[1] San tan ni kelennan kalo sabanan tile fɔlɔ don, Matigi ka kuma sera ne ma ko:
[2] «Hadamaden, i k'a fɔ Misira masakɛ Faraon ni a ka mɔgɔw bɛɛ ye ko: ‹E ni jɔn ka kan bonya la?
[3] I ka Asiri filɛ, a tun bɛ i ko Liban sedere sun, bolo jamanjan furamaw minw bɛ se fo sankaba ma.
[4] Ji ye a bonya, dugu jukɔrɔ ji bɔra ka a lamini k'a bonya a turu yɔrɔ la. O ji sera fo kungo kɔnɔ jiriw bɛɛ ma.
[5] O de kosɔn a janyara ka tɛmɛn kungo kɔnɔ jiriw bɛɛ kan. A bolow nugura ka caya a lamini jibaw kosɔn.
[6] Sanfɛ kɔnɔw bɛɛ nana u ɲaaw da a bolow la. Kungo waraw bɛɛ tun bɛ bange a suma la yen. Siya caman sigira a suma kɔrɔ.
[7] A janya cogo tun ka ɲi ani a bolo janw, sabu a diliw tun donna jiba jukɔrɔ.
[8] Sedere jiri si tun tɛ a bɔ janya la Ala ka nakɔ kɔnɔ. Sipre jiri tun tɛ a bolow bɔ, platane sun si tun tɛ a bolo bɔ cɛɲɛ la Ala ka nakɔ kɔnɔ.
[9] Ne y'a cɛɲɛ ni a bolo caman ye, a cɛ tun ka ɲi ka tɛmɛn Ala ka nakɔ kɔnɔ jiriw bɛɛ kan.›
[10] «O de kosɔn ne, Matigi Ala ko: ‹A y'a yɛrɛ bonya a janya kosɔn ko a sera fo sankaba ma, a kuncɛ bonyara a janya kosɔn.
[11] O de kosɔn ne ye a don setigi dɔ bolo siyaw cɛma. O ye a sara ka kɛɲɛ ni a ka kɛwalew ye. Ne y'a fili a ka juguya kosɔn.
[12] Siya farinma dɔ wulila a kama ka a tigɛ k'a fili duguma. A bolow bira kuluw ni kulu furancɛw bɛɛ la. A bolow ɲɔɲɔna jamana bɛɛ la. Dugukolo kan mɔgɔw bɛɛ bɔra a suma kɔrɔ k'a to yen.
[13] Sanfɛ kɔnɔw bɛɛ y'u sigi a bilen kan. Kungo waraw nana a bolow cɔngɔ u sen kɔrɔ.
[14] O kɛra walisa jiri minw turulen bɛ ji cɛma, olu si kana u kuncɛ bonya ka u yɛrɛ kɔrɔta ka se fo sankaba ma. Minw fara ji la, olu si kana u yɛrɛw bonya u janya kosɔn, k'a masɔrɔ u bɛɛ na sa ka don kaburu kɔnɔ dugukolo jukɔrɔ mɔgɔ salenw cɛma.›»
[15] Matigi Ala ko: «A donna dugukolo jukɔrɔ don min na, ne y'a to kasiba ka kɛ a kosɔn. Ne ye ji boyiw da geren ka bajiw jɔ fo u tɛ woyo tun. Jibaw tɛna woyo ka taa ale kosɔn tun. Ne ye Liban bilaɲɛnasisi la ale kosɔn. Kungo kɔnɔ jiriw bɛɛ fɔsɔnfɔsɔnna a kosɔn.
[16] Ne ye ale ni dingɛba kɔnɔ jiginbaaw lajiginɲɔgɔn fɛ kaburu kɔnɔ tuma min na, o tuma la ne ye siyaw yɛrɛyɛrɛ a bikan kosɔn. O de y'a to Edɛn kɔnɔ jirisunw ani Liban taɲɛnatɔmɔlen fisaman minw bɛɛ tun bɛ ji sɔrɔ ka kɔrɔ, olu dusu saalola dugukolo jukɔrɔ yɔrɔ dunbaw la.
[17] Olu fana ni a jiginnaɲɔgɔn fɛ kaburu kɔnɔ, npan ka mɔgɔ fagalenw yɔrɔ la, olu tun ye a bolow ye, u sigira a suma kɔrɔ siyaw cɛma.
[18] «A filɛ, e ni Edɛn nakɔ kɔnɔ jiri si bɔlen tɛɲɔgɔn fɛ nɔɔrɔ ni bonya la, nka i ni Edɛn nakɔ kɔnɔ jiriw bɛɛ na don dugukolo jukɔrɔ. I na da bolokobaliw ani npan ka mɔgɔ fagalenw cɛma. Ko min na Faraon ni a ka mɔgɔw sɔrɔ, o filɛ o ye. Ne, Matigi Ala ko ten.»