[1] San bisabanan kalo naaninan tile duurunan don, ne Ezekiɛl, sarakalasebaa Buzi denkɛ, ka ne to Yahutu mɔgɔ minɛlenw cɛma Kebar ba da la, ne ye sankolo dayɛlɛlen ye. Ala ye yeli fɛnw jira ne la. O kɛra masakɛ Jojaken ka jɔnya san duurunan kalo tile duurunan don. Matigi ka kuma sera ne ma ka ne to Kalde jamana la Kebar ba da la. Matigi bolo dara ne kan yen.
[4] Ne ye min ye, o filɛ nin ye. Fununfununba dɔ nana ni sankabafin ye ka bɔ saheli yanfan fɛ. Tasuma tun bɛ seriseri ka bɔ a fan bɛɛ la. Kɛnɛyeelenba tun bɛ o sankaba lamini. A kɛra i ko nsiranɛgɛ yɛrɛntɔ tun bɛ tasuma cɛmancɛ la.
[5] Fɛnɲɛnama naani tun bɛ a cɛmancɛ la. Olu ye cogo bɔlen bɛ Hadamaden fɛ.
[6] Ɲɛda naani-naani tun bɛ u bɛɛ kelen-kelen na. Kamanfura naani-naani tun bɛ u bɛɛ kelen-kelen na.
[7] U senw tilennen tun don, u ntɔrɔnw tun bɛ i ko misiden ta, olu tun bɛ manamana i ko nsiranɛgɛ yɛrɛntɔ.
[8] Hadamaden bolow tun bɛ u kamanw jukɔrɔ u fan naani bɛɛ la. Ɲɛda naani-naani ni kamanfura naani-naani tun bɛ o fɛnɲɛnama naani bɛɛ kelen-kelen na.
[9] U kamanfura nunkunw tugulen tun bɛɲɔgɔn na. Ni u bɛ taama, u tɛ u yɛlɛma, nka u bɛɛ kelen-kelen bɛ taa u kuntilenna fɛ.
[10] U ɲɛdaw cogo filɛ nin ye. U ɲɛda dɔ bɛ i ko Hadamaden ta. U kinin yanfan fɛɲɛda bɛ i ko waraba ta. U numan yanfan fɛɲɛda bɛ i ko misi ta, u kɔfɛɲɛda bɛ i ko bɔn ta.
[11] U ɲɛdaw ni u kamanfuraw faralaɲɔgɔn na san fɛ. U kamanfuraw la fila-fila tugutugulen tun bɛɲɔgɔn na. Kamanfuraw la fila-fila wɛrɛ tun kɛra ka u fari datugu.
[12] U bɛɛ kelen-kelen tun bɛ taama u ɲɛ kuntilenna fɛ. Ala Ni tun bɛ taa yɔrɔ min na, u tun bɛ taa o yɔrɔw bɛɛ la, u tɛ kɔsegin u taa siraw fɛ.
[13] O fɛnɲɛnamaw ye cogo bɛ i ko takami ni fitinɛ yeelen. Tasuma mana tun bɛ o fɛnɲɛnamaw fan bɛɛ ka yeelen bɔ.
[14] O fɛnɲɛnamaw tun bɛ taa ka segin, u tun ka tɛli i ko san yɛgɛyɛgɛ.
[15] Ne ye fɛnɲɛnamaw filɛ. Wotoro sen koolilen bɔɲɔgɔnko tun bɛ u naani bɛɛ kelen-kelen kɛrɛ fɛ duguma.
[16] O senw dila cogo ni u ye cogo bɔlen bɛ krisolite kabakurun fɛ. U naani bɛɛ ka kan. U naani dila cogo ni u ye cogo kɛra i ko sen dɔ bɛ dɔ cɛ tigɛ.
[17] U tun bɛ taama ka taa u fan naani bɛɛ fɛ. U taara u kuntilenna fɛ, u ma kɔsegin u taa siraw fɛ.
[18] O sen koolilenw kooli tun ka bon haali, siranfɛnba tun don. O sen naani bɛɛ laminina niɲɛkisɛw ye.
[19] Ni o fɛnɲɛnama naani tun bɛ taama, o senw tun bɛ kolonkolon u kɛrɛ fɛ. Ni u tun bɛ pan, o senw tun bɛ wuli ka bɔ duguma.
[20] Ala Ni tun bɛ taa yɔrɔ o yɔrɔ, olu fana tun bɛ taa Ni taa yɔrɔ la. O sen koolilenw tun bɛ kɔrɔta u kɛrɛ fɛ katuguni ni min tun bɛ fɛnɲɛnamaw la, o ni kelen tun bɛ sen koolilenw na.
[21] Ni fɛnɲɛnamaw tun bɛ taama, senw fana tun bɛ taama. Ni u jɔra, senw fana tun bɛ jɔ. Ni u kɔrɔtara ka bɔ duguma, senw tun bɛ kɔrɔta u fɛ katuguni ni min tun bɛ fɛnɲɛnamaw la, o ni kelen tun bɛ o sen koolilenw na.
[22] Sankolo furancɛ bɔɲɔgɔnko tun bɛ o fɛnɲɛnamaw ni san cɛ, o tun bɛ yeru i ko krisital kabakurun manamanatɔ. A fɛnsɛna u sanfɛla kun na.
[23] U kamanfuraw sɛɛnɛlen sinnen tun bɛɲɔgɔn ma o jukɔrɔ. U bɛɛ kelen-kelen kamanfuraw la fila-fila tun kɛra ka u fari fan bɛɛ datugu.
[24] Ni u tun bɛ taa, ne tun bɛ u kamanfuraw mankan mɛn i ko jiba woyokan, i ko Kɔrɔtalenba kan, a mankan tun bɛ i ko kɛlɛbolo kulu mankan. Ni u tun bɛ jɔ, u tun bɛ u kamanfuraw lajigin.
[25] Ni u ye u jɔ ka u kamanfuraw lajigin tuma min na, mankan gɛlɛn dɔ tun bɛ bɔ u kunna furancɛ san fɛ.
[26] O kunna furancɛ sanfɛla kɛra i ko masasigilan min dilara ni safir kabakurun ye. A kɛra i ko Hadamaden bisigi sigilen bɛ o masasigilan kan fɛn bɛɛ san fɛ.
[27] Ne ye o manamanatɔ ye o masasigilan kan k'a fan bɛɛ lamini i ko nsiranɛgɛ yɛrɛntɔ. Ka bɔ a solo la fo ka se a kun na, o tun bɛ manamana i ko tasuma mana. Ka bɔ a cɛmancɛ la ka jigin, a kɛra i ko tasuma mana yeelen.
[28] Yeelen min tun bɛ ye a fan bɛɛ la, o kɛra i ko Ala ka muru min bɛ ye sankaba cɛma sanji na don na. O yeli fɛn bɔlen bɛ Matigi nɔɔrɔ fɛ. Ne y'a ye minkɛ, ne ye ne bi ka neɲɛ biri duguma. O tuma la ne ye kumakan dɔ mɛn.