[1] Matigi ka kuma sera ne ma ko:
[2] «Hadamaden, i k'a fɔ Tir kuntigi ye ko, Matigi Ala ko: ‹I kuncɛ bonyara, i ko i ye ala dɔ ye, ko i sigilen bɛ Ala ka sigilan kan kɔgɔji cɛmancɛ la. I ye Hadamaden ye, i tɛ ala dɔ ye hali k'a sɔrɔ i bɛ i yɛrɛ jate ala dɔ ye.
[3] I bɛ miiri ko i kɛra hakilitigi ye ka tɛmɛn Daniɛl kan, ko fɛn si dogolen tɛ i la.
[4] I kɛra fɛntigi ye i ka hakilitigiya ni i ka dɔnniya barika la. I ye sanu ni warijɛ mara i ka nafolo mara yɔrɔw la.
[5] I ka keguya ni i ka jago ye i ka nafolo caya. I kuncɛ bonyara i ka nafoloba kosɔn.›
[6] «O de kosɔn ne, Matigi Ala ko: ‹I b'a fɛ k'a jira ko i kɛra ala dɔ ye.
[7] O de kosɔn jamana wɛrɛ mɔgɔ minw ka farin, ne na olu lawuli i kama. Olu na u ka npan sama ka bɔ a ntan na i ka hakilitigiya kɛwalew kama ka i nɔɔrɔ tiɲɛn.
[8] U na i ladon kaburu kɔnɔ, i na sa sa cogo jugu la kɔgɔji cɛmancɛ la.
[9] I n'a fɔ i fagabaa ye ko i ye ala dɔ ye tun wa? Nka i ye mɔgɔ de ye i fagabaa bolo. I tɛ ala dɔ ye.
[10] I na faga jamana wɛrɛ mɔgɔw fɛ i ko bolokobali bɛ sa cogo min na. Ne, Matigi Ala ko ten.›»
[11] Matigi ka kuma sera ne ma ko kura ko:
[12] «Hadamaden, i ka maɲumatɔkan fɔ Tir masakɛ ko la k'a fɔ a ye ko ne, Matigi Ala ko: ‹I selen tun bɛ dafaleɲa dan na hakilitigiya ni cɛɲɛ la.
[13] I tun bɛ Ala ka nakɔ Edɛn kɔnɔ. Kabakurun sɔngɔ gɛlɛn sifa bɛɛ tun kɛra ka i masiri, rubi ni topazi ni luulu ni krisolite ni onikis ni jaspe ni safir ni eskarbukle ni emerode kabakurun ani sanu. Dununw ni filew tun ye i ka baarakɛ minanw ye. Olu labɛnna i ye i da don na.
[14] Ne ye i mun ka i kɛ kɔlɔsilikɛ serubɛn ye. Ne ye i sigi Ala ka kulu senuma kan. I tun bɛ taama kabakurun manamanataw cɛma.
[15] I taama cogo dafalen tun don kabini i da don na sani tilenbaliya ka ye i la.
[16] ‹I ka sannifeere caya de y'a to i dusukun fara binkanni la fo i ye jurumu kɛ. Ayiwa ne ye i fili ka bɔ Ala ka kulu kan. Kɔlɔsilikɛ serubɛn, ne ye i halaki kabakurun manamanataw cɛma.
[17] I kuncɛ bonyara i ka saramaya kosɔn. I ka yɛrɛ bonya ye i ka hakilitigiya tiɲɛn. Ne ye i ɲɔni ka i fili duguma ka i bila masakɛw kɔrɔ ka kɛ u ka filɛli fɛn ye walisa u ka kabakoya i halakili ko la.
[18] I ka tilenbaliya caman kosɔn ani i ka sannifeere kosɔn, i ye i ka yɔrɔ senumaw nɔgɔ. Ne y'a to tasuma ka mɛnɛ i cɛmancɛ la. O ye i jeni ka i kɛ bugurijɛ ye duguma i yebaaw bɛɛ ɲɛ na.
[19] I dɔnbaa minw bɛ siyaw cɛma, olu ja na tigɛ ka kabakoya i ko la. I halakira. I tɛna kɛ yen tun abada.›»
[20] Matigi ka kuma sera ne ma ko:
[21] «Hadamaden, i ka i ɲɛ sin Sidɔn fan fɛ ka kiraya kuma fɔ a kama.
[22] I k'a fɔ a ye ko ne, Matigi Ala ko: ‹Sidɔn, i laban ko selen filɛ. Ne na ne yɛrɛ bonya i cɛma. Ni ne ye ne ka kiri bi nin dugu kan ka ne ka senuya jira tuma min na, u n'a dɔn ko ne ye Matigi de ye.
[23] Ne na fiɲɛbana ci i cɛma ka joli woyo dugu bɔlɔnw na. Mɔgɔ suw na sɔrɔ i kɔnɔ sabu npan na i kɔnɔ mɔgɔw bɛɛ faga. U n'a dɔn ko ne ye Matigi de ye.
[24] ‹Israɛl ka so dafɛ mɔgɔw ni a mafiɲɛyabaaw si tɛna to yen tun ka kɛ nɔnfɔn nwɔnimaw ye ka a sɔgɔ, wala ka kɛ nwɔni kunbabaw ye ka a tɔɔrɔ. Ayiwa u n'a dɔn ko ne ye Matigi Ala de ye.›»
[25] Matigi Ala ko: «Ne ye Israɛl bɔnsɔn jɛnsɛn siya minw cɛma, ni ne ye u lajɛ ka bɔ olu cɛma tuma min na, o tuma la, ne n'a jira siya tɔw la, ko ne ye Ala senuma ye. Ne ye jamana min di ne ka jɔnkɛ Yakuba ma, ni o ye u yɛrɛw ka jamana ye, u na sigi yen.
[26] U lakanalen na sigi hɛrɛ la, u na sow jɔ ka rezɛn nakɔw bi. U lakanalen na sigi hɛrɛ la katuguni ne na kiri bi o lamini siyaw kan, olu minw ye u mafiɲɛya. O tuma la u n'a dɔn ko ne ye Matigi u ka Ala de ye.»