[1] Matigi ka kuma sera ne ma ko:
[2] «Hadamaden, i ka i ɲɛ sin Amɔn bɔnsɔn fan fɛ ka kiraya kɛ u kama.
[3] I k'a fɔ Amɔn bɔnsɔn ye ko u ka Matigi Ala ka kuma lamɛn. «Matigi Ala ko: ‹Ne ka yɔrɔ senuma nɔgɔra tuma min na, Israɛl ka jamana lankoloɲara tuma min na, Juda ka so taara jɔnya la don min na, o don na aw y'a fɔ u ko la, ko: «Ohɔɔ.»
[4] ‹O de kosɔn ne na aw don kɔrɔnfɛ mɔgɔw bolo ka kɛ u ta ye. Olu na u ka buguw turu aw ka dugukolo kan ka kɛ u sigiyɔrɔw ye. U na aw ka baara tɔnɔ dun ka aw ka nɔnɔ min.
[5] Ne na aw ka duguba Raba kɛɲaamɛw ka dumuni kɛ yɔrɔ ye, Amɔn bɔnsɔn ka jamana yɔrɔ bɛɛ na kɛ saga gɛn yɔrɔ ye. Aw n'a dɔn ko ne ye Matigi de ye.›
[6] «Ne, Matigi Ala ko: ‹Aw ye tɛgɛrɛ fɔ ka aw panpan ka ɲagali ka aw ka mafiɲɛyali jira Israɛl bɔnsɔn ka bɔnɛ kow la.
[7] O de kosɔn ne na ne bolo kɔrɔta aw kama ka aw don siyaw bolo. Ne na aw ka mɔgɔw dɔgɔya ka aw jɛnsɛn siyaw cɛma ka aw halaki ka aw ban. Aw n'a dɔn ko ne ye Matigi de ye.›»
[8] Matigi Ala ko: «Moab bɔnsɔn ni Seirkaw y'a fɔ ko Juda ka so kɛlen filɛ i ko siya tɔw ka so.
[9] O de kosɔn ne na Moab dancɛw dayɛlɛ ka u ka dugubaw Bɛt-Jesimot ni Baal-Meon ani Kirijataim ci, olu minw ye u nɔɔrɔ ye.
[10] Ne na o jamana dayɛlɛ kɔrɔnfɛ mɔgɔw ye Amɔn bɔnsɔn kama ka sigiyɔrɔ di u ma ka kɛ u ta ye walisa Amɔn bɔnsɔn kana jate siya ye tun.
[11] Ne na ne ka kiri bi Moab bɔnsɔn kan fana. U n'a dɔn ko ne ye Matigi de ye.»
[12] Matigi Ala ko: «Edɔmkaw ye u mɔnɛbɔ Juda ka so la k'a jalaki o mɔnɛbɔ kosɔn.»
[13] O de kosɔn Matigi Ala ko: «Ne na ne bolo kɔrɔta Edɔm kama ka a mɔgɔw ni a baganw bɛɛ halaki ka u ban. Ka bɔ Teman fo ka taa se Dedan, ne na o bɛɛ kɛ kungokolon ye. Npan na u bɛɛ faga.
[14] Ne na ne mɔnɛbɔ Edɔm na ne ka mɔgɔw Israɛl bɔnsɔn bolo. Olu na Edɔmkaw sara ka kɛɲɛ ni ne dusubɔ ko ni ne ka dimiya ye. O tuma la u n'a dɔn ko o ye Matigi Ala ka mɔnɛbɔ ko ye.»
[15] Matigi Ala ko: «Filisitikaw fariyara ka u mɔnɛbɔ ni kɔnɔna juguya ye ko u ma mɔgɔw bɛɛ halaki u ka koniya banbali kosɔn.»
[16] O de kosɔn Matigi Ala ko: «Ne na ne bolo kɔrɔta Filisitikaw kama ka Kereti mɔgɔw bɛɛ faga. U tɔ minw sigilen bɛ kɔgɔji da la, ne na olu fana faga.
[17] Ne na ne mɔnɛbɔ u la ka u tɔɔrɔ ni fariya ye. Ni ne ye ne mɔnɛbɔ u la tuma min na, u n'a dɔn ko ne ye Matigi de ye.»