛ saheli yanfan fɛ.» Ne ye ne ɲɛ kɔrɔta ka filɛli kɛ saheli yanfan fɛ. Boli min bɛ Matigi ka dimiya lawuli, ne ye o ye saraka bɔlan donda ni saheli yanfan cɛ.
[6] A y'a fɔ ne ye fana ko: «Hadamaden, nin mɔgɔw bɛ ko haramulen minw kɛ, Israɛl ka so mɔgɔw kɔni, walisa ne ka ne yɔrɔ janya ne ka yɔrɔ senuma la, i ɲɛ bɛ o la wa? Ayiwa, i na ko haramulenba wɛrɛw ye ka tɛmɛn nin kan.»
[7] O kɔ, a taara ni ne ye fo dukɛnɛ donda la. Ne ye filɛli kɛ ka kogo sɔgɔlen ye.
[8] A y'a fɔ ne ye ko: «Hadamaden, i ka kogo sɔgɔ.» Ne ye kogo sɔgɔ tuma min na, donda tun bɛ yen.
[9] A y'a fɔ ne ye ko kura ko: «Ko jugu haramulen dama tɛmɛnnen minw bɛ kɛ yan, i ka don ka olu filɛ.»
[10] Ayiwa, ne donna ka filɛli kɛ. Ne ye fɛn fofotaw ni bagan nɔgɔlen sifa bɛɛ jaw ye ani Israɛl bɔnsɔn ka boliw ja minw dilalen bɛ o kogow fan bɛɛ la.
[11] Israɛl ka so cɛkɔrɔbaw la mɔgɔ biwolonwula jɔlen tun bɛ o jaw kɔrɔ. Safan denkɛ Jaazania tun bɛ u cɛma. Wusulan daga tun bɛ u bɛɛ kelen-kelen bolo. O wusulan suma duman sisi tun bɛ wuli.
[12] A y'a fɔ ne ye ko: «Hadamaden, Israɛl bɔnsɔn cɛkɔrɔbaw bɛɛ kelen-kelen bɛ u dogo ka min kɛ u ka boliw bato sow kɔnɔ, i ye o ye wa? K'a masɔrɔ u b'a fɔ ko Matigi ɲɛ tɛ u la, ko Matigi ye jamana bila.»
[13] A y'a fɔ ko kura ko: «U bɛ ko haramulen wɛrɛ minw kɛ, i na olu ye.»
[14] A taara ni ne ye Matigi batosoba donda la saheli yanfan fɛ. Ne ye musow kasitɔ ye Tamuz boli kosɔn.
[15] A y'a fɔ ne ye ko: «Hadamaden, i ye o ye wa? I na ko haramulen wɛrɛw ye min ka jugu ka tɛmɛn o kan.»
[16] O kɔ, a taara ni ne ye Matigi ka dukɛnɛ la. Ne ye cɛ mugan ni duuru sɔrɔ gwa ni saraka bɔlan furancɛ la minw ye u kɔ sin Matigi batosoba ma ka u ɲɛ sin kɔrɔn yanfan ma ka u biri tile kɔrɔ k'a bato.
[17] O tuma la a y'a fɔ ne ye ko: «Hadamaden, i ye o ye wa? Juda ka so bɛ ko haramulen minw kɛ yen, o tɛ foyi ye u ɲɛ na wa? fo u bɛ jamana fa ni binkanni kow ye ka ne dusu dimin tuma bɛɛ. A filɛ, u bɛ busan da u nun kɔrɔ.
[18] Ayiwa ne fana na u kolo ni fariya ye. Ne tɛna hinɛ u la, ne tɛna makari u la. Hali ni u bɛ kasi ne tulo kɔrɔ, ne tɛna u lamɛn.»