[1] Matigi ka kuma sera ne ma ko:
[2] «Hadamaden, i ka kuma Israɛl bɔnsɔnɲɛminɛbaaw ko la ka kiraya kɛ u kama k'a fɔ u ye ko, Matigi Ala ko: ‹Israɛl ɲminɛbaa minw bɛ u yɛrɛw nafa ɲini, bɔnɛ bɛ olu ye. Aw m'a dɔn ko saga gɛnna ka kan ka sagaw balo wa?
[3] Aw ye kɛn dun ka aw fɛɛrɛ bɔ ni ne ka sagaw si ye. Aw ye saga tɔlɔlenw faga k'a sɔrɔ aw ma sagaw balo.
[4] Aw ma saga dɛsɛlenw dɛmɛ. Aw ma saga banabaatɔw fura kɛ. Aw ma saga joginnenw jogindaw siri. Aw ma saga tununnenw ɲini ka na ni u ye ka u lajɛɲɔgɔn fɛ. Nka aw ye u mara ni fariya ni gɛlɛya ye.
[5] Sagaw jɛnsɛnna ka kɛ kungo waraw ka dumuni ye u taa yɔrɔw la, sabu gɛnbaa tun tɛ u la.
[6] Ne ka saga tununnenw bɛ yaala kuluw ni tintin janw bɛɛ kan. Ne ka saga jɛnsɛnnenw bɛ dugukolo yɔrɔw bɛɛ la. Mɔgɔ si ma hami u ko la ka taa u ɲini.›
[7] «O de kosɔn saga gɛnnaw, aw ka Matigi ka kuma lamɛn.
[8] Ne, Matigi, Ala ɲɛnama ko: ‹Cɛlikɛlaw ye ne ka sagaw minɛ saga gɛnnantaɲa kosɔn. U kɛra kungo waraw ka dumuni ye. Ne ka saga gɛnnaw ma hami ne ka sagaw ko la, nka u hamina u yɛrɛw ko la fo u ma sɔn ka ne ka sagaw balo.
[9] O de kosɔn saga gɛnnaw, aw ka Matigi ka kuma lamɛn.›
[10] Matigi Ala ko: ‹Ne na wuli o saga gɛnnaw kama ka u ɲininka ne ka sagaw ko la. Ne tɛna sɔn u ka ne ka sagaw gɛn. U tɛna se ka u yɛrɛw balo, nka ne na ne ka sagaw sama ka bɔ u da la walisa u kana ne ka sagaw dun tun.›
[11] «Matigi Ala ko: ‹K'a daminɛ sisan, ne, ne yɛrɛ na ne janto ne ka sagaw la ka u kɔlɔsi.
[12] Saga gɛnna bɛ a janto a ka sagakulu la k'a to u cɛma cogo min na, ne na ne janto ne ka sagaw la o cogo la. U jɛnsɛnna yɔrɔ minw na don jugu dibima la, ne na u bɔ o yɔrɔw la ka u lajɛ yɔrɔ kelen na.
[13] Ne na u labɔ siyaw cɛma ka u lajɛ yɔrɔ kelen na ka bɔ jamana caman na ka na ni u ye u yɛrɛw ka jamana la. Ne na u gɛn Israɛl kuluw kan ji woyo siraw da la ani yɔrɔ mɔgɔmaw la.
[14] Ne na u gɛn bagan gɛn yɔrɔ bin nugumaw la. U yaala yɔrɔw na kɛ Israɛl ka kuluw ye. U na u lafiya suluɲuman kɔnɔ ka dumuni kɛ bin nugu yɔrɔɲuman la Israɛl ka kuluw kan.
[15] Ne yɛrɛ na ne ka sagaw balo ka lafiya yɔrɔ di u ma.› Matigi Ala ko ten.
[16] ‹Min tununna, ne na o ɲini ka na n'a ye ka bɔ kungo kɔnɔ. Ne na a jogindaw siri ka a kɛnɛya. Nka minw tɔlɔlen don ni u barika ka bon, ne na olu faga. Ne na u bɛɛ kɔlɔsi ni tilennenya ye.›
[17] «Matigi Ala ko: ‹Aw kɔni, ne ka sagaw, ne na kiri tigɛ sagaw niɲɔgɔn cɛ ka kiri tigɛ sagajigiw ni bakɔrɔw cɛ.
[18] Ni aw ye dumuni kɛ yɔrɔɲumanw la, o tɛ aw wasa fɔ aw bɛ a tɔ cɔngɔ aw sen kɔrɔ. Ni aw ye jiɲuman min, aw bɛ aw sen kɛ k'a tɔ duuru.
[19] Aw ye bin min cɔngɔ aw sen kɔrɔ, ne ka sagaw bɛ wajibiya ka o dun, aw ye ji min duuru ni aw sen ye, u bɛ o min.›
[20] «O de kosɔn Matigi Ala ko: ‹Ne yɛrɛ na kiri tigɛ saga tɔlɔlenw ni saga fasalenw cɛ.
[21] Aw bɛ u ɲɔni ni aw kɛrɛw ni aw kamankunw ye ka saga barika dɛsɛlenw tuu ni aw biɲɛkolow ye fo ka u bɛɛ gɛn ka u jɛnsɛn.
[22] Ne na ne ka sagaw dɛmɛ walisa u kana minɛ cɛlikɛlaw fɛ tun. Ne na kiri tigɛ sagaw niɲɔgɔn cɛ.
[23] Ne na saga gɛnna kelen sigi u kun na. O na u kɔlɔsi. O ye ne ka jɔnkɛ Dawuda ye. Ale de na u gɛn ka kɛ u kɔlɔsibaa ye.
[24] Ne, Matigi yɛrɛ na kɛ u ka Ala ye, ne ka jɔnkɛ Dawuda na kɛ u kuntigi ye. Ne, Matigi ko ten.
[25] ‹Ayiwa ne na hɛrɛ layidu ta ne ka sagaw ye. Ne na jamana kɔnɔ waraw jɛnsɛn walisa ne ka mɔgɔw ka sigi hɛrɛ la. U na si kungokolon kɔnɔ hɛrɛ la.
[26] Ne na dubaw kɛ u ye ka dubaw kɛ ne ka tintin senuma fana ye u da fɛ. Ne na sanji lana waatiɲuman na. O na kɛ dubaw sanji ye.
[27] Kungo kɔnɔ jiriw na den kɛ, dugukolo sɛnɛ kɛ fɛnw naɲɛ. Israɛl bɔnsɔn na sigi hɛrɛ la u yɛrɛ ka jamana kɔnɔ. Ni ne ye u ka zuw kari ka u tila ka bɔ u tɔɔrɔbaaw bolo tuma min na, u n'a dɔn ko ne ye Matigi de ye.
[28] Siyaw tɛna u minɛ tun. Kungo waraw tɛna u farafara tun. U na sigi hɛrɛ la, mɔgɔ si tɛna u lasiran.
[29] Ne n'a to u ka danni siw kaɲɛ ka kɛ u nɔɔrɔ ye. Kɔngɔ tɛna u faga u ka jamana kɔnɔ tun. U tɛna don u tɔɔrɔbaaw bolo siyaw cɛma tun.
[30] U n'a dɔn ko ne ye Matigi, u ka Ala de ye. Ko ne bɛ u fɛ, Israɛl ka so ye ne ka mɔgɔw ye.› Matigi Ala ko ten.
[31] ‹Aw ye ne ka sagakulu gɛntaw ye, aw ye Hadamadenw ye, ne ye aw ka Ala de ye.›» Matigi Ala ko ten.