[1] Ayiwa Juda bɔnsɔn ka masakɛ Jojakim ka masaya san sabanan la, Babilonɛ masakɛ Nebukadnezar taara daga Jerusalɛm da la.
[2] Matigi ye Juda bɔnsɔn ka masakɛ Jojakim ani Alabatosoba kɔnɔ minan dɔw don Babilonɛ masakɛ Nebukadnezar bolo. A taara ni olu ye Sinear jamana la ka u bila a ka bato fɛn ka so kɔnɔ, a ka bato fɛn ka nafolo mara yɔrɔ la.
[3] Masakɛ ye ci di a ka so kɔnɔ baara kuntigi Aspenaz ma ko o ka taa kamalen dɔw ɲɛnatɔmɔ ka bɔ Israɛl siya la masakɛ bɔnsɔnw na wala mɔgɔbaw ka gwaw la ka taa ni u ye a fɛ yen.
[4] Ko olu ka kɛ mɔgɔw ye, fiɲɛ tɛ minw na, ni u cɛ ka ɲi, ni u kalannen bɛ hakilitigiya ni dɔnniya ni faamuli la, ni u bɛ se ka masakɛ ka so kɔnɔ baara kɛ. A ka olu kalan Kalde jamana kan ni a sɛbɛnni la.
[5] Masakɛ y'a fɔ ko dɔ ka bɔ a ka dumuni ni diwɛn na ka di u ma don o don. Ko u ka kalan san saba kɔnɔ walisa u ka don masakɛ ka baara la.
[6] Daniɛl ni Hananiya ni Misaɛl ani Azariya tun bɛ olu la ka bɔ Juda siya la.
[7] So kɔnɔ baara kuntigi ye tɔgɔ wɛrɛ da u la. A ye Daniɛl tɔgɔ da ko Beltisazar ka Hananiya tɔgɔ da ko Sadrak ka Misaɛl tɔgɔ da ko Mesak ka Azariya tɔgɔ da ko Abɛd-Nego.
[8] Daniɛl y'a latigɛ a yɛrɛ kɔnɔ ko a tɛna masakɛ ka dumuni fɛnw dun ka o ka diwɛn min ka a yɛrɛ nɔgɔ. O de kosɔn a ye so kɔnɔ baara kuntigi deli ko a kana ale wajibiya ka o dumuni fɛnw dun ka a yɛrɛ nɔgɔ.
[9] Ala ye Daniɛl ko diya so kɔnɔ baara kuntigi ye, o hinɛna a la.
[10] So kɔnɔ baara kuntigi y'a fɔ Daniɛl ye ko: «Ne matigi masakɛ, min ko o dumuni ni minni fɛnw ka di aw ma, ne bɛ siran o ɲɛ, sabu ni a nana k'a sɔrɔ aw fasalen bɛ ka tɛmɛn aw tɔɲɔgɔn kamalenw kan, aw na masakɛ ka dimiya lase ne ma.»
[11] Nka so kɔnɔ baara kuntigi tun ye Daniɛl ni Hananiya ni Misaɛl ani Azariya balo ko kalifa dumuni kuntigi min ma, Daniɛl y'a fɔ o ye ko:
[12] «Ne bɛ i deli ko i ka nakɔ ɲugu ni ji gwansan di an, i ka jɔnw ma, tile tan kɔnɔ k'a filɛ.
[13] O kɔ, i ka an ɲɛda cogo filɛ. Kamalen minw bɛ masakɛ ka dumuni kɛ, ka olu ɲɛda cogo fana filɛ. O kɔ, i ka baara kɛ ka kɛɲɛ ni i ka ko yelen ye.»
[14] Dumuni ko ɲɛnabɔbaa sɔnna u ka fɔlen ma. A ye u kɔrɔbɔ tile tan kɔnɔ.
[15] O tile tan dafalen kɔ, a y'a ye ko u nɔɔrɔ ka ɲi ka tɛmɛn kamalen misɛn tɔw ta kan minw tun bɛ masakɛ ka dumuni ɲumanw dun, u bonyara ka tɛmɛn olu bɛɛ kan.
[16] O de kosɔn dumuni ko ɲɛnabɔbaa ma sɔn ka dumuni fɔlen ni diwɛn di u ma. A ye nakɔ ɲugu di u ma.
[17] Ayiwa Ala ye dɔnniya ni o sɛbɛnw faamuli ni hakilitigiya di o kamalen naani ma. Daniɛl hakili tun ka bon yeli fɛnw ni sugow kɔrɔ fɔli la fana.
[18] Masakɛ ka waati latigɛlen dafalen, u taa tuma sera masakɛ ɲɛ kɔrɔ. So kɔnɔ baara kuntigi taara ni u ye masakɛ Nebukadnezar ɲɛ kɔrɔ.
[19] Masakɛ kumana u fɛ minkɛ, a y'a kɔlɔsi ko Daniɛl ni Hananiya ni Misaɛl ani Azariya bɔɲɔgɔnko tun tɛ o kamalenw la. O de kosɔn olu donna masakɛ ka baara la.
[20] Masakɛ ye u ɲininka hakilitigiya ni dɔnniya fɛn o fɛn na, a y'a kɔlɔsi ko u ka fisa ni a yɛrɛ ka mara la dɔnbaayakɛlaw ni a ka filɛlikɛlaw bɛɛ ye siɲɛ tan.
[21] O de kosɔn Daniɛl tora yen fo ka taa se masakɛ Sirus ka masaya san fɔlɔ ma.