[1] Israɛl bɔnsɔn cɛkɔrɔba dɔw nana ne sɛgɛrɛ ka u sigi ne kɔrɔ.
[2] O tuma la Matigi ka kuma sera ne ma, ko:
[3] «Hadamaden, nin mɔgɔw bɛ u ka boliw doni u dusukun na ka ja dɛsɛnenw jɔ u yɛrɛw ɲɛ kɔrɔ, olu minw b'a to u bɛ tilenbaliya kow kɛ. Yala ne ka kan ka u ka ɲininkali lamɛn wa?
[4] O de kosɔn i ka kuma u fɛ k'a fɔ ko, Matigi Ala ko: ‹Ni Israɛl ka mɔgɔ dɔ dusukun nɔrɔlen tora boliw la ka sama a ka jurumu sababu fɛ, o kɔ, ka na kira ɲininka, ne, Matigi yɛrɛ na a jaabi. A ye boli caman minw bato, ne na olu juru sara a la,
[5] walisa ne ka Israɛl ka so mɔgɔw dusukun kɔsegin ne ma, k'a masɔrɔ u bɛɛ farala ne la u ka boliw kosɔn.›
[6] «O de kosɔn i k'a fɔ Israɛl ka so ye, ko Matigi Ala ko: ‹Aw ka kɔsegin ka na, aw ka aw ka boliw to yen ka aw ɲɛ cɛ ka bɔ aw ka ja haramulenw bɛɛ la.
[7] Ni Israɛl ka so mɔgɔ wala a ka siginfɛ dɔ ye ne bila, ni a dusukun nɔrɔlen tora a ka boliw la ka sama a ka jurumu sababu fɛ, o kɔ, ka na kira ɲininka ka ne sago dɔn, a yɛrɛ cogo la, ne, Matigi yɛrɛ na a jaabi.
[8] Ne na neɲɛ sin a ma ka a kɛlɛ walisa a ka kɛ lasɔmili fɛn ye, ka o tɔgɔ kɛ ntalen da fɛn ye. Ne na a halaki ka bɔ ne ka mɔgɔw cɛma. Aw n'a dɔn ko ne ye Matigi de ye.
[9] ‹Ni kira nɛgɛnna ka lafilili kumaw fɔ, ne yɛrɛ na o kira lafili. Ne na ne bolo kɔrɔta o kama ka o tigi halaki ka bɔ ne ka mɔgɔw Israɛl cɛma.
[10] U fila bɛɛ na u ka tilenbaliya kow doni ta, min bɛ kira ɲininka, o ka tɔɔrɔ ni kira ka tɔɔrɔ bɛɛ ka kan
[11] walisa Israɛl ka so kana tunun ka bɔ ne ɲɛ kɔrɔ. U kana na nɔgɔ u ka sariya tiɲɛn kow kosɔn. U na kɛ ne ka mɔgɔw ye, ne na kɛ u ka Ala ye.› Matigi Ala ko ten.»
[12] O kɔ, Matigi ka kuma sera ne ma, ko:
[13] «Hadamaden, ni jamana dɔ ye jurumu kɛ ne la ka tilenbaliya ko dɔ kɛ, ni ne ye ne bolo kɔrɔta o kama ka a ka dumuni ban ka kɔngɔ bila o jamana la ka mɔgɔw ni baganw faga,
[14] hali ni nin cɛ saba sɔrɔla o jamana mɔgɔw cɛma, Nuhun ni Daniɛl ani Job kɔni, olu ka tilennenya tɛna se ka ko wɛrɛ kɛ, fɔ u yɛrɛw kisili.» Matigi Ala ko ten.
[15] «Ni ne ye jamana yɔrɔw bɛɛ fa ni wara juguw ye ka jamana mɔgɔw ban ka jamana kɛ tomon ye, fɔ mɔgɔ si tɛ tɛmɛn yen o waraw ɲɛsiran kosɔn,
[16] hali ni o mɔgɔ saba sɔrɔla o jamana kɔnɔ, ne, Matigi Ala ɲɛnama tɔgɔ kosɔn, u tɛna se ka hali u yɛrɛw denkɛw wala u denmusow kisi, fɔ u yɛrɛw dama, jamana na kɛ tomon ye.
[17] «Wala ni ne ye npan ci jamana kama, ni ne nana k'a fɔ ko npan ka fagali kɛ ka mɔgɔw ni baganw bɛɛ faga,
[18] hali ni ne ye o mɔgɔ saba sɔrɔ yen, ne ɲɛnama tɔgɔ kosɔn, u tɛna se ka hali u yɛrɛw denkɛw wala u denmusow kisi, fɔ u yɛrɛw dama.» Matigi Ala ko ten.
[19] «Wala ni ne ye fiɲɛbana ci jamana kɔnɔ, ni ne dusu bɔlenba wulila u kama ka u gosi ka u faga ka u si tunun, mɔgɔw fara baganw kan,
[20] hali ni Nuhun ni Daniɛl ani Job sɔrɔla yen, ne ɲɛnama tɔgɔ kosɔn, u tɛna se ka hali u yɛrɛw denkɛw wala u denmusow kisi u ka tilennenya kosɔn, fɔ u yɛrɛw dama.»
[21] Ayiwa Matigi Ala bɛ min fɔ, o filɛ nin ye, ko: «Hali ni ne ye tɔɔrɔ ko naani lase Jerusalɛm ma, npan ni kɔngɔ ni wara juguw ka farafarali ani fiɲɛbana kɔni, ka mɔgɔw ni baganw bɛɛ faga,
[22] hali o, Jerusalɛmka tɔ dɔɔnin na to ka bɔ yen, u denkɛw ni u denmusow kɔni. Olu na taa aw sɛgɛrɛ. Aw na u cogo ni u ka kɛwalew ye. Ne ye tɔɔrɔ minw bi Jerusalɛm kan, aw dusu na suma olu kosɔn.
[23] Ɔwɔ, aw dusu na suma ni aw ye u cogo ni u ka kɛwalew ye. Aw n'a dɔn ko ne ma nin dugu gosi ka u tɔɔrɔ ni kun t'a la.» Matigi Ala ko ten.