[1] Matigi ka kuma sera ne ma ko:
[2] «Hadamaden, i ka i ɲɛ sin Seir kulu fan fɛ
[3] ka kiraya kɛ a kama k'a fɔ a ye ko Matigi Ala ko: ‹A sera i ma sa, Seir kulu. Ne na ne bolo mɔɔnɔbɔ i kama ka i kɛ kungokolon lankolon ye.
[4] Ne na i ka duguw kɛ tomonw ye, i na kɛ jamana lankolon ye. O tuma la i n'a dɔn ko ne ye Matigi de ye.
[5] ‹I ye Israɛl koniya tuma bɛɛ ka u faga ni npan ye u ka bɔnɛ don na, u ka tilenbaliya sara waati la.›
[6] O de kosɔn Matigi Ala ko: ‹Neɲɛnama tɔgɔ kosɔn ne na i faga, fagali na tugu i la. Fagali tun ka di i ye, o de kosɔn fagali na tugu i yɛrɛ la.
[7] Ne na Seir kulu kɛ yɔrɔ lankolon ni tomon ye ka a kɔnɔ tɛmɛnbaaw bɛɛ faga.
[8] Ne na a kuluw bɛɛ fa mɔgɔ suw la. I ka tintinw ni kulu furancɛw ni i ka ji woyo siraw bɛɛ na fa npan ka mɔgɔ fagalen suw la.
[9] Ne na i halaki kudayi. Mɔgɔ si tɛna sigi i ka duguw kɔnɔ tun. Aw n'a dɔn ko ne ye Matigi de ye.
[10] ‹I y'a fɔ ko nin siya fila ani nin jamana fila ye i ta ye, ko aw na u minɛ, k'a sɔrɔ Matigi tun bɛ yen.›
[11] O de kosɔn Matigi Ala ko: ‹Neɲɛnama tɔgɔ kosɔn, ne dusu bɔlenba na i sara ne ka mɔgɔw koniyali kosɔn i fɛ. Ni ne ye kiri tigɛ i kan tuma min na, ne ka mɔgɔw na ne dɔn.
[12] I ye mafiɲɛyali kuma minw fɔ Israɛl ka kuluw ko la ko u tiɲɛnna, ko u dira aw ma fɛn cɛlen ye, aw n'a dɔn ko ne, Matigi ye o kuma bɛɛ mɛn.
[13] Aw ye aw yɛrɛw bonya ka ne dusu kasi ni aw ka kumaw ye ka ne dɔgɔyali kuma caman fɔ. Tiɲɛ la, ne ye o bɛɛ mɛn.›
[14] «Matigi Ala ko: ‹Ni dugukolo bɛɛ bɛɲagali tuma min na, ne na i kɛ tomon ye.
[15] I bɛɲagali Ala ka ciyɛn, Israɛl ka so tiɲɛnni kosɔn. O de kosɔn ne na i sara. I na tiɲɛn, Seir kulu ani Edɔm yɔrɔw bɛɛ kɔni. U n'a dɔn ko ne ye Matigi de ye.›