[1] Matigi ka kuma sera ne ma ko:
[2] «Hadamaden, i ka kiraya kɛ k'a fɔ ko Matigi Ala ko, aw ka kasi ko: ‹Bɔnɛba na se aw ma, aw ka kasi o kosɔn.
[3] Ayiwa o don surunyara, ɔwɔ, Matigi ka don surunyara. A na kɛ dibiba don ani siyaw ka kiri don ye.
[4] Npan na fagali kɛ Misira. Ni Misirakaw joginna fo ka sa, ni u ka nafolow bɛɛ cɛra, ka u jusigilanw bi tuma min na, jatigɛ na Etiopikaw minɛ.
[5] ‹Etiopi ni Put ni Lud ani Arabi jamana bɛɛ ni Kub ani layidu jamanadenw, olu bɛɛ ni Misirakaw na faga npan fɛ.›»
[6] Ayiwa Matigi ko: «Misira jigi da yɔrɔ na tiɲɛn, a ka kuncɛbaya na ban. Npan na u bɛɛ faga ka bɔ Migdol fo ka taa se Siene.» Matigi Ala ko ten.
[7] «Misira jamana na kɛ jamana lankolon ye. A duguw na kɛ tomonw ye ka tɛmɛn dugu cilenw bɛɛ kan.
[8] Ɔwɔ, ni ne ye tasuma tugu Misira jamana la ka u ka dɛmɛbaaw tiɲɛn tuma min na, u n'a dɔn ko ne ye Matigi de ye.
[9] «O don na cidenw na bɔ ne kɔrɔ ka don kurunw kɔnɔ ka taa Etiopi mɔgɔ lafiyalenw lasiran. Misira jamana ka tɔɔrɔ don na, jatigɛ na Etiopikaw minɛ.»
[10] Matigi Ala ko: «Ne na Misirakaw bɛɛ don Babilonɛ masakɛ Nebukadnezar bolo ka u halaki.
[11] O ni a ka mɔgɔ farinmaw na taa Misira jamana fɛnw bɛɛ cɛ. U na u ka npanw sama ka bɔ u ntanw na Misirakaw kama ka jamana bɛɛ fa ni mɔgɔ suw ye.
[12] Ne na u ka baji ja ka u ka jamana don mɔgɔ juguw bolo. Ne na jamana ni a kɔnɔ fɛnw don dunanw bolo. Ne, Matigi ko ten.»
[13] Matigi Ala y'a fɔ ko kura ko: «Ne na u ka boliw tiɲɛn ka Nof bato fɛn fuuw tiɲɛn. Kuntigi si tɛna sɔrɔ Misira jamana kɔnɔ. Ne na jatigɛba bi jamana kan.
[14] Ne na Patros ci ka Zoan jeni ni tasuma ye ka ne ka kiri bi No kan.
[15] Ne na wuli Misira kɛlɛ kunbɛn so Sen kama ni fariya ye. Ne na No jama bɛɛ halaki ka u ban.
[16] Ne na tasuma tugu Misira la, dibiba na Sen minɛ. No dugu na ci, Nof na minɛ juguw fɛ tile gwan fɛ.
[17] On ni Pi-Besɛt kamalenɲumanw bɛɛ na faga npan fɛ. U kɔnɔ mɔgɔw bɛɛ na cɛ ka taa jɔnya la.
[18] Ni ne ye Misira jamana fanga tiɲɛn k'a ka kuncɛbaya barika ban don min na, tile na dibi Takpanes kɔnɔ. Jamana yɔrɔw bɛɛ na dibi. Misira dugu kɔnɔ mɔgɔw na minɛ ka taa jɔnya la.
[19] Ne na ne ka kiri bi Misira jamana kan. U n'a dɔn ko ne ye Matigi de ye.»
[20] San tan ni kelennan kalo fɔlɔ tile wolonwulanan don, Matigi ka kuma sera ne ma ko:
[21] «Hadamaden, ne ye Misira masakɛ Faraon bolo kari. A filɛ, u ma a siri walisa a ka kɛnɛya walisa a ka a barika sɔrɔ tun ka npan ta.
[22] O de kosɔn ne, Matigi Ala ko, ‹Ne na neɲɛ sin Misira masakɛ Faraon ma k'a bolow kari, a boloɲuman ani min karila ka ban. Ne na npan bi ka bɔ a bolo.
[23] Ne na Misirakaw jɛnsɛn siyaw cɛma ka u jɛnsɛn jamana caman na.
[24] Ne na Babilonɛ masakɛ bolo barika bonya ka ne ka npan don o bolo. Ne na Faraon bolow kari. A na nwunan o ɲɛ kɔrɔ i ko mɔgɔ joginnen satɔ bɛ nwunan cogo min na.
[25] Ne na Babilonɛ masakɛ bolow barika bonya, Faraon bolow na bi duguma. Ni ne ye ne ka npan don Babilonɛ masakɛ bolo, o ka wuli Misira jamana kama tuma min na, u n'a dɔn ko ne ye Matigi de ye.
[26] Ne na Misirakaw jɛnsɛn siyaw cɛma jamana wɛrɛw kɔnɔ. U n'a dɔn ko ne ye Matigi de ye.›»